Yowano 16:1-33
16 “Ngunahanjika vyumevi kuli enu kuchina namukahukana.
2 Vatu navakamihanganga mujisunangonga.+ Chikupu vene ola yili nakwiza omu vosena vaze navakamijiha+ navakashinganyeka ngwavo vanazate mulimo wajila kuli Kalunga.
3 Oloze navakamilinga ngocho mwomwo kavatachikiza Tata chipwe amiko.+
4 Chipwe ngocho, ngunamilweze vyumevi mangana omu nayikaheta ola navikasoloka, mukanuke ngwenu ami ngwamilwezelevyo lyehi.+
“Hakavanga kangwamilwezele vyumeviko, mwomwo ngunapunga nayenu hamwe.
5 Jino nguli nakuya kuli Uze angutumine,+ oloze naumwe wauchi hali enu nangwihula ngwenyi, ‘Uli nakuya kulihi?’
6 Oloze mwomwo ngunamilweze vyumevi shikaho michima yenu yinazale nachinyengo.+
7 Chipwe ngocho, nguli nakumilweza muchano ngwami, kuya chami nachiminganyalisa. Mwomwo kachi nge kangweshi kuyako, kaha muka-kumikafwa+ keshi kwiza kuli enuko. Oloze kachi nge nanguya, kaha nangukamutuma kuli enu.
8 Omu mwakeza ikiye, mwakahana unjiho wakukunyula kaye wakuvuluka shili, nawou wakuvuluka kwoloka, nawou nawa wakuvuluka kusopesa.
9 Chatete mwakavakunyula naunjiho wakuvuluka shili,+ mwomwo kaveshi nakungufwelelako,+
10 kaha mwakavakunyula naunjiho wakuvuluka kwoloka, mwomwo ami nguli nakuya kuli Tata, kaha kamweshi kungumona chekako,
11 kaha mwakavakunyula nawa naunjiho wakuvuluka kusopesa, mwomwo mwangana wakano kaye vanamusopesa lyehi.+
12 “Ami nguchili navyuma vyavivulu vyakuhanjika kuli enu, oloze oholili kamweshi kuhasa kumona omu vyalumbunukilako.
13 Oloze ikiye* omu mwakeza, yikiko shipilitu yamuchano,+ mwakamitwaminyina mwaya muchano wosena, mwomwo keshi kukahanjika mwaya vishinganyeka vyenyi iveneko, oloze vyeshovyo eji kwivwanga vikiko vene mwakahanjika, kaha nawa mwakamilweza vyuma vize navikasoloka kulutwe.+
14 Ou ikiye vene mwakangutohwesa ami,+ mwomwo mwakamilweza vyuma mwakevwa kuli ami.+
15 Vyuma vyaTata vyosena vyapwa vyami.+ Shikaho ngunahanjikila ngwami mwakamilweza vyuma mwakevwa kuli ami.
16 Namuhita katando kakandende, kaha kamweshi kungumona chekako,+ namukahita katando kakandende nawa, kaha namukangumona.”
17 Jino tumbaji twenyi vamwe valihanjikishile mwavomwavo ngwavo: “Uno natwale mulihi hakwamba ngwenyi, ‘Namuhita katando kakandende, kaha kamweshi kungumona chekako, namukahita katando kakandende nawa, kaha namukangumona,’ kaha nawa ngwenyi, ‘mwomwo nguli nakuya kuli Tata’?”
18 Kaha vapwile nakwamba ngwavo: “Uno natwale mulihi hakwamba ngwenyi, ‘namuhita katando kakandende’? Etu katwatachikijile vyuma ali nakuhanjikako.”
19 Jino Yesu atachikijile ngwenyi vasakile kumwihula, ngocho ambile kuli vakiko ngwenyi: “Uno muli nakulihwojola mwenumwenu hachuma kanechi, mwomwo ngunambe ngwami: ‘Namuhita katando kakandende, kaha kamweshi kungumona chekako, namukahita katando kakandende nawa, kaha namukangumona’ tahi?
20 Chamuchano vene nangwamba kuli enu ngwami, enu namukalila nakuteta miteto, oloze kaye nakakawahilila. Enu namukalyonyinga, oloze kulyonyinga chenu nachikalumuka kupwa kuwahilila.+
21 Pwevo nge ali nakusapuluka, eji kulyonyinganga, mwomwo ola yenyi yinahete lyehi. Oloze nge naseme lyehi mwanenyi, luyando lwenyi keshi kulwanuka chekako mwomwo yakuwahilila hakuwana nge naseme nakuneha mutu mukaye.
22 Shikaho nayenu nawa, oholili muli nakulyonyinga, oloze nangukamimona cheka, kaha michima yenu nayikawahilila.+ Kuwahilila chenu naumwe wauchi mwakamitambulacho.
23 Halikumbi lize enu kamweshi kukangwihula chihula numba chimweko. Chamuchano vene nangwamba kuli enu ngwami, kachi nge namukalomba chuma kuli Tata,+ mwakamihanacho mulijina lyami.+
24 Kufuma vene kunyima kamwalombaho lyehi chuma numba chimwe mulijina lyamiko. Lombenu jino, kaha namutambula, mangana muwahilile chikuma.
25 “Ngunahanjika vyumevi kuli enu navifwanyisa. Ola yili nakwiza omu kangweshi kukahanjika cheka navifwanyisa kuli enuko, oloze nangukamilweza hatoma vyuma vyakuvuluka Tata.
26 Halikumbi lize, namukamulomba Tata mulijina lyami. Hakwamba ngocho, kangweshi nakulumbununa ngwami nangukapwanga nakumilombela kuli Tatako.
27 Mwomwo ivene Tata amizanga, mwomwo munanguzangenga ami,+ kaha nawa munetavila ngwenu ami ngwejile mangana ngwimanyineko Kalunga.+
28 Ami ngwejile mangana ngwimanyineko Tata, kaha nguneza muno mukaye. Jino ngunakufuma muno mukaye nakuya kuli Tata.”+
29 Tumbaji twenyi vambile ngwavo: “Kwivwa! Uli nakuhanjika jino hatoma, kaweshi nakuhanjika navifwanyisako.
30 Tunatachikiza jino ngwetu, ove watachikiza vyuma vyosena, kaha kakwatela kupwa mutu atela kukwihula chekako. Ngocho tunetavila jino ngwetu ove wafumine kuli Kalunga.”
31 Yesu avakumbulwile ngwenyi: “Kumana oholili hakiko munetavila jino?
32 Ivwenu! Ola yili nakwiza, kaha yineza lyehi chikupu, omu navamimwanga nakuya mutu himutu kwimbo lyenyi, kaha namunguseza uka wami.+ Oloze kangweshi uka wamiko, mwomwo Tata ali nayami.+
33 Ngunahanjika vyumevi kuli enu mangana mupwenga nakuunda kuhichila muli ami.+ Muno mukaye namumona luyando, oloze likolezezenu! Ami ngunafungulula lyehi kaye.”+
Kwinyikila Chamwishi
^ Eli lizu “ikiye” lili muvesi 13 na 14 lili nakuvuluka ‘muka-kukafwa’ uze vanavuluka muvesi 7. Yesu azachishile eli lizu “muka-kukafwa” kwijiva nge mutu, oloze lyemanyinako shipilitu yajila, keshi mutuko.
