Zekaliya 7:1-14
7 Mumwaka wamuchiwana wachiyulo chaMwangana Ndaliu, mazu aYehova ejile kuli Zekaliya+ halikumbi lyamuchiwana, mukakweji wakusokesa 9 waKishileve.*
2 Vatu vamuMbetele vatumine Shaleze, naLengeme-meleke navatu jenyi mangana vakavalembeleleko kuli Yehova avevwile uselewa.
3 Vayile kuli vapilishitu vakuzuvo* yaYehova wamayongomena nakuli vapolofweto nakwamba ngwavo: “Uno twatela kulila jimbimbi mukakweji wamuchitanu+ nakulijilika kulya, nge omu tunalinginga hamyaka yayivulu nyi?”
4 Yehova wamayongomena ahanjikile cheka kuli ami ngwenyi:
5 “Hanjika kuli vatu vosena vamulifuchi nakuli vapilishitu ngwove, ‘Omu mwalijilikilenga kulya, nakulila jimbimbi mukakweji wamuchitanu namukakweji wakusokesa 7+ hamyaka 70,+ kutala mwalijilikile kulya mwomwo yayami tahi?
6 Omu mwalilenga nakunwa, uno kamwalilenga nakunwa mangana mulinganyalise enu vaveneko nyi?
7 Uno kamweshi kwononoka mazu aYehovako aze avilikile kuhichila muli vapolofweto vakulivanga+ shimbu Yelusalema najinganda jahachileko japwile mukuunda, shimbu vatu vapwile nakutwama muNengeve namuShefwela tahi?’”
8 Yehova ahanjikile cheka kuli Zekaliya ngwenyi:
9 “Yehova wamayongomena nambe ngwenyi, ‘Yulenunga mwaya chiyulo chakwoloka,+ lingenunga mwalikoji+ kuli vakwenu nakuvatetela.
10 Kanda namulyapulanga vatuliwe, chipwe vana vakuzeneka masevo,*+ chipwe vamwiza+ chipwe vaka-kuhutwako.+ Kanda namujina mumichima yenu kulinga vakwenu vyuma vyavipiko.’+
11 Oloze vakanyinenga kutengeleka matwitwi avo,+ vanjinjavalilenga+ nakujika mumatwitwi avo kuchina navevwako.+
12 Vakakamishile michima yavo kwijiva nge ndayamonde.*+ Kaha kavononokele jishimbi* namazu aYehova wamayongomena vize atumine nashipilitu yenyi kuhichila muli vapolofweto vakulivangako.+ Ngocho Yehova wamayongomena+ avakwachilile utenu.”
13 “Yehova wamayongomena nambe ngwenyi, ‘Omu ngwavasanyikile,+ vakanyine kungwivwilila, ngocho nayami nawa ngwakanyine kuvevwilila omu vangusanyikile.+
14 Kaha ngwavamwangile napeho yanyamanganda kumafuchi kuze vazenekele kutachikiza.+ Lifuchi lyasalile ngundu, naumwe wauchi ahichilemo chipwe kukindulukamo.+ Mwomwo lifuchi lyamwaza valilingishile kupwa chuma chakukomwesa vatu.’”
Kwinyikila Chamwishi
^ Tala Chihande B15.
^ Chipwe “vakutembele.”
^ Chipwe “vanginga.”
^ Chipwe pamo, “kwijiva nge lilolwa lyakukola,” lyakufwana nge emeli.
^ Chipwe “jindongi.”
