Zekaliya 12:1-14
12 Awa akiko mazu alupi elu navuluka Kalunga:“Awa akiko mazu aYehova akuzangamisa Isalele.” Omu mukiko mwanambe Yehova,Ou akanyikile melu,+Ou alile chihela chamavu,+Ou nawa atengele shipilitu* yamutu.
2 “Yelusalema nanguyilingisa kupwa nge lupasa* luze nalupendesa vatu veka naveka vosena vaze vayijingilika mangana vatalyangile. Kaha Yuta naYelusalema navakayihaka muchingombela.+
3 Halikumbi lize, Yelusalema nangukayilingisa kupwa lilolwa lize nalikapwa lyalilemu chikuma kuzundula kuli vatu veka naveka vosena. Veshovo navakalizundula navakalemana.+ Kaha vaka-mafuchi vosena hamavu navakalikungulula hamwe nakuyizungisa.”+
4 Yehova nambe ngwenyi: “Halikumbi lize, nangukevwisa tuvalu woma, kaha vaka-kutambukilaho nangukavazalwisa. Meso ami nawakapwa hali vaze vakuzuvo yaYuta, oloze tuvalu vavatu veka naveka vosena nangukavaveta naupuputa.
5 Kaha vamyata* javaYuta navakamba mumichima yavo ngwavo, ‘Vatu vatwama muYelusalema vanapu ngolo jetu jize jafuma kuli Kalunga kavo Yehova wamayongomena.’ +
6 Halikumbi lize, nangukalingisa vamyata javaYuta vakapwe nge kakahya kali mumusenge, nge mulangi wakakahya uze uli hamulumba wambuto jamanona.+ Kaha navakocha vatu vosena vaze vanavajingilika, vaze vali kuchilyo nakuchimoswe chavo.+ Ngocho vatu vamuYelusalema navakatwama cheka munganda yavo,* muYelusalema.+
7 “Yehova mwakavangila kuyovola vaze vakumbalaka yaYuta, mangana kuwaha* chavaze vakuzuvo yaNdavichi nakuwaha* chavatu vamuYelusalema chikazeneke kuhambakana chize chavatu vamuYuta.
8 Halikumbi lize, Yehova mwakakinga vatu vamuYelusalema vosena.+ Halikumbi lize, weshowo mwakahukana* muli vakiko mwakapwa nangolo nge Ndavichi. Kaha vaze vakuzuvo yaNdavichi navakapwa nangolo nge Kalunga, nge kangelo kaYehova uze eji kuvatetekelanga.+
9 Halikumbi lize, nangukanongesa vaka-mafuchi osena vaze veji kuzungisanga Yelusalema.+
10 “Nangukahingunwina shipilitu yalikoji, yakulembelela hali vaze vakuzuvo yaNdavichi nahali vatu vamuYelusalema. Navakatala kuli uze vatuvile,+ kaha navakamulila nge muze mutu mwalila mwanenyi umwe kaha lyamunwe. Navakalishonayo chikuma nge muze mutu mwalishona mwanenyi watwatwa.
11 Halikumbi lize, muYelusalema namukapwa miteto yayinene ngana yize yapwile muHatatelimone muChana chaMengito.+
12 Mulifuchi namukapwa jimbimbi, tanga hitanga nayikalilila hauka wayo. Vaze vakuzuvo yaNdavichi navakalilila hauka wavo, kaha mapwevo navakalilila hauka wavo. Vaze vakuzuvo yaNatane+ navakalilila hauka wavo, kaha mapwevo navakalilila hauka wavo.
13 Vaze vakuzuvo yaLevi+ navakalilila hauka wavo, kaha mapwevo navakalilila hauka wavo. Vaze vakuzuvo yaShimei+ navakalilila hauka wavo, kaha mapwevo navakalilila hauka wavo.
14 Kaha jitanga josena jize najikasalaho, tanga hitanga nayikalilila hauka wayo, kaha mapwevo navakalilila hauka wavo.
Kwinyikila Chamwishi
^ Chipwe “atengele kuhwima.”
^ Chipwe “nge chiloso.”
^ Ava vamyata vapwile vamyangana jamiyachi.
^ Chipwe “muchihela chavo.”
^ Chipwe “mangana upahu.”
^ Chipwe “naupahu.”
^ Chipwe “weshowo wakuhehela chikuma.”
