Yowano 14:1-31
14 “Michima yenu kanda nayilizakaminako.+ Fwelelenu muli Kalunga,+ fwelelenu nawa muli ami.
2 Muzuvo yaTata muli vihela vyakutwama vyavivulu.* Kachi kachapwanga ngochoko, kachi ngunamilweze, mwomwo nguli nakuya nakumiwahishila chihela chenu.+
3 Kaha nawa, nge ngunayi nakumiwahishila chihela chenu, nangwiza cheka nakumitambula mukatwame kuze ngwatwama ami, mangana kuze nguli ami nayenu nawa mukatwamengako.+
4 Kaha okwo nguli nakuya, jila mwayitachikiza.”
5 Tomase+ ambile kuli ikiye ngwenyi: “Ove Mwata, etu katwatachikijile okwo uli nakuyako. Nyi jila natuyitachikiza ngachilihi?”
6 Yesu ambile kuli ikiye ngwenyi: “Ami yami jila,+ yami muchano,+ yami kuyoya.+ Mutu naumwe wauchi mweza kuli Tata kuvanga ahichile muli ami.+
7 Kachi nge enu mwangutachikizanga ami, kachi munamutachikiza naTata nawa. Kufuma vene oholili munamutachikiza, kaha munamumono.”+
8 Fwilipu ambile kuli ikiye ngwenyi: “Ove Mwata, tulweze Iso, kaha kunahu.”
9 Yesu ambile kuli ikiye ngwenyi: “Ove Fwilipu, elu lwola lwalusuku ngunatwame nayenu, kumana noholyapwa kanda uchingutachikize nyi? Weshowo nangumono ami namono naTata nawa.+ Nyi nawamba ngachilihi ngwove, ‘Tulweze Iso’?
10 Uno kawetavila ngwove ami ngwalikata naTata, kaha Tata nawa alikata nayamiko nyi?+ Vyuma ngweji kuhanjikanga kuli enu, kavyapwa vyayami iveneko,+ oloze Tata uze alikata nayami ikiye ali nakuzata milimo yenyi.
11 Itavilenu omu nguli nakuhanjika ngwami ami ngwalikata naTata, kaha Tata nawa alikata nayami. Nge chiku, kaha itavilenu mwomwo yamilimo eyi ngunazatenga.+
12 Chamuchano vene nangwamba kuli enu ngwami, weshowo mwangufwelela, mwazatanga nawa milimo ngweji kuzatanga ami. Mwazatanga milimo yakuhambakana hali eyi,+ mwomwo ami nguli nakuya kuli Tata.+
13 Kaha nawa cheshocho chuma namulomba mulijina lyami, nanguchilinga, mangana Tata vamutohwese kuhichila muli Mwana.+
14 Kachi nge namulomba chuma chimwe mulijina lyami, nanguchilinga.
15 “Kachi nge mwanguzanga, namulamanga jishimbi jami.+
16 Ami nangumulomba Tata, kaha ikiye mwamihana muka-kumikafwa* weka mangana atwamenga nayenu haya myaka yosena,+
17 yikiko shipilitu yamuchano,+ yize kaye kakeshi kuhasa kuyitambulako, mwomwo kaye kakamona shipilituko, chipwe kuyitachikizako.+ Enu munayitachikiza, mwomwo yatwama nayenu, kaha yili nawa muli enu.
18 Ami kangweshi kumiseza muushonako.* Nangwiza cheka kuli enu.+
19 Namuhita katando kakandende, kaha kaye kakeshi kungumona chekako, oloze enu namungumonanga,+ mwomwo ami ngwayoya, kaha nayenu nawa namuyoyanga.
20 Halikumbi lize, namukatachikiza ngwenu, ami ngwalikata naTata, kaha enu mwalikata nayami, kaha ami nawa ngwalikata nayenu.+
21 Weshowo etavila jishimbi jami nakujilamanga, ou ikiye anguzanga ami. Kaha nawa weshowo anguzanga ami, navamuzanga kuli Tata, kaha ami nawa nangumuzanga nakulisolola hatoma kuli ikiye.”
22 Jino Yuta,+ keshi uze Isakalyoteko, amwihwile ngwenyi: “Ove Mwata, ika uli nakusakila kulisolola hatoma kuli etu kaha, oloze kukaye chiku?”
23 Yesu amukumbulwile ngwenyi: “Kachi nge mutu anguzanga, mwalamanga mazu ami,+ kaha navamuzanga kuli Tata, ngocho natwiza kuli ikiye nakutwama nenyi.+
24 Weshowo azeneka kunguzanga ami keshi kulama mazu amiko. Kaha mazu awa muli nakwivwa kaweshi ayamiko, oloze apwa aTata uze angutumine.+
25 “Vyumevi ngunavihanjikanga kuli enu omu ngunapunga nayenu hamwe.
26 Oloze muka-kumikafwa, shipilitu yajila, yize Tata mwakatuma mulijina lyami, ou ikiye vene mwakaminangulanga vyuma vyosena, nakumyanukisanga vyosena vize ngwamilwezelenga.+
27 Nangumisela kuunda, nangumihana vene kuunda chami.+ Ami kangweshi kumihanacho nge muze kaye keji kuchihanangako. Michima yenu kanda nayilizakamina, chipwe kulizuzukila nawomako.
28 Mwevwanga muze ngwamilwezanga ngwami, ‘Nguli nakuya, kaha nangwiza cheka kuli enu.’ Kachi nge mwanguzanga, kachi munawahilila hakutachikiza ngwenu nguli nakuya kuli Tata, mwomwo Tata anguhambakana ami.+
29 Shikaho ngunamilweze shimbu kanda chichisoloke, mangana mwitavile omu nachilinga nge chinasoloka lyehi.+
30 Ami kangweshi kuhanjika cheka mazu amavulu kuli enuko, mwomwo muka-kuyula kano kaye+ ali nakwiza, kaha keshi nangolo hali amiko.+
31 Oloze hakusaka kaye katachikize ngwako ami ngwazanga Tata, shikaho nguli nakulinga nge muze angulwezele Tata.+ Katukenu, tufumenu kuno.
Kwinyikila Chamwishi
^ Chipwe “muli mautwamo amavulu.”
^ Chipwe “muka-kumivendejeka.”
^ Chipwe “kumiseza nge vangingako.”
