Yowano 5:1-47
5 Omu vyakumine vyumevi, kwapwile chiwanyino+ chavaYuleya, kaha Yesu ayile kuYelusalema.
2 Jino muYelusalema, kuChikolo chaMikoko+ kwatwama chijiva vavuluka muchiHepeleu ngwavo, Mbeteseta, chize chatwama najisenge jitanu.
3 Mujisenge kana mwasavalilenga vatu vavavulu, vaka-kuviza, natupuputa, navitonji navaka-kusoseka mahinji namavoko.
4 *——
5 Jino muze mwapwile lunga umwe uze avijile hamyaka 38.
6 Omu Yesu amwene ou lunga nasavala, nakutachikiza nawa ngwenyi navijinga hatando yayisuku, amwihwile ngwenyi: “Uli nakusaka ulikangule tahi?”+
7 Uze muka-kuviza amukumbulwile ngwenyi: “Ove Mwata, ami kangweshi namutu wakungwingisa muchijiva nge meya anavundukako. Omu nangulinga ngwami nguyengamo, kaha mukwetu weka himwalivanga kushikumukamo.”
8 Yesu ambile kuli ikiye ngwenyi: “Katuka, mbata kahela kove, utambuke.”+
9 Hahaze vene uze lunga alikangwile, kaha ambachile kahela kenyi nakuputuka kutambuka.
Likumbi kana lyapwile lyaSambata.
10 Shikaho vaFwaliseu vambile kuli uze lunga vokile ngwavo: “Lino hilikumbi lyaSambata, kaha kavachitavisa kumbata kahela koveko.”+
11 Oloze ikiye avakumbulwile ngwenyi: “Ou nanguhindula ikiye angulwezanga ngwenyi, ‘Mbata kahela kove, utambuke.’”
12 Kaha vamwihwile ngwavo: “Mutu muka vene owo akulwezanga ngwenyi, ‘Mbata kahela, utambuke’?”
13 Oloze uze vahindwile katachikijile mutu kanako, mwomwo Yesu engilile halizavu lyapwile kuze.
14 Kufumaho Yesu awanyine cheka uze mutu mutembele, kaha ambile kuli ikiye ngwenyi: “Tala, unalikangula jino. Kanda ukalinga shili chekako, kuchina chuma chachipi chakuhambakana hali echi nachikeza kakusolokela.”
15 Uze mutu ayile jino nakulweza vaYuleya ngwenyi Yesu ikiye amuhindulanga.
16 Shikaho vaYuleya vayanjishilenga Yesu, mwomwo alingilenga vyumevi haSambata.
17 Oloze Yesu avakumbulwile ngwenyi: “Tata achili nakuzata lika nakulelo lino, kaha nayami nawa chinguzata lika.”+
18 Shikaho vaYuleya vasakilenga chikuma ngwavo vamujihe, mwomwo kapwile nakujilulula Sambata kahako, oloze apwilenga nawa nakuvuluka Kalunga ngwenyi ikiye Ise,+ nakulihaka haseteko yimwe naKalunga.+
19 Shikaho Yesu ambile kuli vakiko ngwenyi: “Chamuchano vene nangwamba kuli enu ngwami, Mwana keshi kuhasa kulilingila tuhu chumako, shina ocho kaha mwamona Ise ali nakulinga.+ Mwomwo vyeshovyo vyuma eji kulinganga Ikiye, vikiko vene eji kulinganga naMwana nawa.
20 Mwomwo Ise azanga Mwana,+ ngocho eji kumulwezanga vyuma vyosena eji kulinganga ivene, kaha mwakamulweza nawa milimo yakuhambakana hali eyi, mangana enu mukalikomokele.+
21 Mwomwo nganomu Ise eji kusangulanga vafu nakuvayoyesa,+ ngocho naMwana nawa eji kuyoyesanga weshowo nasake kuyoyesa.+
22 Mwomwo Ise keshi kusopesa mutu numba umweko, oloze ahana ngolo josena jakusopesa kuli Mwana,+
23 mangana vatu vosena vavumbikenga Mwana nganomu vavumbika Ise. Weshowo azeneka kuvumbika Mwana keshi kuvumbika naIse uze amutumineko.+
24 Chamuchano vene nangwamba kuli enu ngwami, weshowo mwevwa mazu ami nakwitavila Uze angutumine ali nakuyoya chahaya myaka yosena,+ kaha kaveshi kumusopesako, oloze nafumu lyehi kukufwa nakuya kukuyoya.+
25 “Chamuchano vene nangwamba kuli enu ngwami, ola yili nakwiza, kaha yikiko vene yino, omu vafu navakevwa lizu lyaMwanaKalunga, kaha vaze vanevuko navayoya.
