Zekaliya 4:1-14
4 Kangelo uze ahanjikile nayami ejile cheka, anguhindwile ngana mwamutu vanahindula kutulo.
2 Angwihwile ngwenyi: “Unamono ika?”
Ngwamukumbulwile ngwami: “Ngunamono chitumbikilo chamanongo, chosena chaulu lika,+ kaha helu lyacho hali chiloso. Helu lyachitumbikilo hali manongo 7,+ kaha aze manongo ali helu lyachitumbikilo ali namiyengo 7.
3 Kuze kuchitumbikilo kuli milive yivali,+ mulive umwe unazeukila hachiloso kuchilyo, kaha ukwavo nawa kuchimoswe.”
4 Jino ngwehwile kangelo uze apwile nakuhanjika nayami ngwami: “Ove mwata wami, uno vyumevi vinalumbunukila mulihi?”
5 Kangelo uze apwile nakuhanjika nayami angwihwile ngwenyi: “Uno kawatachikiza mwalumbunukila vyumeviko nyi?”
Ngwamukumbulwile ngwami: “Eyo, ove mwata wami.”
6 Jino angwambile ngwenyi: “Yehova nahanjika kuli Zeluvavele ngwenyi: ‘“Chuma kana kacheshi kulingiwa nangolo javaka-kwasa jitako chipwe nangolo javatuko,+ oloze nashipilitu yami.”+ Omu mukiko mwanambe Yehova wamayongomena.
7 Ove pili yayinene, yove iyaze? Navakakushikununa+ kumeso aZeluvavele.+ Kaha mwakalovola lilolwa lyahelu oku vatu vali nakutambakana ngwavo: “Ocho kuwaha! Ocho kuwaha!”’”
8 Yehova ahanjikile cheka kuli ami ngwenyi:
9 “Mavoko aZeluvavele akiko anale chihela chazuvo yino,+ kaha mavoko enyi nawa akiko nawakayikumisa.+ Kaha namukatachikiza ngwenu Yehova wamayongomena ikiye nangutumu kuli enu.
10 Iya nalumbilisa maputukilo amandende?*+ Mwomwo navakawahilila nakumona lungoji lwakupimisa lwakuzezalala* mulivoko lyaZeluvavele. Kaha meso 7 anapu meso aYehova aze ali nakutala hamavu hosena.”+
11 Jino ngwamuhulishile ngwami: “Uno eyi milive yivali yili kuchitumbikilo, umwe kuchilyo, ukwavo kuchimoswe yinalumbununa ika?”+
12 Ngwamuhulishile kamuchivali ngwami: “Uno eyi mitango yamilive yivali,* eyi yili nakuhingununa maji akufwana nge ulu mumiyengo yivali yaulu yinalumbununa ika?”
13 Ikiye anguhulishile ngwenyi: “Uno kawatachikiza mwalumbunukila vyumeviko nyi?”
Ngwamukumbulwile ngwami: “Eyo, ove mwata wami.”
14 Ambile ngwenyi: “Evi vinemanyinako vawavisa vavali ava vanemana kuli Mwata wahamavu hosena.”+
Kwinyikila Chamwishi
^ Chipwe “vyuma vyavindende?”
^ Hepe., “nakumona lilolwa.”
^ Kulumbununa, mitango yamutondo yinalemenena namihako.
