Yowano 17:1-26
17 Omu Yesu ahanjikile vyumevi, andwile meso enyi nakutala mwilu, kaha ambile ngwenyi: “Ove Tata, ola yinahete lyehi. Mutohwese mwanove, mangana mwanove naikiye akutohwese,+
2 ngana muze unamuhane lyehi wata hali vakwechi mijimba vosena,*+ mangana naikiye nawa ahane kuyoya chahaya myaka yosena+ kuli vosena vaze unamuhane.+
3 Echi chikiko kuyoya chahaya myaka yosena,+ kukutachikiza ove Kalunga umwe kaha wamuchano,+ nayou nawa watumine, Yesu Kulishitu.+
4 Ami ngunakutohwesa lyehi hamavu,+ hakuwana nge ngunakumisa lyehi mulimo wanguhanyine kuzata.+
5 Shikaho jino, ove Tata, ngutohwese ngupwenga kuli ove nakupwa naupahu uze ngwapwile nawo omu ngwapwilenga kuli ove shimbu kanda kaye kachipweko.+
6 “Ami ngunajimbula* lyehi lijina lyove kuvatu ava wanguhanyine kufuma mukaye.+ Vapwilenga vove, kaha wanguhanyinevo ami, kaha vanalame* mazu ove.
7 Shikaho vanatachikiza jino ngwavo vyuma vyosena vize wanguhanyine, vyafuma kuli ove,
8 mwomwo ngunavalweze mazu awa wangulwezele ove,+ kaha vanawetavila nakutachikiza chikupu ngwavo ami ngwejile mangana ngukwimanyineko,+ kaha vanetavila nawa ngwavo yove wangutumine.+
9 Ami nguli nakuvalombelako. Kangweshi nakulombela kayeko, oloze shina vaze kaha unanguhane, mwomwo vapwa vove.
10 Vyuma vyami vyosena vyapwa vyove, vyuma vyove nawa vyapwa vyami,+ kaha vanangutohwesa mukachi kavo.
11 “Ami kangweshi cheka mukayeko, oloze vakiko vali mukaye,+ kahami nguli nakwiza kuli ove. Ove Tata Wajila, valame+ mwomwo yalijina lyove eli unanguhane ami, mangana vapwenga umwe* nganomu etu twapwa umwe.*+
12 Omu ngunapunga navo, ngunavalamenga+ mwomwo yalijina lyove eli unanguhane ami. Kaha ngunavakinginga, ngocho naumwe wauchi hali vakiko vananongesa,+ shina uze kaha mwanakunonga,+ mangana visoneka vitesemo.+
13 Oloze oholili nguli nakwiza kuli ove, kaha nguli nakuhanjika vyumevi mukaye mangana vawahilile chikuma nganomu ngwawahilila ami.+
14 Ami ngunavalweze mazu ove, oloze kaye kanavahungu, mwomwo vakiko kaveshi vakukayeko,+ nganomu ngunazeneka ami nawa kupwa nguwakukaye.
15 “Ami kangweshi nakulomba ngwami uvafumise mukayeko, oloze ngwami uvalame mwomwo yayauze wakuhuka.+
16 Vakiko kaveshi vakukayeko,+ nganomu ngwazeneka ami kupwa nguwakukaye.+
17 Vajilike* namuchano,+ mazu ove apwa muchano.+
18 Nganomu wangutumine ami mukaye, nayami nawa ngunavatumu mukaye.+
19 Kaha nguli nakulilingisa kupwa wajila mwomwo yavakiko, mangana navakiko nawa vajile namuchano.
20 “Ami kangweshi nakulombela ava kahako, oloze navaze nawa vali nakungufwelela kuhichila mumazu avo,
21 mangana vosena vapwenga umwe,+ nganomu ove Tata walikata nayami, kahami nawa nayove,+ ngocho navakiko nawa valikate nayetu, mangana kaye ketavile ngwako yove wangutumine.
22 Ngunavahane upahu uze wanguhanyine ami, mangana vapwenga umwe, nganomu etu twapwa umwe.+
23 Ami ngwalikata navakiko kahove nawa walikata nayami, mangana valinunge hamwe, mangana kaye katachikize ngwako yove wangutumine, kaha nawa ngwako wavazanga nganomu wanguzanga ami.
24 Ove Tata, ngunasake ngwami ava unanguhane navakiko vapwenga nayami kuze nguli,+ mangana vamonenga upahu wami ou unanguhane, mwomwo wanguzangile shimbu kanda chihela chakaye vachale.+
25 Ove Tata wakwoloka, kaye kanahono chikupu kukutachikiza,+ oloze ami ngwakutachikiza,+ kaha navava nawa vanatachikiza ngwavo yove wangutumine.
26 Ami ngunalingisa lijina lyove valitachikize, kaha nangukalilingisa vakalitachikize nawa,+ mangana vazangenga vakwavo nganomu unanguzange ami, kahami nawa ngulikate navakiko.”+
Kwinyikila Chamwishi
^ Chipwe “hali vatu vosena.”
^ Chipwe “ngunambulula.”
^ Chipwe “vanononoka.”
^ Chipwe “twalinunga hamwe.”
^ Chipwe “valinunge hamwe.”
^ Chipwe “Vahandule; Valingise kupwa vajila.”