26 Mwomwo nganomu Ise atwama nakuyoya muli ivene,*+ ngocho nalingisa nawa naMwana apwenga nakuyoya muli ivene.+
27 Kaha namuhane ngolo jakusopesa,+ mwomwo apwa Mwanamutu.+
28 Kanda kulikomokela hali echiko, mwomwo ola yili nakwiza omu vosena vaze vali muvimbumbe* navakevwa lizu lyenyi+
29 nakulovokamo, vaze valingile vyuma vyamwaza navakasangukila kukuyoya, kaha vaze valingile vyuma vyaunyengwe navakasangukila kukuvasopesa.+
30 Ami kangweshi kuhasa kulilingila tuhu chumako. Ngweji kusopesanga kweseka navyuma ngweji kwivwanga. Kaha kusopesa ngweji kusopesanga ami chapwa chakwoloka,+ mwomwo kangwasaka kulinga mwaya muchima wamiko, shina mwaya muchima wayauze angutumine.+
31 “Kachi nge nanguhana unjiho hali ami ivene, kaha unjiho wami kaweshi wamuchanoko.+
32 Kwali weka uze eji kuhananga unjiho hali ami, kaha ngunatachikiza ngwami unjiho eji kuhananga hali ami unapu wamuchano.+
33 Enu munatumu vatu kuli Yowano, kaha ikiye nahane unjiho wamuchano hali ami.+
34 Ami kangweshi kwitavila unjiho wakufuma kumutuko, oloze nguli nakuhanjika vyumevi mangana vamilwile.
35 Mutu kana apwile linongo lize lyakwachile kakahya nakumunyika, kaha enu mwasakile kuwahilila chikuma muchehya chenyi hakatando kakandende.+
36 Oloze ami nguli naunjiho wakuhambakana uze waYowano, mwomwo milimo yize anguhanyine Tata ngwenyi nguyitesemo, eyi milimo nguli nakuzata, yili nakuhana unjiho hali ami ngwayo, Tata ikiye angutumine.+
37 Kaha Tata uze angutumine ikiye nahane unjiho hali ami.+ Enu kanda muchivwengaho lyehi lizu lyenyi, chipwe kumumona omu apwako,+
38 kaha mazu enyi kawatwama muli enuko, mwomwo enu kamwetavila uze vatumine kuli Kalungako.
39 “Enu muli nakutalatala muVisoneka,+ mwomwo muli nakushinganyeka ngwenu namukapwa nakuyoya chahaya myaka yosena kuhichila muvisoneka kana. Kaha evi visoneka vikiko vene vyahana unjiho hali ami.+
40 Oloze enu kamute kwiza kuli ami+ mangana mupwenga nakuyoya.
41 Ami kangweshi kwitavila kungutohwesa kuli vatuko,
42 oloze ngunatachikiza kanawa ngwami enu kamwazanga Kalungako.
43 Ami nguneza mulijina lyaTata, oloze kamute kungutambula. Kachi nge kwezanga weka mulijina lyenyi ivene, kachi munamutambula.
44 Namuhasa ngachilihi kwitava okunyi enu muli nakulitohwesa mwenumwenu, kaha nawa kamweshi nakusaka kumitohwesa kuli Kalungako?+
45 Kanda namushinganyeka ngwenu nangukamihana mulonga kumeso aTatako, oloze kwali uze eji kumihananga milonga, ikiye Mose+ uze vene mwafwelela enu.
46 Chikupu vene nge mwetavilile Mose, kachi namungwitavila nayami nawa, mwomwo Mose asonekele vyayami.+
47 Oloze nge kamwetavilile mazu asonekeleko, kaha namuhasa ngachilihi kwitavila mazu ami?”
Kwinyikila Chamwishi
^ Tala Chihande A3.
^ Chipwe “nganomu muli Ise mwatwama wana wakuyoya.”
^ Chipwe “muvimbumbe vyakwanukila.”
