Yowano 11:1-57
11 Jino kwapwile mutu umwe apwile nakuviza. Lijina lyenyi ikiye Lazalu wakuMbetane, kwimbo lyaMaliya nandumbwenyi Malita.+
2 Ou ikiye Maliya uze ahingunwinyine Mwata maji alivumba lyamwaza nakumuhunda kumahinji najikambu jakumutwe wenyi.+ Ndumbwenyi Lazalu ikiye apwile nakuviza.
3 Shikaho vandumbwenyi vamapwevo vatumine mazu kuli Yesu ngwavo: “Ivwa, ove Mwata! Mutu uze wazanga ali nakuviza.”
4 Oloze omu Yesu evwile ngocho, ambile ngwenyi: “Kuviza kanechi kacheshi chakutwala kukufwako, oloze chinapu chakumutohweselaho Kalunga,+ mangana naMwanaKalunga vahase kumutohweselaho.”
5 Jino Yesu azangile Malita nandumbwenyi, naLazalu.
6 Oloze omu evwile ngwavo Lazalu ali nakuviza, avandamine makumbi avali kuchihela kuze apwile.
7 Jino ambile kuli tumbaji ngwenyi: “Tuyenu cheka kuYuleya.”
8 Tumbaji vambile kuli ikiye ngwavo: “Ove Lapi,+ kalinwomu vene vaYuleya vasakanga kukwasa malolwa,+ kaha kukiko nauya cheka nawa?”
9 Yesu akumbulwile ngwenyi: “Uno kakwatwama jola 12 jamusanako nyi?+ Kachi nge mutu mwatambuka namusana, keshi kuhukana kuchuma numba chimweko, mwomwo ali nakumona mumunyi wakaye kano.
10 Oloze kachi nge mutu mwatambuka naufuku, mwahukana, mwomwo kumunyika kacheshi muli ikiyeko.”
11 Omu akumishile kuhanjika vyumevi, ambile cheka ngwenyi: “Sepa lyetu Lazalu nasavala,+ oloze nanguyako mangana ngukamuhindule.”
12 Jino tumbaji vambile kuli ikiye ngwavo: “Ove Mwata, kachi nge nasavala, kaha mwahinduka.”
13 Yesu ahanjikile vyakufwa chaLazalu. Oloze vakiko vashinganyekele ngwavo apwile nakuhanjika vyakunoka chatulo.
14 Ngocho Yesu avalwezele hatoma ngwenyi: “Lazalu nafu.+
15 Kahami ngunawahilila mwomwo yayenu hakuwana nge ami kangwapwanga kuzeko, mangana enu mwitavile. Tuyenu jino kuli ikiye.”
16 Ngocho Tomase, uze vavulukilenga ngwavo Pasa, ambile kuli vakwavo tumbaji ngwenyi: “Tuyenu nayetu nawa mangana tukafwile nenyi hamwe.”+
17 Omu Yesu ahetele, amuwanyine Lazalu natwame makumbi awana muchimbumbe.*
18 Jino Mbetane yapwile kwakamwihi naYelusalema, kafwe tunda yajimayilo jivali.*
19 Ngocho vaYuleya vavavulu vejile kuli Malita naMaliya mangana vavavendejeke hakufwa chandumbwavo.
20 Kahomu Malita evwile ngwavo Yesu ali nakwiza, amusesele nakumuhumangana, oloze Maliya+ atwamine lika muzuvo.
21 Malita ambile jino kuli Yesu ngwenyi: “Ove Mwata, kachi wapwanga kuno kachi ndumbwami kafwileko.
22 Numba vene oholili ngunatachikiza ngwami vyeshovyo naulomba kuli Kalunga, mwakuhanavyo.”
23 Yesu ambile kuli ikiye ngwenyi: “Ndumbwove mwasanguka.”
24 Malita ambile kuli ikiye ngwenyi: “Ngunatachikiza ngwami mwakasanguka omu nakukapwa kusanguka+ halikumbi lyakukuminyina.”
25 Yesu ambile kuli ikiye ngwenyi: “Ami yami kusanguka, yami kuyoya.+ Ou mwangufwelela, numba nge mwafwa, mwakayoya cheka.
26 Kaha weshowo ali nakuyoya oholyapwa nakungufwelela, keshi kukafwako.+ Unetavila vyuma kana nyi?”
27 Malita ambile kuli ikiye ngwenyi: “Eyo ove Mwata, ngunetavila ngwami ove yove Kulishitu MwanaKalunga uze vambile ngwavo mwakeza mukaye.”
28 Omu akumishile kuhanjika ngocho, ayile, kaha asanyikile ndumbwenyi Maliya nakumuyevetela ngwenyi: “Muka-kunangula+ neza, ali nakukusanyika.”
29 Omu Maliya evwile ngocho, akatukile washiwashi nakuya kuli ikiye.
30 Halwola kanelu, Yesu apwile kanda ahete mwimbo, oloze achipwile kuchihela kuze vamuhumanganyine kuli Malita.
31 Jino omu vaYuleya vaze vapwile naMaliya muzuvo nakumuvendejeka vamwene nakatuka washiwashi nakulovoka, vamukavile, mwomwo vashinganyekele ngwavo pamo ali nakuya kuchimbumbe*+ mangana akalilileko.
32 Omu Maliya ahetele kuze apwile Yesu, alimbilile hamavu kumahinji enyi hakumumona, kaha ambile kuli ikiye ngwenyi: “Ove Mwata, kachi wapwanga kuno kachi ndumbwami kafwileko.”
