Yowano 12:1-50
12 Kahomu kwasalile makumbi 6 shimbu kanda Paseka, Yesu ejile kuMbetane kuze apwile Lazalu,+ uze vasangwile kuli Yesu kufuma kuvafu.
2 Ngocho vamuwahishilile kulya chachingoloshi kuze. Malita apwile nakuvahana vyakulya,+ kaha Lazalu apwile hali vaze vapwile nakulya nenyi vyakulya.*
3 Jino Maliya ambachile paundu* yamaji alivumba lyamwaza, analatu hayohayo, andando yayinene chikuma, awahingunwinyine kumahinji aYesu, kaha ahunjile kumahinji aYesu najikambu jakumutwe wenyi. Ngocho muzuvo mwosena mwanukile livumba lyawaze maji.+
4 Oloze Yuta Isakalyote,+ umwe wavaze tumbaji twenyi uze apwile kwakamwihi nakumusolola kuli vaka-kole, ambile ngwenyi:
5 “Mwomwo ika awa maji alivumba lyamwaza vanahonena kuwalandulula jindenali* 300 nakujihana vaka-kuhutwa?”
6 Ikiye kahanjikile ngocho mwomwo yakuzakama vaka-kuhutwako, oloze mwomwo apwile mwiji kaha nawa ikiye apwile nachikasha chajimbongo. Apwilenga nakwiva jimbongo vahakilengamo.
7 Kaha Yesu ambile ngwenyi: “Mwechenu alinge ngocho mangana awahishile chimweza vyalikumbi lyakungufunda ami.+
8 Mwomwo enu namupwanga navaka-kuhutwa shimbu yosena,+ oloze kamweshi kupwanga nayami shimbu yosenako.”+
9 Jino liyongomena lyalinene lyavaYuleya vatachikijile ngwavo Yesu ali kuze, kaha vayileko, keshi nge nakumona ikiye kahako, oloze naLazalu nawa uze vasangwile kuli Yesu kufuma kuvafu.+
10 Jino vapilishitu vavakulwane vatwamine punga yakujiha naLazalu nawa,
11 mwomwo vaYuleya vavavulu vapwile nakuya kuze nakufwelela Yesu+ mwomwo yaLazalu.
12 Lichako, liyongomena lyalinene lize lyejile kuchiwanyino lyevwile ngwavo Yesu ali nakwiza kuYelusalema.
13 Ngocho vambachile mavale, vamusesele nakumuhumangana, kaha vaputukile kutambakana ngwavo: “Tuli nakukulomba umulwile. Vakisula ou mweza mulijina lyaYehova,*+ ou apwa Mwangana wavaIsalele.”+
14 Omu Yesu awanyine mwanachimbulu, atwamineho,+ nge muze vasoneka ngwavo:
15 “Ove mwanapwevo Zeyone, kanda nawivwa womako. Tala! Mwangana wove ali nakwiza, natwame halivuvu lyachimbulu.”+
16 Hakavanga tumbaji twenyi kavatachikijile mwalumbunukilile vyumeviko. Oloze omu vamutohwesele Yesu,+ hakiko vanukile jino ngwavo kumana vyuma kana vavisonekele kutalisa kuli ikiye kaha nawa vamulingililevyo ikiye.+
17 Jino vatu vaze vapwile naYesu halikumbi lize asanyikile Lazalu muchimbumbe*+ nakumusangula kuvafu, vatwalileho lika kuhana unjiho wavyuma vamwene.+
18 Evi vikiko vatu vayilile nakusesa Yesu nakumuhumangana mwomwo vevwile ngwavo nalingi chinjikizo kana.
19 Shikaho vaFwaliseu valihanjikishile mwavomwavo ngwavo: “Nevi tuli nakulinga vene vyauchi. Talenu! Kaye kosena kali nakumukavangiza.”+
20 Jino hali vaze vejile nakulemesa Kalunga kuchiwanyino hapwile navaHelase.
21 Kaha vapandamine kuli Fwilipu+ uze afumine kuMbetesayita yakuNgalileya, kaha vamulombele ngwavo: “Ove mwata, tuli nakusaka kumona Yesu.”
22 Fwilipu ayile nakulweza Andelei. Kaha Andelei naFwilipu vayile nakumulweza Yesu.
23 Oloze Yesu avakumbulwile ngwenyi: “Ola yinahete mangana Mwanamutu vamutohwese.+
24 Chamuchano vene nangwamba kuli enu ngwami, linona lyatiliku kuvanga liholokele mumavu nakufwa, mokomoko nalipwanga lika linona limwe. Oloze kachi nge nalifwa,+ nalisemunwina manona amavulu.
25 Weshowo azanga mwono wenyi mwaunongesa, oloze weshowo mwahunga mwono wenyi+ muno mukaye, mwaukinga mangana akapwe nakuyoya chahaya myaka yosena.+
26 Kachi nge mutu mwasaka kunguzachila ami, angukavangizenga, kaha kuze nguli ami, kukiko vene mwapwanga namuka-kunguzachila nawa.+ Kachi nge mutu mwasaka kunguzachila ami, kaha navamuvumbika kuli Tata.
