Zefwanyiya 1:1-18
1 Awa akiko mazu aYehova aze ejile kuli Zefwanyiya* mwanaKushi, Kushi mwanaNgetaliya, Ngetaliya mwanaAmaliya, Amaliya mwanaHezekiya mumakumbi aYoshiya+ mwanaAmone+ mwangana wavaYuta:
2 Yehova nambe ngwenyi: “Nangukanongesa vyuma vyosena hamavu.”+
3 Yehova nambe ngwenyi: “Nangukanongesa vatu, natunyama,Natujila vakutuka mwilu, navaishi vamukalungalwiji.+Nangukafumisaho vimbunji vyakulimbwisa*+ navaka-kuhuka hamwe.Nangukafumisa vatu hamavu.
4 Nangukolola livoko lyami hali vaYuta,Nahali vosena vaze vatwama muYelusalema.Kaha nangukanongesa cheshocho chuma chakupandama kuli Mbale+ chinasaleho,Nangukajimbangana majina avapilishitu vakalunga wavaka-mafuchi eka navapilishitu+ veka hamwe.
5 Nangukanongesa vaze veji kulifukulanga kuliyongomena lyamwilu+ hamilungu yajizuvo,Navaze veji kulifukulanga nakulishinga kupwa vakushishika kuli Yehova+Oku vanalishingi nawa kupwa vakushishika kuli Malakame.+
6 Nangukanongesa vaze vanalitwamina kukavangiza Yehova,+Navaze vanakane kumutonda Yehova chipwe kumwihula.”+
7 Holenu kulu kumeso aMwata Wakulitulaho Yehova, mwomwo likumbi lyaYehova lili hakamwihi.+Yehova nalongesa lyehi chimuna wakuvatula, najilika lyehi ava nasanyika.
8 “Halikumbi lize nangukawahisa ami Yehova chimuna wakuvatula, nangukazangamisa vilolo,Vana vamwangana,+ navosena vaze vanavwale uvwalo wavaka-mafuchi eka.
9 Halikumbi lize, nangukazangamisa vosena vaze veji kunyinanga hautenda,*Vaze veji kuzalisanga muzuvo yakaka yavo naulyanyi nakutangisa.”
10 Yehova nambe ngwenyi: “Halikumbi lize,KuChikolo chaVaishi+ nakukapwa vyema vyamiteto yavatu,Mundandanda yayihya yamunganda namukapwa kulila,+Kaha kujipili nakukapwa vyema vyakunongesa chachinene.
11 Enu mwatwama kuMakateshe,* lilenu jimbimbi,Mwomwo vaka-kusekasana* vosena vanavanongesa lyehi.*Vosena vaze veji kupezalisanga palata vanavanongesa.
12 Halwola luze, nangukahehwojola muYelusalema namanongo,Kaha nangukazangamisa vatu vakanengauli* vaze veji kulyambanga mumichima yavo ngwavo,‘Yehova keshi kukalinga mwamwazako chipwe kulinga mwamupiko.’+
13 Luheto lwavo navakalupupa, jizuvo javo navakajenyeka.+Navakatunga jizuvo, oloze kaveshi kukatwamamoko.Navakalimanga mande amivinyo, oloze kaveshi kukanwa vinyo vyayoko.+
14 Likumbi lyaYehova lyalinene lili hakamwihi.+Lili hakamwihi, kaha lili nakwiza washiwashi.*+Vyema vyalikumbi lyaYehova navikazuzwisa vatu.+Halikumbi lize, vindume vangolo navakalila.+
15 Likumbi lize linapu likumbi lyautenu waKalunga,+Likumbi lyaluyando navihuli,+Likumbi lyakwenyeka nakunongesa,Likumbi lyamilima, lyakwilava wi,+Likumbi lyamavwi, lyamilima wi,+
16 Likumbi lyajineta, lyaluvila lwajita+Hajinganda jakukingiwa nahatuposhi twatusuku twamujimbango.+
17 Nangukaneha vihuli hali vatu,Kaha navakatambukanga nge tupuputa,+Mwomwo vanalingi shili kuli ami Yehova.+Manyinga avo navakawamwanga nge lukungu,Kaha nyama* yavo nawa nge tuji.+
18 Palata yavo chipwe ulu wavo kavyeshi kukavapululula halikumbi lyautenu waYehovako.+Matoto enyi anapu nge kakahya kaze nakakocha hamavu hosena,+Mwomwo vatu vahamavu vosena mwakavanongesa mwamupi.”+
Kwinyikila Chamwishi
^ Ulumbunwiso, “Yehova Nasweke (Nalame).”
^ Pamo vyuma vyakupandama kukulemesa makombelo.
^ Pamo hautenda walitanda lyamwangana.
^ Hepe., “vanavaholesa kulu.”
^ Pamo chihela chimwe chamuYelusalema chakwakamwihi naChikolo chaVaishi.
^ Chipwe “vaka-kusepa.”
^ Hepe., “vatu vanatwame havisele vyavo,” kwijiva nge vali muze mwakukwachila vinyo.
^ Chipwe “lili nakwanguhwa.”
^ Hepe., “Kaha mijingwa.”
