Yowano 19:1-42
19 Jino Pilatu ambachile Yesu nakumuveta vikote.+
2 Kaha maswalale vavinjile muchama wamingonga nakumuvwikawo kumutwe. Vamuvwikile nawa chikuto chaungonyi,+
3 kaha vejilenga kuli ikiye nakwamba ngwavo: “Mwoyo wove,* ove Mwangana wavaYuleya!” Kaha nawa vapwilenga nakumuveta jimbanda kumeso.+
4 Jino Pilatu alovokele cheka kuweluka, kaha ambile kuli vakiko ngwenyi: “Ivwenu! Nangumulovola nakumuneha kuli enu mangana mutachikize ngwenu, ami kangwamuwanyine nakatengako.”+
5 Ngocho Yesu alovokele kuweluka, oku navwale muchama wamingonga nachikuto chaungonyi. Kaha Pilatu ambile kuli vakiko ngwenyi: “Talenu! Ou mutu!”
6 Oloze omu vapilishitu vavakulwane natupasu vamumwene, vatambakanyine ngwavo: “Vamupapalile hachitondo! Vamupapalile hachitondo!”+ Pilatu ambile kuli vakiko ngwenyi: “Mumbatenu enu vavene mumupapalile hachitondo, mwomwo ami kangwamuwanyine nakatengako.”+
7 VaYuleya vambile kuli ikiye ngwavo: “Etu twatwama nalushimbi, kaha kweseka nalushimbi kana, atela kufwa,+ mwomwo nalilingisa ivene kupwa mwanaKalunga.”+
8 Omu Pilatu evwile mazu vapwile nakuhanjika, evwile woma chikuma.
9 Ngocho engilile cheka muzuvo yanguvulu, kaha ehwile Yesu ngwenyi: “Wafuma kulihi?” Oloze Yesu kamukumbulwileko.+
10 Kaha Pilatu ambile kuli ikiye ngwenyi: “Kaute kuhanjika kuli ami tahi? Kawatachikijile ngwove ami ngukwechi ngolo jakukukasununa, kaha nawa ngukwechi ngolo jakukupapalila hachitondoko nyi?”
11 Yesu amukumbulwile ngwenyi: “Kaweshi kuhasa kupwa nangolo hali amiko, shina kuvanga vanakuhanejo kufuma mwilu. Shikaho mutu uze nangunehe kuli ove ali nashili yayinene.”
12 Ngocho Pilatu atondelenga jila yakumukasunwinamo, oloze vaYuleya vatambakanyine ngwavo: “Kachi nge mukasununa ou mutu, kaha kaweshi usepa lyaKesaleko. Weshowo mwalilingisa ivene kupwa mwangana, ali nakulikanga kuli* Kesale.”+
13 Shikaho Pilatu hakwivwa awa mazu, amulowele Yesu kuweluka, kaha atwamine hachitwamo chakusopela, hachihela vavuluka ngwavo, Chihela Chakwala Malolwa, oloze muchiHepeleu ngwavo Ngambata.
14 Eli lyapwile Likumbi lyaKulongesa Paseka,+ kaha hapwile kafwe haola yakusokesa 6.* Ngocho Pilatu ambile kuli vaYuleya ngwenyi: “Talenu! Mwangana wenu ou!”
15 Oloze vakiko vatambakanyine ngwavo: “Mujihe! Mujihe! Vamupapalile hachitondo!” Pilatu ambile kuli vakiko ngwenyi: “Ngwenu mwangana wenu ngumupapalile hachitondo?” Vapilishitu vavakulwane vakumbulwile ngwavo: “Etu katweshi namwangana wekako, shina Kesale kaha.”
16 Shikaho amuhanyine kuli vakiko mangana vamupapalile hachitondo.+
Ngocho Yesu apwile jino mumavoko avo.
17 Kaha alimbachilile ivene chitondo chakuyanjishila,* ayile kuchihela kuze vavuluka ngwavo, Chihela chaChikola+ chize vavuluka muchiHepeleu ngwavo Ngolongota.+
18 Kuze kukiko vamupapalilile hachitondo+ hamwe navatu veka vavali, ou kusali yimwe, ou kusali yikwavo, kaha ikiye apwile hakachi.+
19 Pilatu asonekele nawa mazu nakuwahaka hachitondo chakuyanjishila.* Mazu kana vawasonekele ngwavo: “Yesu WakuNazaleta Mwangana WavaYuleya.”+
20 VaYuleya vavavulu vatangilenga mazu kana, mwomwo kuchihela kuze vapapalilile Yesu hachitondo kwapwile kwakamwihi nanganda. Mazu kana vawasonekele muchiHepeleu, namuchiLatinyi, namuchiHelase.
21 Oloze vapilishitu vavakulwane vavaYuleya vambile kuli Pilatu ngwavo: “Kanda usoneka ngwove ‘Mwangana wavaYuleyako,’ oloze ngwove ou ambile ngwenyi, ‘Yami Mwangana WavaYuleya.’”
22 Pilatu ambile ngwenyi: “Evi ngunasoneka kunahu ngunavisoneka lyehi.”
23 Jino omu valingile maswalale vanapapalila lyehi Yesu hachitondo, vambachile uvwalo wenyi wahelu, vaupangile muvihanda viwana, liswalale hiliswalale ambachileho chihanda chenyi, kaha vambachile nawa nauvwalo wenyi wamukachi. Oloze uvwalo wamukachi kawapwile namungundoko,* mwomwo vautungile chakuzeneka mungundo kufuma kushingo mbwe nakwishi.
