Zekaliya 8:1-23
8 Yehova wamayongomena ahanjikile cheka ngwenyi:
2 “Yehova wamayongomena nambe ngwenyi, ‘Nangukafwila chikuma+ kukinga Zeyone, nangukevwa matoto nakuyikinga.’”
3 “Yehova wamayongomena nambe ngwenyi, ‘Nangukakinduluka kuZeyone,+ nangukatwama muYelusalema.+ Yelusalema navakayivulukanga ngwavo nganda yamuchano,*+ kaha pili yaYehova wamayongomena navakayivulukanga ngwavo pili yajila.’”+
4 “Yehova wamayongomena nambe ngwenyi, ‘Muvihela vyasanga vyamuYelusalema namukatwamanga cheka tushinakaji vamalunga navava vamapwevo, mutu himutu namukombo wenyi mwomwo yaushinakaji.*+
5 Muvihela vyasanga vyamunganda namukazala vanyike vamalunga navava vamapwevo, kaha navakahemenangamo.’”+
6 “Yehova wamayongomena nambe ngwenyi, ‘Numba tuhu hamakumbi aze chuma kana nachikasoloka kupwa chachikalu kuli vaze navakasalaho hali vatu ava, oloze kacheshi kukapwa chachikalu kuli amiko.’ Omu mukiko mwanambe Yehova wamayongomena.”
7 “Yehova wamayongomena nambe ngwenyi, ‘Vatu jami nangukavasokola kulifuchi lyakumututuko nalyeli lyakumulauko.+
8 Nangukavaneha, kaha navakatwamanga muYelusalema.+ Navakapwanga vatu jami, kaha ami nangukapwanga nguKalunga kavo+ mumuchano* namukwoloka.’”
9 “Yehova wamayongomena nambe ngwenyi, ‘Jikizenu,+ enu munevu mazu awa mutunwa twavapolofweto,+ mazu aze vahanjikile halikumbi lize valile chihela chazuvo yaYehova wamayongomena mangana vatungeho tembele.
10 Mwomwo shimbu kanda likumbi lize, vatu chipwe tunyama+ kavavahanyinenga fwetoko. Chapwile chaponde kulovoka chipwe kwingila mwomwo yavaka-kole. Mwomwo ngwalingishile vatu vosena valifumbukile mwavomwavo.’
11 “Yehova wamayongomena nambe ngwenyi, ‘Vaze navakasalaho hali vatu ava, kangweshi kukavalinga nge muze ngwalingile hakavangako.+
12 Mbuto jakuunda navakajikuva, mivinyo nayikema mihako yayo, mavu nawakalovola jimbuto,+ kaha melu nawakaneha lyume. Nangukalingisa vaze navakasalaho hali vatu ava vakaswane vyuma vyosenevi.+
13 Enu vakuzuvo yaYuta nayenu vakuzuvo yaIsalele, mwapwile muvakulyangwilaho kuli vaka-mafuchi,+ ngocho nangukamilwila, kaha namukapwa muvakukiswilaho vatu.+ Kanda namwivwa womako.+ Jikizenu.’+
14 “Mwomwo Yehova wamayongomena nambe ngwenyi, ‘“Nge muze ngwajinyine kuminehela lupi omu vangwivwishile kupihya vakakuluka jenu, nakuzeneka kwalumuna vishinganyeka vyami,”+ mukiko mwanambe Yehova wamayongomena,
15 “ngocho nahalwola luno nawa ngunajinyi kulinga mwamwaza haYelusalema nahali vaze vakuzuvo yaYuta.+ Kanda namwivwa womako.”’+
16 “‘Evi vikiko vyuma mwatela kulinga: Mutu himutu ahanjikenga muchano namukwavo,+ kaha muyulenga mwaya muchano kuvikolo vyenu nakuneha kuunda.+
17 Kanda namujina mumichima+ yenu kulinga vakwenu mwamupiko,+ kanda namulishinga vyuma vyamakuliko.’+ Omu mukiko mwanambe Yehova.”
18 Yehova wamayongomena ambile cheka kuli ami ngwenyi:
19 “Yehova wamayongomena nambe ngwenyi, ‘Likumbi lyakulijilika kulya lyamukakweji wamuchiwana,+ nalyeli lyamukakweji wamuchitanu,+ nalyeli lyamukakweji wakusokesa 7,+ nalyeli lyamukakweji lyakusokesa 10,+ nawakapwa makumbi akulisamba nakuwahilila kuli vaze vakuzuvo yaYuta, himakumbi aviwanyino vyakuwahilila.+ Shikaho zangenunga muchano nakuunda.’
20 “Yehova wamayongomena nambe ngwenyi, ‘Lwola luli nakwiza omu vatu veka naveka navaze vatwama mujinganda jajivulu navakeza.
21 Kaha vatu vaze vatwama munganda yimwe navakaya kuli vaze vatwama munganda yikwavo nakwamba ngwavo: “Tuyenu tukamulembelele Yehova mangana atwivwile uselewa, tuyenu tukamutondetonde Yehova wamayongomena. Nayetu nawa natuya.”+
22 Vatu veka naveka vavavulu navaka-mafuchi angolo navakeza nakutondatonda Yehova wamayongomena muYelusalema+ nakulembelela Yehova mangana avevwile uselewa.’
23 “Yehova wamayongomena nambe ngwenyi: ‘Hamakumbi aze, malunga likumi vakumalimi akumafuchi osena+ navakakwata kuchikuto* chakaYuleya* nakwamba ngwavo: “Natuya nayove+ mwomwo tunevu ngwavo Kalunga ali nayove.”’”+
Kwinyikila Chamwishi
^ Chipwe “yakushishika.”
^ Hepe., “mwomwo yakuvula chamakumbi.”
^ Chipwe “mukushishika.”
^ Chipwe “kusongo yachikuto.”
^ Hepe., “chalunga wakaYuleya.”
