Yowano 15:1-27
15 “Ami yami muvinyo wamuchano, kaha Tata ikiye muka-kulima.
2 Weshowo mutango wakuli ami uze kaweshi kwima mihakoko, eji kuufumisangako, kaha weshowo weji kwimanga mihako, eji kuutomesanga mangana wimenga mihako yayivulu.+
3 Enu munatomo lyehi mwomwo yamazu ngunahanjika kuli enu.+
4 Likatenunga nayami, kaha ami nawa nangulikata nayenu. Nganomu mutango kaweshi kulimina uvene mihakoko, kuvanga uli kumuvinyo, nayenu nawa kamweshi kwima mihakoko, kuvanga mulikate nayami.+
5 Ami yami muvinyo, enu mumitango. Weshowo mwalikatanga nayami, kaha ami nawa ngunalikate naikiye, ou ikiye vene mwemanga mihako yayivulu,+ mwomwo chakuzeneka ami, kamweshi kuhasa kulinga chuma numba chimweko.
6 Kachi nge mutu keshi kulikata nayamiko, navamumbila nge mutango uze vanambili nakuma chau. Vatu veji kukungululanga mitango kana nakuyimbila mukakahya, kaha hinayiwema.
7 Kachi nge namulikatanga nayami, kaha nawa nge mazu ami nawatwamanga muli enu, lombenu tuhu cheshocho munasake, kaha navamilingilacho.+
8 Tata veji kumutohweselanga hakwimanga chenu mihako yayivulu nakupwanga mutumbaji twami.+
9 Nge muze Tata anguzanga ami,+ nayami nawa ngwamizanga enu. Ngocho twamenunga muzangi yami.
10 Kachi nge namulamanga jishimbi jami, kaha namutwamanga muzangi yami, nganomu ngunalame ami jishimbi jaTata nakutwama muzangi yenyi.
11 “Ngunahanjika vyumevi kuli enu mangana muwahilile nge omu ngwawahilila ami, kaha namuwahilila chikuma.+
12 Elu lukiko lushimbi lwami, ngwami mulizangenga navakwenu nganomu ngunamizangenga enu.+
13 Naumwe wauchi ali nazangi yakuhambakana eyi, mutu kwecha mwono wenyi hali masepa jenyi.+
14 Kachi nge namulinga vyuma nguli nakumilweza ami, kaha munapu mumasepa jami.+
15 Ami kangweshi kumivuluka cheka ngwami muvandungoko, mwomwo ndungo katachikiza vyuma eji kulinganga kaka yenyiko. Oloze ami ngunamivuluka ngwami, mumasepa, mwomwo ngunamilweze vyosena vize ngwevwa kuli Tata.
16 Enu keshi yenu mwangusakwile amiko, oloze ami yami ngwamisakwile enu, kaha ngwamitongwele mangana ngwami mutwalengaho lika kwimanga mihako, kaha nawa mihako yenu yitwalengaho lika nakwilila, mangana cheshocho namulomba kuli Tata mulijina lyami amihanecho.+
17 “Ngunamilweze vyumevi mangana ngwami mulizangenga navakwenu.+
18 Kachi nge kaye kanamihungu, tachikizenu ngwenu, kavangilile kunguhunga ami, numba kamihunge enu.+
19 Kachi nge mwapwanga muvaka-kaye, kachi kaye kanamizange mwomwo munapu muvatu jako. Oloze mwomwo enu kamweshi muvaka-kayeko,+ kaha nawa ngunamisakula mukaye, shikaho kaye kanamihungu.+
20 Anukenunga mazu aze ngwamilwezele ami ngwami: Ndungo kahambakana kaka yenyiko. Kachi nge vananguyanjisa ami, kaha navakamiyanjisa nayenu nawa.+ Kachi nge vanalame mazu ami, kaha navakalama mazu enu nawa.
21 Oloze navakamilinga vyuma vyosenevi mwomwo yalijina lyami, mwomwo kavatachikiza Uze angutumineko.+
22 Kachi nge kangwejile nakuhanjika kuli vakikoko, kachi kaveshi nashiliko.+ Oloze jino kaveshi namwakulipekela hashili yavoko.+
23 Weshowo anguhunga ami ahunga naTata nawa.+
24 Kachi nge kangwazachile muli vakiko milimo yize kavazataho lyehi kumutu wekako, kachi kaveshi nashiliko.+ Oloze jino vanangumono, kaha vananguhungu hohamwe naTata nawa.
25 Oloze chinapu ngocho mangana mazu aze vasoneka muJishimbi javo atesemo, akwamba ngwavo: ‘Vanguhungile chakuzeneka mulonga.’+
26 Omu mwakeza muka-kumikafwa uze nangukamitumina kufuma kuli Tata, yikiko shipilitu yamuchano+ yize yeji kufumanga kuli Tata, ou ikiye uze mwakahana unjiho hali ami.+
27 Kaha enu nawa namukahana unjiho,+ mwomwo munapunga nayami hamwe kufuma vene kumaputukilo.