27 Jino nguli* nakulyonyinga,+ kaha ngwambenga muka? Ove Tata, ngulwile kuola kaneyi.+ Chipwe ngocho, ola kaneyi yikiko vene ngwejililile.
28 Ove Tata, tohwesa lijina lyove.” Kaha mwilu mwafumine lizu+ ngwavo: “Lijina lyami ngwalitohwesa lyehi, kaha nangulitohwesa cheka nawa.”+
29 Jino liyongomena lize lyemanyine kuze lyevwile lize lizu, kaha vaputukile kwamba ngwavo mukalateta. Veka ngwavo: “Kangelo nahanjika kuli ikiye.”
30 Yesu ambile kuli vakiko ngwenyi: “Lizu eli lineza mwomwo yayenu, keshi mwomwo yayamiko.
31 Jino kaye kano vali nakukasopesa, kaha muka-kuyula kano kaye+ navamukatumuna.+
32 Kaha ami, nge vanangufumisa lyehi hamavu,+ nangukakoka vatu vakulisezaseza vosena vakeze kuli ami.”
33 Yesu ahanjikile ngocho mangana asolole munachikapwa kufwa chenyi chize mwakafwa.+
34 Jino lize liyongomena lyamukumbulwile ngwalyo: “Etu twevwa muJishimbi ngwavo Kulishitu mwatwamanga haya myaka yosena.+ Nyi ove nawamba ngachilihi ngwove Mwanamutu vatela kumufumisa hamavu?+ Uno ou Mwanamutu ikiye iya?”
35 Yesu ambile kuli vakiko ngwenyi: “Kumunyika nachipwa mukachi kenu hatando yayindende. Tambukenunga shimbu kumunyika chili nayenu, kuchina milima nayimifungulula. Weshowo eji kutambukanga mumilima keshi kutachikiza okwo ali nakuyako.+
36 Shimbu kumunyika chili nayenu, fwelelenu kumunyika, mangana mupwenga muvana vakumunyika.”+
Omu Yesu akumishile kuhanjika vyumevi, afumine kuze kuli vakiko nakuya nakuswama.
37 Numba tuhu alingile vinjikizo vyavivulu kumeso avo, oloze kavamufweleleleko,
38 ngocho vateselemo mazu akapolofweto Isaya aze ahanjikile ngwenyi: “Ove Yehova,* iya nafwelela vyuma vize nevu kuli etu?*+ Iyaze vanasolwela ngolo jaYehova?”*+
39 Isaya ahanjikile cheka vyumovyo vahonenene kwitava ngwenyi:
40 “Nelavisa meso avo nakukaluhwisa michima yavo mangana vahone kumona, vahone nawa kumona namichima yavo mwalumbunukila vyuma, kuchina navakinduluka nguvoke.”+
41 Isaya ahanjikile vyumevi, mwomwo amwene upahu wenyi, kaha ahanjikile vyaikiye.+
42 Numba vene vaka-kuyula vavavulu vamufwelelele,+ oloze mwomwo yavaFwaliseu, kavamwitavilile kumeso avatuko kuchina navavahanga musunangonga,+
43 mwomwo vazangile kuvatohwesa kuvatu kuhambakana kuvatohwesa kuli Kalunga.+
44 Oloze Yesu atambakanyine ngwenyi: “Weshowo mwangufwelela, kafwelelele ami kahako, oloze nauze nawa angutumine ami,+
45 kaha weshowo nangumono ami, namono nawa naUze angutumine ami.+
46 Ami nguneza nge kumunyika mukaye,+ mangana weshowo mwangufwelela ahone kutwamanga mumilima.+
47 Oloze kachi nge mutu mwevwa mazu ami nakuhona kuwalama, kangweshi kumusopesako, mwomwo ami kangwejile nakusopesa kayeko, oloze nakulwila kaye.+
48 Weshowo mwanguleununa ami nakuhona kwitavila mazu ami, kwali umwe mwakamusopesa. Mazu awa ngunahanjika akiko vene nawakamusopesa halikumbi lyakukuminyina.
49 Mwomwo ami kangwahanjikile mwaya vishinganyeka vyayami iveneko, oloze ivene Tata uze angutumine ikiye nanguhane lushimbi lwavyuma ngwatela kwambulula navyuma ngwatela kuhanjika.+
50 Kaha ngunatachikiza ngwami lushimbi lwenyi lukiko vene lweji kunehanga kuyoya chahaya myaka yosena.+ Shikaho vyuma ngweji kuhanjikanga ami, ngweji kuvihanjikanga ngana muze angulwezavyo Tata.”+
Kwinyikila Chamwishi
^ Chipwe “vaze vasendavalile nenyi kumesa.”
^ Kulumbununa, paundu yavaLoma yajingalamu kafwe 327. Tala Chihande B14.
^ Tala Chihande B14.
^ Tala Chihande A5.
^ Chipwe “muchimbumbe chakwanukila.”
^ Chipwe “Jino mwono wami uli.”
^ Chipwe “nafwelela mujimbu tunambulula?”
^ Tala Chihande A5.
^ Tala Chihande A5.
