Zekaliya 1:1-21
1 Mukakweji wakusokesa 8, mumwaka wamuchivali wachiyulo chaNdaliu,+ Yehova ahanjikile kuli kapolofweto Zekaliya*+ mwanaMbelekiya, Mbelekiya mwanaIto ngwenyi:
2 “Yehova apihililile chikuma namasenu.+
3 “Hanjika kuli vakiko ngwove, ‘Yehova wamayongomena nahanjika ngwenyi: “‘Kindulukenu kuli ami.’ Omu mukiko mwanambe Yehova wamayongomena. ‘Kaha ami nangukinduluka kuli enu.’+ Omu mukiko nahanjika Yehova wamayongomena.”’
4 “‘Kanda namupwa nge masenu vaze valwezele kuli vapolofweto vakunyima ngwavo: “Yehova wamayongomena nambe ngwenyi, ‘Sezenu* jijila jenu jajipi navilinga vyenu vyavipi.’”’+
“‘Oloze vakiko kavevwililileko, kavatengelekele matwitwi avo kuli amiko.’+ Omu mukiko mwanambe Yehova.
5 “‘Uno masenu vali kulihize? Uno vapolofweto vanayoyo haya myaka yosena numba?
6 Masenu vamwene ukalu+ mwomwo yakulikanga kumazu ami nakujishimbi jami ngwalwezele vangamba jami vapolofweto.’ Ngocho vakindulukile kuli ami nakwamba ngwavo: ‘Yehova wamayongomena natulingi nge kutesa najijila jetu, navilinga vyetu, natulingi nge muze ajinyine kutulinga.’”+
7 Mumwaka wamuchivali wachiyulo chaNdaliu,+ halikumbi lyakusokesa 24, mukakweji wakusokesa 11 waShevate,* mazu aYehova ejile kuli kapolofweto Zekaliya mwanaMbelekiya, Mbelekiya mwanaIto muchakumwenesa. Zekaliya ambile ngwenyi:
8 “Ngwamwene chakumwenesa naufuku. Lunga umwe apwile nakutambukila hakavalu uchila, kaha emanyine muchinema mumitondo yamiluta. Kaha munyima yenyi mwemanyine tuvalu vachila, navava vachiluluka, navava vatoma.”
9 Jino ngwambile ngwami: “Ove mwata wami, nyi ava vakiko veya?”
Kaha kangelo uze apwile nakuhanjika kuli ami angukumbulwile ngwenyi: “Nangukulwezavo.”
10 Lunga uze emanyine mumitondo yamiluta ambile ngwenyi: “Ava vakiko vaze natumu Yehova vahitangane hamavu.”
11 Kaha vambile kuli kangelo kaYehova uze emanyine mumitondo yamiluta ngwavo: “Tunahitangana hamavu, kaha hamavu hosena hali kuunda, kaheshi pindanganoko.”+
12 Jino kangelo kaYehova ambile ngwenyi: “Ove Yehova wamayongomena, uno Yelusalema najinganda jamuYuta+ jize unevwila matoto hamyaka 70, naukana kujivwila keke palanga nakumwaka uka?”+
13 Yehova akumbulwile kangelo uze apwile nakuhanjika kuli ami, amukumbulwile namazu alikoji, akuvendejeka.
14 Jino kangelo uze apwile nakuhanjika kuli ami angulwezele ngwenyi: “Vilika ngwove, ‘Yehova wamayongomena nambe ngwenyi: “Nangukafwila chikuma kukinga Yelusalema naZeyone.+
15 Ngunapihilila chikuma navaka-mafuchi vaze vanatwame mukuunda.+ Vatu jami ngwasakile kuvazangamisa chachindende kaha,+ oloze vaka-mafuchi eka vavayanjishile chikuma kuhambakana omu ngwasakile ami ivene.”’+
16 “Shikaho Yehova nambe ngwenyi: ‘“Nangwivwila keke Yelusalema,+ kaha navakatungamo zuvo yami.+ HaYelusalema navakakanyikilaho mukole wakupimisa.” Omu mukiko mwanambe Yehova.’+
17 “Vilika cheka ngwove, ‘Yehova wamayongomena nambe ngwenyi: “Mujinganda jami namukazala cheka vyuma vyamwaza. Yehova mwakavendejeka cheka Zeyone,+ kaha mwakasakula cheka Yelusalema.”’”+
18 Jino ngwatalile, kaha ngwamwene jimbinga jiwana.+
19 Kaha ngwahulishile kangelo uze apwile nakuhanjika kuli ami ngwami: “Eji jimbinga jaka?” Angukumbulwile ngwenyi: “Eji jikiko jimbinga jamwangile vaYuta,+ navaIsalele,+ navatu vamuYelusalema.”+
20 Yehova angulwekesele vitotombwe vawana.
21 Ngwamuhulishile ngwami: “Uno ava vitotombwe naveza nakulinga ika?”
Ambile ngwenyi: “Eji jimbinga jikiko jize jamwangile vaYuta, kaha kakwapwile mutu numba umwe ahashile kwandula mutwe wenyiko. Kaha ava naveza nakujivwisa woma, nakulindumuna jimbinga javaka-mafuchi vaze vanazundula jimbinga javo halifuchi lyaYuta mangana vavamwangemo.”
