Zekaliya 3:1-10
3 Jino angulwekesele kapilishitu wakulitulaho Yoshuwa+ nemana kumeso akangelo kaYehova, kaha Satana+ emanyine kulivoko lyaYoshuwa lyachilyo mangana amwimanyine nakole.
2 Kangelo kaYehova ambile kuli Satana ngwenyi: “Ove Satana,+ Yehova akutenukile. Yehova uze asakwile Yelusalema+ akutenukile. Ou lunga napu chimbunji chakakahya chize vanokola lyehi mukakahya.”
3 Yoshuwa avwalile uvwalo wamajilo, kaha emanyine kumeso akangelo.
4 Kangelo ahanjikile kuli vaze vemanyine kumeso enyi ngwenyi, “Muzulenu uvwalo wenyi wamajilo.” Kaha ahanjikile kuli ikiye ngwenyi, “Ngunakufumisa kuhenga* chove nakukuvwika uvwalo wamwaza.”*+
5 Kahami ngwambile ngwami: “Mujingenu lihina litoma kumutwe wenyi.”+ Ngocho vamujingile lihina litoma kumutwe wenyi nakumuvwika uvwalo. Uze kangelo kaYehova emanyine kwakamwihi naikiye.
6 Jino kangelo kaYehova ambile kuli Yoshuwa ngwenyi:
7 “Yehova wamayongomena nambe ngwenyi, ‘Kachi nge nautambukanga mujijila jami, nakuzata milimo yove kumeso ami, kaha naukayulanga muzuvo yami+ nakulama vipango vyami. Nangukakuhana lisesa lyakwingila muli ava vanemana kuno.’
8 “‘Ove Kapilishitu Wakulitulaho Yoshuwa, namasepa jove vaze veji kutwamanga kumeso ove, ivwililenu, mwomwo ava malunga vanapu nge katachikijilo. Ami nanguneha ngamba yami,+ lijina lyenyi ikiye Muketengo.+
9 Talenu lilolwa eli ngunahake kumeso aYoshuwa. Halilolwa eli hanatale meso 7. Kaha nangusonekaho mazu. Nangukafumisa kuhenga chalifuchi lize mulikumbi limwe.’+ Omu mukiko mwanambe Yehova wamayongomena.
10 “Yehova wamayongomena nambe ngwenyi, ‘Halikumbi lize, mutu himutu mwakasanyikila mukwavo mwishi yamuvinyo wenyi, mwishi yamukuyu wenyi.’”+
