Yowele 3:1-21
3 “Hamakumbi aze, nahalwola luze,Omu nangukakindulwisa vatu vamuYuta namuYelusalema vaze vali muufunge,+
2 Nangukakungulwila vaka-mafuchi vosena hamwe,Kaha nangukavaneha muChinema* chaYehoshafwate.*Nangukavasopesela kuze+Hali vatu jami vaIsalele vaze vapwa uswana wami,Mwomwo vamwangilile vatu jami kumafuchi eka,Kaha valipangilile lifuchi lyami.+
3 Vazachishile tutachikijilo havatu jami.+Vambachilenga vanyike vamalunga nakuvatambasana namapwevo vaka-ujila.Vatambasanyinenga nawa vanyike vamapwevo navinyo mangana vanwenga.
4 Ove Tule, nayove Shitone, nayenu jingalila jamuFwilishite josena,Mulonga muka ngunamivulumuna?Uno muli nakungushishishilamo tahi?Kachi nge muli nakungushishishilamo,Nayami nangwanguhwisa kumishishishilamo.+
5 Munambate palata yami naulu wami,+Kaha vikumba vyami vyamwaza munavitwale mujitembele jenu.
6 Munalanjisa nawa vatu vamuYuta namuYelusalema kuli vaHelase,+Mangana muvatwale kwakusuku nangalila yavo.
7 Shikaho nanguvakindulwisa kufuma kuchihela kuze mwavalanjishile,+Kaha nangumishishishilamo havyumevi mwalingile.
8 Nangukalanjisa vana venu vamalunga navava vamapwevo kuvatu vamuYuta,+Kaha vakiko nawa navakavalanjisa kumalunga vakuSheva, kulifuchi lyakwakusuku.Mwomwo Yehova nahanjikamo lyehi.
9 Vilikenu vyumevi muli vaka-mafuchi ngwenu:+‘Liwahisenu* muyenga kujita, sangumunenu malunga vangolo.Maswalale vosena vayenga nakulwa jita.+
10 Matemo enu akulimisa afulululenu apwenga jipoko jamikwale, kaha jipoko jenu jakunongesa kumitondo jifulululenu jipwenga makunga.Mutu wakuhehela ambenga ngwenyi: “Nguli nangolo.”
11 Enu vaka-mafuchi vakumitamba yosena, kungulukenu, twayenu mulikafwe navakwenu.’”+Ove Yehova, twala vindume jove* kuchihela chize.
12 “Vaka-mafuchi vakatuke vayenga kuChinema* chaYehoshafwate,Mwomwo nangukatwama nakusopesa vaka-mafuchi vakumitamba yosena kuze.+
13 Putukenu kwaha nachekeshi, mwomwo jimbuto jinahi lyehi.Twayenu mulyatangile, mwomwo chikamwino chinazale.+Muze mwakulamina vinyo nawa munazalilila, mwomwo upi wavo unatoho.
14 Muchinema* chakusopesela muli mayongomena namayongomena,Mwomwo likumbi lyaYehova kalinwomu lizenga muchinema* chakusopesela.+
15 Likumbi nakakweji navikelava wi,Vatanganyika kaveshi kukamunyikako.
16 Yehova mwakatahwoka muZeyone,Mwakahanjika nalizu lyakukanguka muYelusalema.Melu namavu navikalinyika.Oloze Yehova mwakapwa uchinyino wavatu jenyi,+Mwakapwa chihela chakukola chavaIsalele.
17 Kaha namukatachikiza ngwenu ami yami Yehova Kalunga kenu uze atwama muZeyone, pili yami yajila.+Yelusalema nayikapwa chihela chajila,+Kaha vatu veka* kaveshi kukahitamo chekako.+
18 Halikumbi kana kujipili jajinene nakukasotoka vinyo viyema,+Kujipili jajindende nawa nakukahita mavele,Kaha tulwiji vamuYuta vosena navakapwa nameya.Muzuvo yaYehova namukatuvika kaselwoke,+Kaha mwakatwala meya muChinema* chaMitondo yaMikesha.
19 Oloze Ejipitu nayikasala ngundu,+Etome nayikiko nayikapwa likundu,+Mwomwo yavyuma vyavipi vanalinginga kuvatu vamuYuta,+Muze vanamwangilanga manyinga avatu vakuzeneka mulonga.+
20 Oloze muYuta namukatwamanga lika vatu,MuYelusalema nawa namukatwamanga lika vatu hachisemunwino hichisemunwino.+
21 Vatu* vaze vapwile namulonga nangukavamona kupwa vakuzeneka mulonga.+Kaha Yehova mwakatwamanga muZeyone.”+
Kwinyikila Chamwishi
^ Chipwe “muChana.”
^ Ulumbunwiso, “Yehova Ikiye Muka-kuyula.”
^ Hepe., “Lijilikenu.”
^ Chipwe “twala maswalale jove.”
^ Chipwe “kuChana.”
^ Chipwe “Muchana.”
^ Chipwe “muchana.”
^ Chipwe “Kaha vaka-mafuchi eka.”
^ Chipwe “muMwanakalwiji.”
^ Hepe., “Manyinga.”
