Vaka-kulinangula vyaMbimbiliya vetavila ngwavo lijina lyaKalunga lize vasonekele muvasona vaTetalangalamatoni (יהוה), lyasolokele mapapa kafwe 7,000 muVisoneka VyachiHepeleu vyakulivanga. Oloze vavavulu vashinganyeka ngwavo lijina lyaKalunga kalyapwile muVisoneka VyachiHelase vyaVaka-Kulishitu vyakulivangako. Shikaho jiMbimbiliya jajivulu jamakumbi ano kajazachisa lijina Yehova hakwalumuna Tesetamende Yayihyako. Numba vene hakunungulula mazu aVisoneka VyachiHepeleu aze atwama navasona vaTetalangalamatoni, vaka-kwalumuna vavavulu kavazachisa lijina lyaKalungako, oloze vasoneka kaha ngwavo “Mwata.”

Vaka-kwalumuna Mbimbiliya yaVisoneka vyaKaye Kakahya kavalumuna ngochoko. Vakiko vazachisa lijina Yehova mapapa 237 muVisoneka VyachiHelase vyaVaka-Kulishitu. Vaka-kwalumuna vashinganyekele havishina vyavilemu vino vivali hakuzachisa lijina kana: (1) Mikanda yakuvunga yachiHelase twatwama nayo makumbi ano, keshi yikiko yize yakulivangako. Mikanda yakuvunga yayivulu yize yiliko oholili, vayisonekele omu mwahichile kafwe myaka 200 kufuma haze vasonekele yize yakulivanga. (2) Vaze vanungulwile mazu mumikanda kaneyi yakuvunga halwola luze, vashishishile vasona vaTetalangalamatoni nalizu lyachiHelase lyakwamba ngwavo “Mwata” (Kyʹri·os), mokomoko vakavangijile kaha mikanda yakuvunga yize vafumishile lyehi vasona vaTetalangalamatoni.

Komiti yaKwalumuna Mbimbiliya yaVisoneka vyaKaye Kakahya yenjikijile ngwayo vasona vaTetalangalamatoni vapwile mumikanda yakuvunga yakulivanga yachiHelase. Ou ukiko unjiho wavalingishile vazachise lijina kana:

• Mikanda yaVisoneka VyachiHepeleu yize vazachishilenga mumakumbi aYesu navaposetolo jenyi yapwile navasona vaTetalangalamatoni muvisoneka vyavivulu. Kunyima, vatu vavandende kaha vakanyine unjiho kanou. Oholili jino naumwe wauchi mwakana unjiho kanou, mwomwo vanawane mikanda yaVisoneka VyachiHepeleu yamulikulukaji lyamyaka lyakulivanga kwakamwihi naKumulane.

• Mumakumbi aYesu navaposetolo jenyi, vasona vaTetalangalamatoni muvapwilenga muVisoneka VyachiHelase vize valumwine kufuma kuVisoneka VyachiHepeleu. Hamyaka yayivulu, vaka-kulinangula vyaMbimbiliya vashinganyekele ngwavo vasona vaTetalangalamatoni kavapwile mumikanda yaSeptuagint YachiHelaseko yize valumwine kufuma muVisoneka VyachiHepeleu. Jino hakachi  kalikulukaji lyamyaka lyakusokesa 20, vihanda vimwe vyakushikulu vyaSeptuagint YachiHelase vize vyapwilengako mumakumbi aYesu vavihanyine kuli vaka-kulinangula vyaMbimbiliya. Vihanda kana vyatwama nalijina lyaKalunga lize vasoneka muvasona vachiHepeleu. Ngocho mumakumbi aYesu, mikanda yaVisoneka yamulilimi lyachiHelase yapwilenga lijina lyaKalunga. Oloze kuheta mulikulukaji lyamyaka lyamuchiwana, mikanda yayilemu yaSeptuagint YachiHelase, yakufwana nge Codex Vaticanus naCodex Sinaiticus, kayapwilenga nalijina lyaKalunga kufuma kumukanda waKuputuka swi nakuli Malaki (muvihela muze lyapwilenga mujimanyusikilipiti jakulivangako). Ngocho katweshi kulikomokelako kachi nge lijina lyaKalunga kalyeshi muTesetamende Yayihya, chipwe ngwetu muchihanda chaMbimbiliya chaVisoneka VyachiHelaseko.