24 Ngocho valihanjikishile mwavomwavo ngwavo: “Kanda tuupulako, oloze tuzachisenu tutachikijilo tumone ou mwaumbata.”+ Echi chapwile ngocho, mangana chisoneka chitesemo, chakwamba ngwavo: “Valipangilile mwavomwavo uvwalo wami, kaha vazachishile tutachikijilo hakulipangila uvwalo wami.”+ Omu mukiko valingile maswalale.
25 Jino naye+ nandumbwanaye wapwevo, naMaliya pwevo lyaKelopa, naMaliya Mangatala+ vemanyine kwakamwihi nachitondo chaYesu chakuyanjishila.*
26 Ngocho omu Yesu amwene naye, nakambaji kenyi uze azangilenga+ vanemana hakamwihi, ambile kuli naye ngwenyi: “Ove pwevo, tala! Mwanove ou!”
27 Kufumaho ambile kuli uze kambaji ngwenyi: “Tala! Noko ou!” Kaha kufuma haola vene yize, uze kambaji ambachile Maliya nakuya nenyi kuzuvo yenyi.
28 Kufumaho, omu Yesu atachikijile ngwenyi vyuma vyosena vinalingiwa mangana visoneka vitesemo, ambile ngwenyi: “Ngunevu lipwila.”+
29 Kuze apwile vatumbikileko mulondo wakuzala navinyo vingangamina. Ngocho vahakile chiponja* chakuvombeka navinyo vingangamina kuchisachi chahusope,* kaha vachihakile kukanwa kenyi.+
30 Jino omu alingile Yesu hanatambula lyehi vize vinyo vingangamina, ambile ngwenyi: “Vyuma vyosena vinatesamo jino.”+ Kahomu azewile mutwe wenyi, echele shipilitu yenyi.*+
31 Jino hakuwana nge lyapwile Likumbi lyaKulongesa Vyuma,+ kaha nawa kavasakile mijimba yipwenga lika havitondo vyakuyanjishila+ swi nahaSambatako (mwomwo lize likumbi lyaSambata lyapwile lyalilemu),+ ngocho vaYuleya valombele Pilatu mangana mahinji avo vawahokole nakufumisa mijimba yavo havitondo.
32 Shikaho maswalale vejile, vahokwele mahinji amutu uze wakulivanga nawawa ayauze mukwavo vapapalilile havitondo hamwe naikiye.
33 Oloze hakuheta hali Yesu, vamumwene nafu lyehi, ngocho kavahokwele mahinji enyiko.
34 Jino umwe hali vaze maswalale amutuvile likunga kuluhachi,+ kaha hahaze vene kwalovokele manyinga nameya.
35 Ou amwene vyumevi ikiye nahane unjiho, kaha unjiho wenyi unapu wamuchano. Mutu kana atachikiza ngwenyi vyuma eji kuhanjikanga vyamuchano, mangana nayenu nawa mwitavile.+
36 Vyuma kana vyasolokele mangana chisoneka chitesemo chakwamba ngwavo: “Kaveshi kukahokola* chifuwa chenyi numba chimweko.”+
37 Kaha nawa chisoneka cheka chamba ngwacho: “Navakatala kuli uze vatuvile.”+
38 Jino omu vyakumine vyumevi, Yosefwe wakuAlimateya uze apwilenga kambaji kaYesu oloze kalisolwele hatoma hakwivwa woma vaYuleya,+ alombele Pilatu mangana amwitavise afumise mujimba waYesu hachitondo. Kaha Pilatu amuhanyine lisesa. Ngocho ejile, afumishileho mujimba wenyi.+
39 Nyikotemu,+ uze hakavanga ejile kuli Yesu naufuku, naikiye ejile, anehele mila yakufutula namalowe,* pezu yawo yahetele kafwe jipaundu 100.*+
40 Ngocho vambachile mujimba waYesu, vaujingilile hamahina hohamwe navyuma vyalivumba lyamwaza,+ kweseka nachisemwa chavaYuleya chakufunda vafu.
41 Jino kuchihela kuze vamupapalilile hachitondo kwapwile milemba, kaha mumilemba kana mwapwile chimbumbe* chachihya,+ muze kanda vasavalikengamo lyehi mufu.
42 Jino hakuwana nge lyapwile Likumbi lyaKulongesa+ Vyuma lyavaYuleya, kaha nawa chimbumbe kana chapwile hakamwihi, ngocho vasavalikile Yesu mwamuze vene.
Kwinyikila Chamwishi
^ Chipwe “Vulye.”
^ Chipwe “ali nakufumbukila.”
^ Kafwe 12:00 yamusana.
^ Tala Mukana waMazu.
^ Tala Mukana waMazu.
^ Chipwe “namunukoko.”
^ Tala Mukana waMazu.
^ Echi hichuma chachivwovu chakufwana nge mupelo.
^ Tala Mukana waMazu.
^ Chipwe “afwile.”
^ Chipwe “kukachika.”
^ Chipwe pamo, “anehele mukuta wamila namalowe.”
^ Kulumbununa, paundu yavaLoma. Tala Chihande B14.
^ Chipwe “chimbumbe chakwanukila.”
