Yowano 2:1-25
2 Jino halikumbi lyamuchitatu kwapwile chifupawenga muKana yakuNgalileya, kaha nanaye yaYesu kwapwile.
2 Yesu natumbaji twenyi navakiko nawa vavalanyine kuchifupawenga kanechi.
3 Jino omu vyakumine vinyo, naye yaYesu ambile kuli ikiye ngwenyi: “Kaveshi navinyoko.”
4 Oloze Yesu ambile kuli ikiye ngwenyi: “Ove pwevo, mwomwo ikaze ami nayove natulizakamina hachuma kana?* Ola yami kanda yichihete.”
5 Kaha naye ambile kuli vaze vapwile nakuzata ngwenyi: “Lingenu vyeshovyo mwamilweza.”
6 Jino kuze kwapwile milondo yamalolwa 6 yameya yize vahakileko kweseka najishimbi javaYuleya jakulitomesa,+ kaha mulondo himulondo wazalilenga navyesekelo vyameya* vivali chipwe vitatu.
7 Yesu ambile kuli vakiko ngwenyi: “Zalisenu eyi milondo nameya.” Ngocho vayizalishile nahamivumbo.
8 Kaha ambile kuli vakiko ngwenyi: “Switenumo jino mutwale kuli muka-kutwaminyina chiwanyino.” Kaha vatwalile.
9 Jino uze muka-kutwaminyina chiwanyino omu amakilile aze meya valumwine kupwa vinyo, ikiye katachikijile oku vyafumineko, (oloze vaka-kuzata vaze vaswichile aze meya vatachikijile), ngocho uze muka-kutwaminyina chiwanyino asanyikile uze mwenyamwenga
10 nakwamba kuli ikiye ngwenyi: “Vatu vosena veji kuvangilanga kulovola vinyo vyamwenemwene, kahomu navalinga hivananu nakupenda, numbanyi valovole vyavisamu. Oloze ove unalame vinyo vyamwenemwene kuheta noholili.”
11 Echi chinjikizo alingile Yesu muKana yakuNgalileya chikiko chapwile chakuputukilako kuvinjikizo vyenyi, kaha asolwele upahu wenyi,+ ngocho tumbaji twenyi vamufwelelele.
12 Omu vyakumine vyumevi, ikiye nanaye navandumbwenyi+ natumbaji twenyi vayile kuKapelenau,+ oloze kavatwamineko makumbi amavuluko.
13 Jino Paseka+ yavaYuleya yapwile kwakamwihi, kaha Yesu ayile kuYelusalema.
14 Kaha mutembele awanyinemo vaze valanjishilenga vangombe, namikoko, namayembe+ navaka-kutambasana jimbongo vanatwame muvitwamo vyavo.
15 Ngocho anyotele chikote chamikole, kaha ahangile vosena vaze vapwile namikoko navangombe mutembele, kaha amwangile jimbongo jachichele javaka-kutambasana nakukatumuna jimesa javo.+
16 Ambile kuli vaze valanjishilenga mayembe ngwenyi: “Fumisenu vyumevi muno. Litwaminenu kulingisa zuvo yaTata kupwa zuvo yakusekasanyina.”*+
17 Tumbaji twenyi vanukile muze vasoneka ngwavo: “Twima nguli nayo hazuvo yove nayingulya.”+
18 Shikaho vaYuleya vambile kuli ikiye ngwavo: “Chinjikizo muka nautulweza+ chakusolola ngwove uli nangolo jakulinga vyuma kanevi?”
19 Yesu avakumbulwile ngwenyi: “Puzulenu eyi tembele, kaha nanguyitunga cheka mumakumbi atatu.”+
20 Jino vaYuleya vambile ngwavo: “Tembele yino vayitungile hamyaka 46, kahove uyitunge mumakumbi atatu kaha?”
21 Oloze ikiye apwile nakuvuluka tembele yamujimba wenyi.+
22 Kahomu alingile hivanamusangula lyehi kuvafu, tumbaji twenyi vanukile ngwavo omu mukiko apwilenga nakuhanjika.+ Kaha vetavilile visoneka namazu aze ahanjikile Yesu.
23 Oloze omu apwilenga muYelusalema kuchiwanyino chaPaseka, vatu vavavulu vafwelelele lijina lyenyi omu vamwene vinjikizo vize alingilenga.
24 Oloze Yesu kavafweleleleko, mwomwo avatachikijile vosena,
25 kaha nawa kasakiwile mutu wakumulweza unjiho womu vapwa vatuko, mwomwo atachikijile vyuma vyapwile mumichima yavatu.+
Kwinyikila Chamwishi
^ Hela., “Ove pwevo, ikaze kuli ove nayami?” Eyi yapwa hanjikiso yakukana. Eyi hanjikiso “ove pwevo” kayapwa yakasautuko.
^ Chesekelo kana chapwile chipimo chambate chakuteseka mujilita 22. Tala Chihande B14.
^ Chipwe “kupwa chisakano.”
