VAKA-KUKAFWA Vaka-kukafwa vavahana mulimo wakumikafwa. Tuli nakumilomba muzachile navo hamwe nakukavangiza vyuma navamilweza hakukunjika jiminyau, namwakulongesela lizavu, namwakutwamina, navyuma vyeka vyakufwana ngana.

LUMBAPACHISO Vaka-kuya kulumbapachiso vatela kutwama hamwe muchihela vanalongesa shimbu kanda chihande chalumbapachiso chiputuke halikumbi lyamuchivali nachimene. Vitwamo vanatumbikila vaka-kuya kulumbapachiso navipwa muchihela vanawahisa kulutwe lwautenda. Mutu himutu atela kwiza nalitwayi lyenyi nauvwalo wakavumbi wakusanyisa.

MAWANA Vanawahisa vinoma vyakuhanjikilamo navyuma vyavivulu vize vinafwiki jimbongo jajivulu mangana kukunguluka chino chiwahe nakutukafwa tupandame lika kuli Yehova. Mawana akulisakila mweji kuhananga akiko eji kufwikanga vyuma vyosenevi nakukafwa nawa kumulimo wamukaye kosena. Vanawahisa vikasha vyamawana vyakusoneka kanawa nakuvihaka kuvihela vyavivulu. Munahase nawa kuhana mawana hakuya haze vanavuluka ngwavo donate.pr418.com. Natumisakwilila chikuma hamawana osena namuhana. Kaha nawa Lizavu Lyakutwaminyina lili nakumisakwilila hawana wenu namuhana wakukundwiza milimo yaWangana.

KWAKUKILA MISONGO YAKUKASUMUNA Anukenu ngwenu, kuchihela kana kwakukila misongo yakukasumuna kaha.

VYAKUJIMBALA VANAWANE NAKUZUVO KWAKUVIWANYINA Vyuma vyosena namwanda mwatela kuvitwala kuLipatimende LyavyaKujimbala. Nge munajimbalisa chuma, kaha mwatela kuya kulipatimende kaneli, nakuvuluka vyuma vyenu. Vana vaze vanajimbala mwatela kuvatwala kulipatimende kaneli. Oloze ijivenu ngwenu, lipatimende kana kalyapwa hichihela chakulamina vanako. Tunamilombo mulame kanawa vana venu nakupwa navo hamwe.

KUTWAMA Tunakumilomba mutetelenga vakwenu. Anukenu ngwenu, munahase kulamina kaha vihela tanga yenu navaze muneza navo chipwe vaze mwatwama navo hembo lyenu chipwe vaze munakulinangula navo Mbimbiliya oholyapwa. Tunamilombo ngwetu kanda kuseza vyuma muvihela vyeka vinamihateko. Echi nachikafwa vakwenu vamone vihela vize vinazeneka vatu.

MULIMO WAKULISAKILA Nge namusaka kukafwa mumilimo yahakukunguluka, kaha tuli nakumilomba muyenga kuli Vaka-Lipatimende lyaVaka-Kukafwa nalyaMijimbu, kaha navamilweza kuze kunakusakiwa kukafwa.