Lijina lyaKalunga lyasoloka kafwe mapapa 7,000 muVisoneka vyachiHepeleu, kaha valisoneka muvasona vachiHepeleu vawana יהוה. Ava vasona vavuluka ngwavo Tetalangalamatoni, muMbimbiliya yino vavalumuna ngwavo “Yehova.” Lijina kana likiko vavuluka chikuma muMbimbiliya. Numba tuhu vatu vaze vahwiminyinyine vasoneke Mbimbiliya vazachishile jivulukiso jajivulu jakufwana nge “Wangolo Josena,” “Wakulitulaho Chikuma,” “Mwata” hakuvuluka Kalunga, oloze vasona vavuluka ngwavo Tetalangalamatoni vakiko kaha vazachishile hakuvuluka lijina lyaKalunga.

Yehova Kalunga atwaminyinyine vaka-kusoneka Mbimbiliya vazachise lijina lyenyi. Chakutalilaho, ahwiminyinyine kapolofweto Yowele asoneke ngwenyi: “Weshowo mwasanyika halijina lyaYehova navakamulwila.” (Yowele 2:32) Kalunga ahwiminyinyine nawa muka-kwimba jisamu umwe asoneke ngwenyi: “Vatu vatachikize ngwavo, ove ukwechi lijina lyove yove Yehova, Yove kaha uka wove wapwa uWakulitulaho Chikuma hamavu hosena.” (Samu 83:18) Lijina lyaKalunga lyasoloka mapapa kafwe 700 mumukanda waJisamu, mukanda wamyaso yize vembilenga nakuhanjika vatu jaKalunga. Mwomwo ika lijina lyaKalunga lyahonena kupwa mujiMbimbiliya jajivulu? Mwomwo ika muMbimbiliya yino vasonekamo lijina ngwavo “Yehova”? Lijina lyaKalunga Yehova lyalumbununa ika?

Mwomwo ika lijina lyaKalunga lyahonena kupwa mujiMbimbiliya jajivulu? Kuli vyuma vyavivulu vyalingisa ngocho. Vatu vamwe vashinganyeka ngwavo Kalunga Wangolo Josena katela kupwa nalijina lyakumutachikijilahoko. Vakwavo vavahungumwisa nakunangula chavaYuleya chize chakanyishile kuzachisa lijina lyaKalunga, mwomwo ngwavo navalijilulula. Veka vashinganyeka ngwavo hakuwana nge naumwe wauchi atachikiza mwakuvulukila lijina lyaKalunga, ngocho nachiwaha kumuvuluka kaha ngwavo “Mwata” chipwe “Kalunga.” Vishinganyeka kana kavyeshi vyakutamoko mwomwo yavyuma vino:

•   Vaze vashinganyeka ngwavo Kalunga Wangolo Josena katela kupwa nalijinako, vakana unjiho wakusolola nge mumikanda yakulivanga yaMazu enyi, namikanda yize valamine shimbu kanda Kulishitu apwengako yapwile nalijina lyaKalunga. Nge omu tunavuluka lyehi, Kalunga atwaminyinyine vaka-kusoneka Mbimbiliya vasoneke lijina lyenyi mapapa kafwe 7,000 muMazu enyi. Echi chasolola nge asaka tutachikize lijina lyenyi nakulizachisanga.

• Vaka-kwalumuna vaze vafumisa lijina lyaKalunga mwomwo yakunangula chavaYuleya kavatachikiza chishina chino chachilemuko. Numba tuhu vaka-kusoneka vavaYuleya vakanyine kuzachisa lijina lyaKalunga, oloze kavalifumishile mumikanda yavo yaMbimbiliyako. Mikanda yakuvunga yakushikulu yize vawanyine muKumulane, kwakamwihi naKalungalwiji waKufwa, yapwile nalijina lyaKalunga muvihela vyavivulu. Vaka-kwalumuna jiMbimbiliya vamwe vasolola nge lijina lyaKalunga mulyapwile muvisoneka vyakulivanga mwomwo valishishisa navulukiso yamuvasona vavanene yakwamba ngwavo “MWATA.” Oloze mwomwo ika ava vaka-kwalumuna vapwile nalisesa lyakushishisa lijina lyaKalunga chipwe kulifumisa muMbimbiliya okunyi vatachikijile ngwavo muvisoneka vyaMbimbiliya mulyapwile mapapa kakavulu? Iya avahanyine ngolo jakulinga chuma kana? Naumwe wauchi natachikiza, shina vakiko kaha.

