Yowano 21:1-25
21 Kufumaho Yesu alisolwele cheka kuli tumbaji twenyi kuKalungalwiji waChivelya. Kaha kulisolola chenyi chapwile ngana.
2 Shimona Petulu, naTomase (uze vavulukilenga ngwavo Pasa),+ naNatanyele+ wakuKana yakuNgalileya, navana vaZevete,+ natumbaji twenyi vakwavo vavali vosena vapwile hamwe.
3 Jino Shimona Petulu ambile kuli vakiko ngwenyi: “Ami nguli nakuya nakuta vaishi.” Vaze vakwavo vambile kuli ikiye ngwavo: “Nayetu natuya nayove.” Ngocho vayile, vengilile muwato, oloze ufuku uze kavajihile ishi numba umweko.+
4 Kahomu kwayilenga nakucha, Yesu emanyine kungenge, oloze tumbaji twenyi kavatachikijile ngwavo ikiye Yesuko.+
5 Jino Yesu ambile kuli vakiko ngwenyi: “Enu vana vami, muliko navyakulya vimwe* tahi?” Vakiko vamukumbulwile ngwavo: “Nduma.”
6 Kaha ambile kuli vakiko ngwenyi: “Fuchilenu lyoji kusali yawato kuchilyo, kaha namujiha vaishi.” Ngocho vafuchile lyoji, kaha kavahashile kulikokako mwomwo yakuvula chavaishi.+
7 Ngocho kambaji uze vazangilenga kuli Yesu+ ambile kuli Petulu ngwenyi: “Uze hiMwata!” Jino Shimona Petulu hakwivwa ngwenyi uze apwile Mwata, avwalile* uvwalo wenyi wahelu, mwomwo apwile uselesele,* kaha alimbilile hakalungalwiji.
8 Oloze tumbaji vakwavo vejile muwato waundende oku vali nakukoka lyoji lyavaishi, mwomwo kavapwile kwakusuku natundako, vapwile kafwe jimita 90* kaha.
9 Omu vakandukile kutunda, vamwene kakahya, vanahakeho vaishi nambolo.
10 Yesu ambile kuli vakiko ngwenyi: “Nehenuko vaishi vamwe ava munajihi oholili.”
11 Ngocho Shimona Petulu engilile muwato, akokelele kutunda lize lyoji lyazalile navaishi vavanene. Vaze vaishi vapwile 153. Numba tuhu vavulile chikuma, oloze lize lyoji kalyapulikileko.
12 Yesu ambile kuli vakiko ngwenyi: “Twayenu mulyaule.” Naumwe wauchi hali tumbaji twenyi ahamukile kumwihula ngwenyi: “Ove yove iya?” mwomwo vatachikijile ngwavo ikiye vene Mwata.
13 Yesu anonele yize mbolo nakuvahana, navaze vaishi nawa.
14 Echi chikiko kulisolola chamuchitatu+ alisolwele Yesu kuli tumbaji twenyi kufuma halwola luze asangukile kuvafu.
15 Jino omu valingile hivanamanyisa lyehi kulyaula, Yesu ambile kuli Shimona Petulu ngwenyi: “Ove Shimona mwanaYowano, kutala wanguzanga kuhambakana ava tahi?” Ikiye amukumbulwile ngwenyi: “Eyo ove Mwata, ove watachikiza ngwove ngwakuzanga.” Yesu ambile kuli ikiye ngwenyi: “Lisanga mikoko jami vavandende.”+
16 Yesu ambile cheka kuli ikiye kamuchivali ngwenyi: “Ove Shimona mwanaYowano, kutala wanguzanga tahi?” Ikiye amukumbulwile ngwenyi: “Eyo ove Mwata, ove watachikiza ngwove ngwakuzanga.” Yesu ambile kuli ikiye ngwenyi: “Funganga mikoko jami vavandende.”+
17 Yesu ambile kuli ikiye kamuchitatu ngwenyi: “Ove Shimona mwanaYowano, kutala wanguzanga tahi?” Petulu anyengetelele mwomwo Yesu ambile kuli ikiye kamuchitatu ngwenyi: “Kutala wanguzanga tahi?” Ngocho Petulu amukumbulwile ngwenyi: “Ove Mwata, ove watachikiza vyuma vyosena. Ove watachikiza ngwove, ngwakuzanga.” Yesu ambile kuli ikiye ngwenyi: “Lisanga mikoko jami vavandende.+
18 Chamuchano vene nangwamba kuli ove ngwami, omu wapwilenga ukanyike, walivwikilenga ove ivene, watambwojokelenga kweshokwo wasakilenga. Oloze omu naukashinakajiwa, naukolola mavoko ove, kaha mutu weka ikiye mwakakuvwika nakukutwala kuze kawasakileko.”
19 Ahanjikile ngocho hakusolola munachikapwa kufwa chaPetulu chize mwakatohweselaho Kalunga. Jino omu akumishile kuhanjika ngocho, ambile kuli ikiye ngwenyi: “Ngukavangizenga lika.”+
20 Petulu alumukile, kaha amwene kambaji uze vazangilenga kuli Yesu+ ali nakuvakava. Ou ikiye kambaji uze azeukilile hatulo yaYesu omu vapwile kukulya chachingoloshi, uze nawa ambile ngwenyi: “Ove Mwata, iyaze venyowo mwasaka kukusolola?”
21 Ngocho omu Petulu amumwene, ambile kuli Yesu ngwenyi: “Ove Mwata, nyi ou nawa ngachilihi?”
22 Yesu ambile kuli ikiye ngwenyi: “Kachi nge ngunasake ngwami atwamenga palanga nomu nangukeza, kaha ukalu wove uli halihi? Ove ngukavangizenga lika.”
23 Ngocho mazu awa atanjile muli vandumbwetu ngwavo, kambaji kana keshi kukafwako. Oloze Yesu kahanjikile kuli ikiye ngwenyi, keshi kukafwako nduma, oloze ambile ngwenyi: “Kachi nge ngunasake ngwami atwamenga palanga nomu nangukeza, kaha ukalu wove uli halihi?”
24 Ou ikiye kambaji+ nahane unjiho wavyumevi, ikiye asonekele nawa vyumevi, kaha tunatachikiza ngwetu unjiho wenyi unapu wamuchano.
25 Kuli nawa vyuma vyeka vyavivulu vize alingilenga Yesu, kaha kachi nge vavisonekele vyosena munona munona, ngunafwelela kaye kachi kakeshi nomu mwakulamina mikanda yakuvungako.+
Kwinyikila Chamwishi
^ Chipwe “muliko navaishi vamwe.”
^ Chipwe “mwomwo kavwalile kanawako.”
^ Chipwe “alijichikile.”
^ Hela., “kafwe jikuvite 200.” Tala Chihande B14.
