Ngwakolelele mumbaka yayindende yaWarialda mungalila yaNew South Wales. MuMbaka kana vatu vapita chikuma mikoko, navangombe. Kaha nawa veji kulimanga vimbuto vyakulisezaseza. Mumbaka kana kamwatwama chikuma uhwangako.

Twasemuka 10 mutanga yetu, ami yami twatwa. Shikaho omu ngwapwile namyaka yakusemuka 13, ngwaputukile kuzata mangana ngukafweko tanga. Hakuwana nge kangwatanga chikumako, ngocho ngwazachilenga hafwamu. Kahomu ngwapwile namyaka 15, ngwaputukile kuzata mulimo wakulama vimuna nakunangula tuvalu mangana vejilile vatu.

Chapwile hikutokwa kuzata hafwamu, oloze nawa changunehelelele ukalu. Ngwalivwishile kuwaha kuzata mulimo wami, kaha nawa ngwazangile chikuma kuchihela kana. Naufuku ngwatwaminenga kujiko nakutala kakweji navatanganyika, nakulivwisa kuwaha kapeho kamwaza. Ngocho ngwashinganyekele ngwami kwatela kupwa mutu umwe uze atengele vyuma kanevi vyamwaza ngana. Chipwe ngocho, kuze kufwamu ngwalikachile navatu vavilinga vyavipi. Vatu kana vahanjikilenga chikuma mazu akulishinga nakunwa makanya. Shikaho nayami jino ngwaputukile kulishinga nakunwa makanya chikuma.

Omu ngwapwile namyaka 18, ngwayile kunganda yaSydney. Ngwasakile kwingila uswalale oloze kavangwitavilileko mwomwo yakuhona kutanga chikuma. Ngocho ngwengilile mulimo weka, kaha ngwatwamine munganda kana mwaka umwe. Halwola kanelu hakiko ngwaliwanyine naVinjiho jaYehova. Vangusanyikile kukukunguluka, kahomu ngwayileko vyuma ngwakevwile vyangulingishile ngumone ngwami veji kunangulanga muchano.

Kufumaho ngwashinganyekele kuya nakutwama kungalila yakumembo. Ngocho ngwayile nakutwama kumbaka yayindende yaGoondiwindi, mungalila yaQueensland. Ngwaputukile kuzata milimo, kufumaho ngwambachile pwevo, chaluvinda ngwaputukile nakunwa wala.

Twasemene vana vavali, vosena vamalunga. Halwola kana, hakiko ngwaputukile kushinganyeka chikuma omwo nachipwa chiyoyelo chami kulutwe. Ngwanukile vyuma ngwevwile omu ngwapwile kukukunguluka chaVinjiho jaYehova munganda yaSydney, ngocho ngwashinganyekele kulingako vyuma vimwe.

Ngwawanyine mangazini yaKaposhi Kakutalila yamwaka yize yapwile nakeyala yaofesi yamutango waVinjiho jaYehova wamuAustralia. Kaha ngwavatuminyinyine mukanda mangana vangukafwe. Ngocho kwejile Chinjiho chaYehova wamuchima walikoji kaha nawa wazangi. Nakushimbula chiku aputukile kungunangula Mbimbiliya.

Omu ngwapwile nakulinangula Mbimbiliya, ngwamwene ngwami ngwatelelele kwalumunako vyuma vimwe mukuyoya chami. Mazu amuMbimbiliya aze angukwachile chikuma kumuchima shina aze atwama hali Wavaka-Kolinde 2, 7:1. Mazu kana atukolezeza ngwawo: “Tulitomesenu kuvyuma vyosena vyakupihisa mujimba.”

Ngocho ngwamwene ngwami ngwatela kulitwamina kunwa makanya nawala. Kachapwile chachashi kulitwamina kunwa makanya nawalako, mwomwo chapwile chijililo chami. Chipwe ngocho, ngwafwililile kuyoya mujila yize nayivwisa Kalunga kuwaha. Chuma changukafwile chikuma shina kuzachisa lundongi lwatwama hali Wavaka-Loma 12:2 lwakwamba ngwavo: “Kanda namwitavila katwamino kamyaka yino kamyalumuneko, oloze alumukenu hakulingisa vishinganyeka vyenu kupwa vyavihya.” Ngwatachikijile ngwami hakusaka ngwalumune vilinga vyami vyavipi ngwatelelele kwalumuna vishinganyeka vyami nakumona vyuma ngwapwile nakulinga ngana muze avimona Kalunga. Kalunga angukafwile ngulitwamine kunwa makanya nawala.

Chuma changukaluhwilile kumbila shina kulishinga. Ngwatachikijile mazu akuhuhumuna atwama hali Wavaka-Efwesu 4:29 aze amba ngwawo: “Mutunwa twenu kanda namulovoka mazu akupolako.” Chipwe ngocho changukaluhwilile kumbila hanjikiso kana. Chuma changukafwile shina kushinganyeka hamazu atwama hali Isaya 40:26, aze ahanjika havatanganyika. Vesi kana yamba ngwayo: “Andulenu meso enu mutale mwilu mumone. Iyaze natenge vyuma vyosenevi? Shina Ou eji kutetekelanga liyongomena lyavatanganyika kweseka nakuvula chavo. Eji kuvavulukanga vosena halijina halijina. Kaha hakuwana nge atwama nangolo jajinene jakukomwesa, naumwe wauchi eji kulitulangaho.” Shikaho ngwashinganyekele ngwami, hakuwana nge Kalunga atwama nangolo jakutenga vyuma vyamumelu vize ngweji kulivwisanga kuwaha kutala, ngocho mwangukafwa ngwalumune vilinga vyami mangana ngumwivwise kuwaha. Kuzata chikuma nangolo nakulomba vyangukafwile ngumbile hanjikiso yakulishinga.

Hakuwana nge hafwamu ngwazachilililenga kahapwile vatu vavavuluko, ngocho kangwashimutwililenga navatu chikumako. Chipwe ngocho, kupwanga kukukunguluka chaVinjiho jaYehova chinangukafwe kutachikiza mwakushimutwila navatu. Kaha nawa ngunalinangula mwakwambulila vakwetu mujimbu wamwaza waWangana waKalunga.—Mateu 6:9, 10; 24:14.

Ngunalivwisa kuwaha kupwa mukulwane muchikungulwilo hamyaka yayivulu. Ngweji kwivwanga kuwaha chikuma kuzata nangolo jami josena mangana ngukafwe vandumbwami. Kutokwa chachinene nguli nacho shina kuzachila Yehova hamwe kaha napuwami navana vetu.

Ngweji kusakwililanga Yehova hakungunangula numba tuhu kangwatanga chikumako. (Isaya 54:13) Ngwamona mazu ahali Vishimo 10:22 kupwa amuchano, akwamba ngwavo: “Kukisula chaYehova chikiko cheji kuhetesanga mutu luheto.” Ami natanga yami tuli nakufwila kutwalaho kulinangula vyavivulu hali Yehova nakumuzachila haya myaka yosena.