Zekaliya 14:1-21
14 “Tala! Likumbi lyaYehova lili nakwiza. Kaha vyuma navakapupa muli ove* navakalipangilavyo shimbu vachili muli ove.
2 Nangukakungulula vaka-mafuchi osena vakalwe jita nanganda yaYelusalema. Nganda kana navakayitambula, jizuvo navakajipupa, kaha mapwevo navakavapika. Chimbwa chavatu vamunganda nachikaya muufunge, kaha vaze navakasalaho kaveshi kukavanongesa mungandako.
3 “Yehova mwakaya nakulwa jita navaka-mafuchi aze,+ nge muze eji kulwanga nge ali kujita.+
4 Halikumbi lize, mahinji enyi nawakemana haPili yaMilive+ yize yalitalasana naYelusalema kumututuko. Pili yaMilive nayikapulika hakachi, kufuma kumututuko nakuheta kumulauko,* nakupwa chinema chachinene chikuma. Jino chihanda chimwe chapili nachikaswenya kunote, kaha chihanda chikwavo nawa nachikaswenya kusulo.
5 Namukachinyina muchinema chajipili jami, mwomwo chinema chajipili jami nachikaheta nakuAzele. Namukachina nge muze mwachinyine mundenda mumakumbi aUjiya mwangana wavaYuta.+ Yehova Kalunga kami mwakeza, kaha vaze vajila vosena navakeza naikiye hamwe.+
6 “Halikumbi lize, kakweshi kukapwa kumunyikako,+ vyuma navikalikonda.*
7 Likumbi kana navakalitachikiza ngwavo hilikumbi lyaYehova.+ Halikumbi kana kakweshi kukapwa musana chipwe ufukuko. Kaha hakajimbavenyi nakupwa lika musana.
8 Halikumbi lize, muYelusalema+ namukafuma meya akuyoya,+ chimbwa chawo chimwe nachikaya kukalungalwiji wakumututuko,*+ kaha chimbwa chikwavo nachikaya kukalungalwiji wakumulauko.*+ Vyumevi navikasoloka mungonde yavula namungonde yachishika.
9 Yehova mwakapwanga Mwangana hamavu hosena.+ Halikumbi lize, Yehova mwakapwa umwe kaha,+ lijina lyenyi nawa nalikapwa limwe kaha.+
10 “Ngalila yosena nayikapwa nge Alava,+ kufuma kuNgeva+ swi nakuLimone+ kusulo yaYelusalema. Yelusalema nayikazezuka helu, kaha vatu navakatwamangamo,+ kufuma kuChikolo chaMbenjamine+ nakuheta kuChikolo Chakulivanga, swi nakuChikolo ChamuMbango. Navakatwamangamo kufuma kuKaposhi kaHananele+ swi nakuchikamwino chavinyo chamwangana.
11 Vatu navakatwamangamo, kaha kaveshi kukayinongesa chekako.+ Vatu navakatwamanga mukuunda muYelusalema.+
12 “Ou ukiko musongo uze mwakaneha Yehova hali vatu veka naveka vaze veji kulwanga jita naYelusalema:+ Nyama yavo nayikapola shimbu vachili vavatonyi, meso avo nawakapola muvimango vyawo, malimi avo nawakapola mutunwa twavo.
13 “Halikumbi lize, Yehova mwakaneha pindangano yayinene mukachi kavo. Kaha mutu himutu mwakakwata halivoko lyamukwavo, kaha livoko lyenyi nalikazungisa livoko lyamukwavo.*+
14 VaYuta navakiko navakalwa jita muYelusalema. Kaha luheto lwavaka-mafuchi osena aze anajingilikako navakalukungulula. Navakakungulula ulu wauvulu, napalata yayivulu, nauvwalo wauvulu.+
15 “Kaha musongo kana naukeza nawa kutuvalu, navangamela, navimbulu, navimuna vosena vaze vali muvilombo.
16 “Vosena vaze navakasalaho hali vaka-mafuchi aze nawakazungisa Yelusalema navakayanga mwaka himwaka+ nakulifukula kuli* Mwangana, Yehova wamayongomena,+ nakulinga Chiwanyino chaVisakila.+
17 Oloze veshovo vatu vamujitanga jahamavu vaze navakakana kuya kuYelusalema nakulifukula kuli Mwangana, Yehova wamayongomena, kaveshi kukamona vulako.+
18 Kachi nge tanga yimwe kuEjipitu kayeshi kukezako, tanga kana kayeshi kukamona vulako. Kaha navakayinehela musongo uze Yehova mwakaneha kuli vaka-mafuchi vaze navakakana kuya nakulinga Chiwanyino chaVisakila.
19 Omu mukiko navakazangamisa vaEjipitu hashili yavo, nakuzangamisa nawa vatu veka naveka hashili yavo, vaze navakakana kwiza nakulinga Chiwanyino chaVisakila.
20 “Halikumbi lize, mazu akwamba ngwavo ‘Kujila chapwa chaYehova’+ navakawasoneka hajingezo jatuvalu. Kaha jindeho*+ jamuzuvo yaYehova najikapwa nge viloso+ vize vili kulijiko lyakulumbila.
21 Jindeho* jamuYelusalema namuYuta josena najikapwa jajila, kaha najikapwa jaYehova wamayongomena. Vosena vaze navakeza nakuhana vimuna vakuvatula navakazachisa jindeho jimwe. Kaha halikumbi lize, muzuvo yaYehova wamayongomena+ kamweshi kukapwa vaKananeko.”*
Kwinyikila Chamwishi
^ Kulumbununa, nganda yize vanavuluka muvesi 2.
^ Hepe., “kukalungalwiji.”
^ Chipwe “navikalikwata,” kwijiva nge nachishika.
^ Kulumbununa, Kalungalwiji waMendetelenya.
^ Kulumbununa, Kalungalwiji waKufwa.
^ Chipwe “kaha mutu mwakalukuka mutu mukwavo.”
^ Chipwe “nakulemesa.”
^ Chipwe “jindeho jakanwa kakanene.”
^ Chipwe “jindeho jakanwa kakanene.”
^ Chipwe pamo, “vaka-kusekasanako.”
