Zekaliya 13:1-9
13 “Halikumbi lize, vaze vakuzuvo yaNdavichi navaze vatwama muYelusalema navakavafulila lishima lyameya akukosa shili navyuma vyavipi.”+
2 Yehova wamayongomena nambe ngwenyi: “Halikumbi lize, nangukanongesa makombelo osena mulifuchi,+ kaha kaveshi kukawanuka chekako. Mulifuchi nangukafumisamo nawa vapolofweto+ vamakuli nashipilitu yayipi.
3 Kachi nge mutu mwakapolofweta cheka mwakwonga, kaha ise nanaye vaze vamusemene vakamwambe ngwavo, ‘Kaweshi kuyoyako mwomwo unahanjika vyuma vyamakuli mulijina lyaYehova.’ Ise nanaye vaze vamusemene vakamutuvasane mwomwo napolofweta mwakwonga.+
4 “Halikumbi lize, kapolofweto hikapolofweto mwakevwa sonyi hakwambulula chakumwenesa mwakamona. Kaha keshi kukavwala uvwalo waungona+ wakapolofwetoko mangana akazeneke kwonga vatu.
5 Kaha mwakamba ngwenyi, ‘Ami kangwapwa ngukapolofwetoko. Ngwapwa ngunjimi, mwomwo lunga umwe angulanjile omu ngwapwile ngukanyike.’
6 Kachi nge mutu mwakamuhulisa ngwenyi, ‘Uno eji jimbandu jili hamujimba* wove jaka?’ Mwakamukumbulula ngwenyi, ‘Eji jimbandu vangulemekelejo kuzuvo yamasepa jami.’”*
7 Yehova wamayongomena nambe ngwenyi: “Ove poko yamukwale, katuka ulemeke kafunga kami,+Ulemeke mutu uze apwa sepa lyami.Veta kafunga,+ mangana utanga wamikoko ulimwange.+Kaha livoko lyami nalikazangamisa vatu vakuzeneka ulemu.”
8 Yehova wamayongomena nambe ngwenyi:“Vimbwa vivali vyavatu vyamulifuchi navakavitetamo nakuvinongesa.*Kaha chimbwa chamuchitatu navakachisezamo.
9 Chimbwa kanechi chamuchitatu nangukachihaka mukakahya.Kaha nangukavatomesa nge omu navatomesa palata,Nangukavaheha nge omu navaheha ulu.+Navakasanyika halijina lyami,Kaha nangukavetava.Nangukamba ngwami, ‘Ava hivatu jami,’+Kaha vakiko navakamba ngwavo, ‘Yehova ikiye Kalunga ketu.’”
Kwinyikila Chamwishi
^ Hepe., “jili mukachi kamavoko.” Kulumbununa, hatulo chipwe hanyima.
^ Chipwe “yavaze vanguzanga.”
^ Chipwe “nakuvijiha.”
