Zekaliya 6:1-15
6 Ngwandwile meso ami, kaha ngwamwene matemba awana ali nakulovoka mukachi kajipili jivali. Jize jipili japwile jaunengu.
2 Litemba lyakulivanga valikokele kutuvalu vachila, kaha lyamuchivali valikokele kutuvalu velava.+
3 Litemba lyamuchitatu valikokele kutuvalu vatoma, kaha litemba lyamuchiwana valikokele kutuvalu vamavalanga-mavalanga navava vamapelenge-mapelenge.+
4 Ngwahulishile uze kangelo apwile nakuhanjika nayami ngwami: “Ove mwata wami, awa matemba anemanyinako ika?”
5 Uze kangelo angukumbulwile ngwenyi: “Vakiko vashipilitu vawana+ vamwilu vaze vanafumu kumeso aMwata wahamavu hosena kuze veji kwimananga.+
6 Litemba lize vali nakukoka kutuvalu velava lili nakuya kulifuchi lyakunote.+ Kaha tuvalu vatoma vali nakuya kujingalila jamusali yakalungalwiji. Vaze vamavalanga-mavalanga vali nakuya kulifuchi lyakusulo.
7 Vaze vamapelenge-mapelenge valizangile kuya nakuhitangana hamavu.” Kaha ambile ngwenyi: “Yenunga, hitanganenu hamavu.” Ngocho vaputukile kuhitangana hamavu.
8 Kaha angutambakanyine ngwenyi: “Tala, vaze vali nakuya kulifuchi lyakunote vanalingisa shipilitu yaYehova yipwenga halifuchi lyakunote.”
9 Yehova ahanjikile cheka kuli ami ngwenyi:
10 “Katambule vyuma vezanga navyo vaHeletai, naToviya, naYetaya kufuma kuli vaze vali muufunge. Halikumbi lize ukaye kuzuvo yaYoshiya mwanaZefwanyiya hamwe kaha navava vanafumu kuMbavilone.
11 Ukambate palata naulu, kaha ukatenge muchama* nakukauvwika kumutwe wakapilishitu wakulitulaho Yoshuwa+ mwanaYehozatake.
12 Kaha ukambe kuli ikiye ngwove,“‘Yehova wamayongomena nambe ngwenyi: “Ou ikiye mutu uze vavuluka ngwavo Muketengo.+ Mwakachivikila muchihela chenyi, kaha mwakatunga tembele yaYehova.+
13 Ikiye mwakatunga tembele yaYehova, ikiye mwakatambula ulemu. Mwakatwama halitanda lyenyi nakuyula, kaha mwakapwanga nawa kapilishitu halitanda lyenyi.+ Ngocho eyi milimo yivali* mwakayizata kanawa chakuzeneka chimbalanganyi.
14 Uze muchama* naukapwanga mutembele yaYehova kupwa chuma chakwanukilaho Heleme, naToviya, naYetaya,+ naHene mwanaZefwanyiya.
15 Kaha vaze vali kwakusuku navakeza nakwazana mumulimo wakutunga tembele yaYehova.” Ngocho namukatachikiza ngwenu Yehova wamayongomena ikiye nangutumu kuli enu. Kachi nge namwivwililanga mulizu lyaYehova Kalunga kenu, kaha chuma kana nachikasoloka.’”
Kwinyikila Chamwishi
^ Chipwe “muchama waupahu.”
^ Kulumbununa, mulimo wakupwa muka-kuyula nakupwa kapilishitu.
^ Chipwe “muchama waupahu.”