  Yesu ambile ngwenyi: “Ami nguneza mulijina lyaTata.” Ambile nawa ngwenyi milimo yenyi ayizachile ‘mulijina lyaise’

• Visoneka VyachiHelase vyaVaka-Kulishitu vyasolola nge Yesu ahanjikilenga vyalijina lyaKalunga nakulijimbula kuvatu. (Yowano 17:6, 11, 12, 26) Yesu ambile hatoma ngwenyi: “Ami nguneza mulijina lyaTata.” Ambile nawa ngwenyi milimo yenyi ayizachilenga ‘mulijina lyaise.’—Yowano 5:43; 10:25.

• Hakuwana nge Visoneka VyachiHelase vyaVaka-Kulishitu vavihwimine nakuviwezela kuVisoneka VyachiHepeleu, ngocho kacheshi kwoloka kufumisamo lijina lyaYehovako. Hakachi kalikulukaji lyamyaka lyakulivanga C.E., kambaji Yakova alwezele vakulwane muYelusalema ngwenyi: “Shimeyone nahichimo lyehi mwosena omu Kalunga alakanyine vaka-mafuchi eka lwola lwatete mangana ambatemo vamwe muli vakiko vapwenga vatu navavulukilanga lijina lyenyi.” (Vilinga 15:14) Kachi nge vatu mulikulukaji lyamyaka lyakulivanga kavatachikijile lijina lyaKalunga chipwe kulizachisako, kachi Yakova kahanjikile mazu kanako.

• Lijina lyaKalunga lyasoloka mukavatu muVisoneka VyachiHelase vyaVaka-Kulishitu. Hali Kusoloka 19:1, 3, 4, 6, lijina lyaKalunga lyatwama mulizu lyakwamba ngwavo “Haleluya.” Lizu kana lyafuma kulizu lyachiHepeleu lize lyalumbununa ngwavo “Mwalisenunga Ya.” “Ya” hilijina lyaYehova mukavatu. Majina amavulu vazachisa muVisoneka VyachiHelase vyaVaka-Kulishitu atwama naulumbunwiso wakufuma kulijina lyaKalunga. Namikanda yimwe yamba ngwayo lijina lyaYesu lyalumununa ngwavo “Yehova Ikiye Ulwilo.”

• Mikanda yavaYuleya yakulivanga yasolola nge vaka-Kulishitu vavaYuleya vazachishilenga lijina lyaKalunga mumikanda yavo. Mukanda waTosefta, wajishimbi jahakanwa kaha, uze vakumishile kusoneka mu 300 C.E., wavulukile vyamikanda yavaka-Kulishitu yize vochele haSambata ngwawo: “Mikanda yaVaka-kwambulula  namikanda yavaminim [vaze vapwa vaka-Kulishitu vavaYuleya] kavayikingile kukakahyako. Oloze vali nakuyochela kuze yili, vali nakuyochela kumwe namazu aze apwilemo, aze apwile naLijina lyaKalunga.” Ou mukanda waTosefta wavuluka nawa mazu ahanjikile Lapi Yosé wakuNgalileya uze ayoyelenga kumaputukilo alikulukaji lyamyaka lyamuchivali ngwenyi mumakumbi amwe muchalumingo, “vatu veji kutetangamo mapapilo [kulumbununa mumikanda yavaka-Kulishitu] aze vasoneka Lijina lyaKalunga nakuwatulika, oloze mikanda yosena veji kuyochanga.”

• Vaka-kulinangula vyaMbimbiliya vamwe vetavila ngwavo chasoloka nge lijina lyaKalunga lyasolokele hamazu aVisoneka VyachiHepeleu aze vanungulwilile muVisoneka VyachiHelase vyaVaka-Kulishitu.  Mukanda waThe Anchor Bible Dictionary hamutwe wachihande wakwamba ngwavo “Vasona vaTetalangalamatoni muTesetamende Yayihya,” wamba ngwawo: “Kwatwama unjiho wasolola nge halwola lwatete vasonekele Tesetamende Yayihya, vasona vaTetalangalamatoni, vaze vemanyinako Lijina lyaKalunga, Yahweh, havapwile hamazu amwe chipwe hamazu osena aze vanungulwile kufuma muTesetamende yaMwaka nakuneha muTesetamende Yayihya.” Muka-kulinangula vyaMbimbiliya George Howard, ambile ngwenyi: “Hakuwana nge vasona vaTetalangalamatoni vavasonekele mujiMbimbiliya JachiHelase [chipwe Septuagint] jize vazachishilenga vaka-chachi yakulivanga, nachipwa chakutamo kufwelela ngwetu vaze vasonekele Tesetamende Yayihya valaminenga  vasona vaTetalangalamatoni omu vanungulwilenga mazu muVisoneka.”