• Vaze vashinganyeka ngwavo lijina lyaKalunga kavatela kulizachisako mwomwo naumwe wauchi atachikiza mwakulivulukila, veji kuzachisanga lijina lyaYesu numba tuhu naumwe wauchi atachikiza mwakulivulukila. Oloze tumbaji twaYesu vamulikulukaji lyamyaka lyakulivanga vavulukilenga lijina lyenyi mujila yeka keshi nge omu valivuluka vaka-Kulishitu makumbi anoko. Chasoloka nge vaka-Kulishitu vavaYuleya vavulukilenga eli lijina Yesu ngwavo Ye·shuʹa‛. Kaha vulukiso yakwamba ngwavo “Kulishitu” vayivulukilenga ngwavo Ma·shiʹach, chipwe “Meshiya.” Vaka-Kulishitu vavaHelase vamuvulukilenga ngwavo I·e·sousʹ Khri·stosʹ, kaha vaka-Kulishitu vahanjikilenga chiLatinyi vamuvulukilenga ngwavo Ieʹsus Chriʹstus. Shipilitu yaKalunga yalingishile lijina lyenyi lize valumuna muchiHelase valisoneke muMbimbiliya. Echi chasolola nge vaka-Kulishitu vamulikulukaji lyakulivanga vakavangijile vulukiso yize vazachishilenga vatu mulilimi lyavo halwola luze. Omu mukiko yinalingi naKomiti yaKwalumuna Mbimbiliya yaVisoneka vyaKaye Kakahya. Vamwene ngwavo lijina kana vatela kulivuluka ngwavo “Yehova,” numba tuhu omu keshi mukiko valivulukilenga muchiHepeleu kushikuluko.

Mwomwo ika muMbimbiliya yaVisoneka vyaKaye Kakahya vavulukila lijina lyaKalunga ngwavo “Yehova”? MuChingeleshi, vasona vaTetalangalamatoni vawana יהוה vavasoneka ngwavo YHWH. MuchiHepeleu kushikulu, mazu osena vawasonekelenga navasona vakuzeneka vivumo, ngocho navasona vaTetalangalamatoni nawa kavapwile navasona vavivumoko. Omu vatu vatangilenga chiHepeleu kushikulu, vatachikijilenga vasona vavivumo vakuhakilako mangana vavuluke kanawa lizu.

 Omu mwahichile myaka kafwe 1,000 kufuma haze vakumishile kusoneka Visoneka vyachiHepeleu, vaka-kulinangula vavaYuleya vatakile jijila jakuvulukilamo mazu hakujimbula vasona vavivumo vaze vatelelele kuzachisa vatu hakutanga chiHepeleu. Halwola luze, vaYuleya vavavulu vapwile navishinganyeka vyakuhenga vyakwamba nge, chapwile chijila kuvuluka lijina lyaKalunga, ngocho valishishishile najivulukiso jeka. Ngocho chasoloka nge omu vanungulwilenga vasona vaTetalangalamatoni, vasona vavivumo vaze vashishishilenga, vavafutwile navasona vawana vaze vemanyinyinengako lijina lyaKalunga. Oloze jimanyusikilipiti jize japwile navaze vasona vavivumo kajakafwa vatu vatachikize omu vavulukilenga lijina lyaKalunga muchiHepeleuko. Vamwe vashinganyeka ngwavo lijina kana valivulukilenga ngwavo “Yahweh,” oloze veka ngwavo valivulukilenga mweka. Mikanda yakuvunga vavuluka ngwavo Dead Sea Scroll yize yapwile nachimbwa chamukanda waVyavaLevi muchiHelase walumwine lijina lyaKalunga ngwavo Iao. Kaha nawa vaka-kusoneka vakulivanga vavaHelase vamba ngwavo lijina kana vatela kulivuluka ngwavo Iae, I·a·beʹ, naI·a·ou·eʹ. Oloze katwatela kulipula jipami hachuma kanako, mwomwo katwatachikiza omu vangamba jaKalunga vakushikulu vavulukilenga lijina lyenyi muchiHepeleuko. (Kuputuka 13:4; Kulovoka 3:15) Oloze twatachikiza ngwetu Kalunga azachishilenga lijina lyenyi mapapa kakavulu hakuhanjika navatu jenyi, kaha vatu nawa vamuvulukilenga halijina lyenyi, nakulizachisanga hakushimutwila navakwavo vatu.—Kulovoka 6:2; Vamyangana 1, 8:23; Samu 99:9.