33 Kahomu Yesu amumwene ali nakulila, navaYuleya nawa vaze vejile nenyi vali nakulila, Yesu alishishimwine* nakulyonyinga chikuma.
34 Avehwile ngwenyi: “Munamusavalika kulihi?” Vakiko vamukumbulwile ngwavo: “Ove Mwata, twaya utale.”
35 Yesu asotwele masoji.+
36 Ngocho vaYuleya vaputukile kwamba ngwavo: “Talenu omwo amuzangile!”
37 Oloze vamwe vambile ngwavo: “Ou mutu atonesanga meso ayauze kapuputa,+ ika ahonenanga kukinga ou mutu azeneke kufwa?”
38 Jino omu alingile Yesu hanalishishimuna cheka mumuchima wenyi, ayile jino kuze kuchimbumbe. Echi chimbumbe* chapwile chawina wakusendeveka, kaha vambanjikileko lilolwa.
39 Jino Yesu ambile ngwenyi: “Fumisenuko eli lilolwa.” Malita ukwechi ndumbwenyi uze afwile, ambile kuli ikiye ngwenyi: “Ove Mwata, oholyapwa nanuku, mwomwo munahichi lyehi makumbi awana.”
40 Yesu ambile kuli ikiye ngwenyi: “Uno kangwakulwezanga ngwami nge nawitavila naumona upahu waKalungako nyi?”+
41 Ngocho vafumishileko lize lilolwa. Jino Yesu andwile meso enyi nakutala mwilu,+ kaha ambile ngwenyi: “Ove Tata, ngunakusakwilila mwomwo unangwivu.
42 Chamuchano vene ngunatachikiza ngwami weji kungwivwanga shimbu yosena. Oloze ngunambe ngocho mwomwo yaliyongomena eli linangujingilika, mangana vetavile ngwavo yove wangutumine.”+
43 Kahomu akumishile kuhanjika vyumevi, atambakanyine nalizu lyakukanguka ngwenyi: “Ove Lazalu, lovokamo!”+
44 Mutu uze apwile wakufwa alovokelemo, hanga vamukashilanga kumavoko nakumahinji namahina aze vamujingile, nakumeso enyi nawa hanga vamujingilanga lilesu. Yesu ambile kuli vakiko ngwenyi: “Mukasununenu nakumwecha ayenga.”
45 Shikaho vaYuleya vavavulu vaze vejile kuli Maliya, vaze nawa vamwene chuma alingile Yesu vamufwelelele,+
46 oloze vamwe vayile kuli vaFwaliseu nakuvalweza vyuma alingile Yesu.
47 Ngocho vapilishitu vavakulwane navaFwaliseu vakungulwile vaka-Sunendeline, kaha vambile ngwavo: “Natulinga muka, hakuwana nge mutu kanou ali nakulinga vinjikizo vyavivulu?+
48 Kachi nge natumwechelela ngana, vatu vosena navamufwelela, kaha vaLoma navakeza nakututambula chihela chetu* nalifuchi lyetu.”
49 Oloze minavo umwe, Kayafwase+ uze apwile kapilishitu wakulitulaho mumwaka kana uze, ambile kuli vakiko ngwenyi: “Enu kamwatachikiza chuma numba chimweko,
50 kaha kamweshi nakumona ngwenu chinapu kutokwa kuli enu kupwa namutu umwe afwile vatu, kuhambakana lifuchi lyosena valinongeseko.”
51 Awa mazu ahanjikile kawapwile enyi iveneko, oloze hakupwa kapilishitu wakulitulaho mumwaka kana uze, apolofwetele ngwenyi Yesu mwakafwila lifuchi lize,
52 keshi nge lifuchi lize kahako, oloze mangana vana vaKalunga nawa vaze valimwangila kwosena akavakungulwile hamwe vakapwe lizavu limwe.
53 Shikaho kufuma likumbi vene lize, vaputukile kumutwama punga mangana ngwavo vamujihe.
54 Ngocho Yesu katambukilenga cheka musana weye muli vaYuleyako, oloze afumine kuze nakuya kungalila yapwile kwakamwihi napambo, nakukengila munganda vavuluka ngwavo, Efwalime,+ kaha atwaminenga muze natumbaji.
55 Jino Paseka+ yavaYuleya yapwile kwakamwihi, kaha vatu vavavulu mumembo vayile kuYelusalema shimbu kanda Paseka mangana vakalitomese kweseka najishimbi.
56 Jino vapwile nakumutondatonda Yesu, kaha valihanjikishilenga mwavomwavo oku vanemana hamwe mutembele ngwavo: “Munashinganyeka muka? Uno keshi kwiza kuchiwanyinoko tahi?”
57 Kaha vapilishitu vavakulwane navaFwaliseu vahanyine jindongi ngwavo, kachi nge kuli mutu natachikiza okwo ali Yesu, atela kwambulula, mangana vamukwate.
Kwinyikila Chamwishi
^ Chipwe “muchimbumbe chakwanukila.”
^ Kafwe jikilomita jitatu. Hela., “yamashitandeya 15.” Tala Chihande B14.
^ Chipwe “kuchimbumbe chakwanukila.”
^ Hela., “alishishimwine mushipilitu yenyi.”
^ Chipwe “chimbumbe chakwanukila.”
^ Kulumbununa, tembele.
