Zekaliya 5:1-11
5 Ngwandwile cheka meso ami, kaha ngwamwene mukanda wakuvunga uli nakutuka.
2 Angwihwile ngwenyi: “Unamono ika?”
Kaha ngwamukumbulwile ngwami: “Ngunamono mukanda wakuvunga uli nakutuka. Muusuku uli najikuvite* 20, kaha muwihi uli najikuvite 10.”
3 Jino ambile kuli ami ngwenyi: “Ou mukanda uli nachangu chize chili nakuya kumavu kwosena. Mwomwo vaze veji kwivanga,+ nge muze vakanyisa kusali yimwe yamukanda kanou, kaveshi nakuvazangamisako. Kaha vaze veji kulishinganga mwamakuli,+ nge muze vakanyisa kusali yikwavo yamukandou, kaveshi nakuvazangamisako.
4 Yehova wamayongomena nambe ngwenyi, ‘Ngunatumu echi changu, kaha nachiya nakwingila muzuvo yamwiji namuzuvo yayou eji kulishinganga mwamakuli mulijina lyami. Nachitwamanga muzuvo yenyi, kaha nachilya zuvo kana, navitondo vyayo, namalolwa ayo.’”
5 Jino kangelo uze apwile nakuhanjika nayami ejile, kaha ambile kuli ami ngwenyi: “Andula meso ove utale vili nakuhita helu.”
6 Ngwamuhulishile ngwami: “Chuma muka chize?”
Ikiye angukumbulwile ngwenyi: “Mbekete yalifwa* yize yili nakuhita helu.” Ambile cheka ngwenyi: “Omu mukiko vafwana vaka-kuhuka hamavu hosena.”
7 Jino ngwamwene chifwiko chamujingulule chasumbu nachifukunuka kuze kumbekete, kaha muze mumbekete mwatwamine pwevo.
8 Ambile ngwenyi: “Ou pwevo ikiye Kuhuka.” Kaha amushinjikilile muze mumbekete yalifwa, afwikile chifwiko chasumbu kukanwa kayize mbekete.
9 Ngwandwile cheka meso ami, kaha ngwamwene mapwevo vavali vali nakwiza. Vapwile nakutuka mupeho. Vapwile namavava nge aze andalangimbu. Kaha vazezwile yize mbekete helu.
10 Jino ngwahulishile uze kangelo apwile nakuhanjika nayami ngwami: “Eyi mbekete yalifwa vali nakuyitwala kulihi?”
11 Ikiye angukumbulwile ngwenyi: “Vali nakuyitwala kulifuchi lyaShinale*+ mangana vakatungile uze pwevo zuvo. Kaha nge vanakumisa kuyitunga, navakamuhaka muchihela chenyi chinamutela.”
Kwinyikila Chamwishi
^ Kuvite yimwe yapwile jisendimita 44.5. Tala Chihande B14.
^ Hepe., “lifwa,” hano linemanyinako mbekete chipwe mutonga vapiminyinenga lifwa. Lifwa limwe lyapwile kafwe jilita 22. Tala Chihande B14.
^ Likiko Mbavilone.