Mwomwo ika muMbimbiliya yino vavulukila lijina lyaKalunga ngwavo “Yehova”? Mwomwo lijina kaneli likiko vanazachisanga vatu halwola lwalusuku mulilimi lyaLuvale.

Lijina lyaKalunga valisonekele lwola lwatete muMbimbiliya yaMikanda Yajila Yitanu Yakulivanga yaChingeleshi mu 1530, yize alumwine William Tyndale. MuMbimbiliya kana asonekele ngwenyi “Iehouah.” Kutwala muze, lilimi lyaChingeleshi lyalumukile, kaha nalijina lyaKalunga valisonekele jino mweka. Chakutalilaho mu 1612, Henry Ainsworth asonekele ngwenyi “Iehovah” mumukanda waJisamu wosena. Jino mu 1639,  omu vasononwene mukanda kana nakuhakilako Mikanda Yajila Yitanu Yakulivanga, lijina kana valisonekele ngwavo “Jehovah.” Kaha kuheta mu 1901, vaka-kwalumuna vaze valowele Mbimbiliya yaAmerican Standard Version, vasonekele ngwavo “Jehovah” hajivesi haze hapwile lijina lyaKalunga muvisoneka vyachiHepeleu.

Mumukanda wenyi waStudies in the Psalms, lunga umwe uze alinangula vyaMbimbiliya, Joseph Bryant Rotherham alumbunwine ovyo azachishilile lijina “Jehovah” muchishishisa chakuzachisa “Yahweh.” Ambile ngwenyi asakile kuzachisa “lijina lize vatachikiza kanawa (lize vetavila) kuli vaka-kutanga Mbimbiliya.” Mu 1930, muka-kulinangula umwe A. F. Kirkpatrick naikiye ahanjikile mwomumwe ovyo asonekelele ngwenyi “Jehovah.” Ambile ngwenyi: “Vatu vaze valinangula mwakusonekela mazu makumbi ano, vamba ngwavo lijina kana vatelelele kulitanga ngwavo Yahveh chipwe Yahaveh. Oloze lijina JEHOVAH likiko vazachisa chikuma muChingeleshi, kaha kwijiva mwakuvulukila lijina kana keshi chikiko chuma chachilemuko, oloze chuma chachilemu shina kwijiva ngwetu lyapwa Lijina, keshi nge hivulukiso kaha yakufwana nge ‘Mwatako.’”

Uno lijina lyakwamba ngwavo Yehova lyalumbununa ika? MuchiHepeleu, lijina lyakwamba ngwavo Yehova lyafuma kulizu lize lyalumbununa ngwavo “kupwako,” kaha vaka-kulinangula vavavulu vamba ngwavo lyahana ulumbunwiso walizu lyachiHepeleu lyakwamba ngwavo kulingisa. Ngocho Komiti yaKwalumuna Mbimbiliya yaVisoneka vyaKaye Kakahya yamba ngwayo lijina lyaKalunga lyalumbununa ngwavo “Eji Kulingisanga Vyuma Kupwako.” Vaka-kulinangula vyaMbimbiliya valilumbununa mujijila jakulisezaseza, ngocho katwatela kulipula jipami haulumbunwiso kanouko. Ulumbunwiso kanou wamutela Yehova hakupwa ikiye Tengi uze atengele vyuma vyosena, kaha nawa Muka-kutesamo vyuma ajina. Ikiye alingishile vyuma vyamumelu nahamavu, navyuma vyakuyoya vipwengako, kaha eji kulingisanga nawa vyuma ajina vitesengamo.

Shikaho, lijina lyakwamba ngwavo Yehova lyalumbununa mwamuvulu keshi nge muze kaha vasoneka hali Kulovoka 3:14 ngwavo: “Nangupwa Mweshomwo Ngunasakula Kupwa,” chipwe “Nangulisolola Kupwa Mweshomwo Ngunasake Kupwa.” Kuhanjika muchano, mazu awa kawahana ulumbunwiso uvene walijina lyaKalungako. Asolola kaha vilinga vimwe vyaKalunga. Asolola nge eji kulilingisanga kupwa mweshomwo nasake mangana atesemo vyuma ajina. Numba tuhu lijina Yehova likwechi ulumbunwiso kanou, oloze lyatwama nawa naulumbunwiso ukwavo. Lyalumbununa nawa nge eji kulingisanga vyuma atenga vilinge mweshomwo nasake mangana atesemo vyuma ajina.