• Vaka-kwalumuna jiMbimbiliya vaze vaya fuma vanazachisanga lijina lyaKalunga muVisoneka VyachiHelase vyaVaka-Kulishitu. Vatu kanava vamwe vanazachisanga lijina lyaKalunga shimbu kanda kupwenga naMbimbiliya yaVisoneka vyaKaye Kakahya. Awa akiko majina avava vaka-kwalumuna najiMbimbiliya javo valumwine: Mbimbiliya yaLiteral Translation of the New Testament . . . From the Text of the Vatican Manuscript, vayalumwine kuli Herman Heinfetter (1863); The Emphatic Diaglott, vayalumwine kuli Benjamin Wilson (1864); The Epistles of Paul in Modern English, vayalumwine kuli George Barker Stevens (1898); St. Paul’s Epistle to the Romans, vayalumwine kuli W. G. Rutherford (1900); The New Testament Letters, vayalumwine kuli J.W.C. Wand, Bishop of London (1946). Kaha muMbimbiliya yaSpanish yize valumwine kuli Pablo Besson kumaputukilo alikulukaji lyamyaka lyakusokesa 20, azachishile lijina “Jehová” hali Luka 2:15 nahali WaYuta 14. MuMbimbiliya yenyi mwapwile nawa mazu akwinyikila chamwishi akuheta kafwe 100 aze asolwele lijina lyaKalunga. Shimbu kanda kupwenga najiMbimbiliya kaneji, jiMbimbiliya jachiHepeleu jaVisoneka VyachiHelase vyaVaka-Kulishitu jize vasonekelenga kufuma mulikulukaji lyamyaka lyakusokesa 16 nakuya kulutwe jazachishile vasona vaTetalangalamatoni mumijimbu yayivulu. MujiMbimbiliya 11 jaVisoneka  VyachiHelase vyaVaka-Kulishitu mulilimi lyaGerman vazachishile lijina “Yehova” (chipwe “Yahweh”), kaha vaka-kwalumuna veka vawana vasonekele lijina lyaKalunga muvipango kuvulukiso yakwamba ngwavo “Mwata.” Kaha jiMbimbiliya jaGerman jakuhambakana 70, jazachishile lijina lyaKalunga mumazu akwinyikila chamwishi chipwe mumazu akulumbununa.

• JiMbimbiliya jamumalimi akulisezaseza akuhambakana 100 jatwama nalijina lyaKalunga muVisoneka VyachiHelase vyaVaka-Kulishitu. Mumalimi amavulu amuAfrica, naAmerica, naAsia, naEurope, namatungu aPacific, azachisa chikuma lijina lyaKalunga. (Tala mukana wamalimi uli halifwo 2062 na 2063.) Vatu vaze valumwine jiMbimbiliya kaneji, vazachishile lijina lyaKalunga mwomwo yavyuma tunavuluka lyehi. JiMbimbiliya jimwe eji jaVisoneka VyachiHelase vyaVaka-Kulishitu vanajisoneka kalinwaha, jakufwana nge Rotuman Bible (1999), yize yazachisa lijina “Jihova” mapapa 51 mujivesi 48, naMbimbiliya yaBatak (Toba) (1989) yakuIndonesia, yize yazachisa lijina “Jahowa” mapapa 110.

Chikupu vene, kuuli unjiho uze naulingisa lijina lyaKalunga Yehova valikindulwise muVisoneka VyachiHelase vyaVaka-Kulishitu. Omu mukiko vanalingi navaka-kwalumuna Mbimbiliya yaVisoneka vyaKaye Kakahya. Vavumbika chikuma lijina lyaKalunga, kaha vevwa woma kufumisa vyuma vimwe vize vyapwile muvisoneka vyakulivanga.—Kusoloka 22:18, 19.