Achishinganyekenu chisemi ali nakuhanjika namwanenyi walunga wamyaka yakusemuka 7. Kaha himwalweza mwanenyi ngwenyi: “Kunyima Kalunga atengele mavu navyuma vyosena vyatwamaho, atengele nawa likumbi, nakakweji, navatanganyika.” Kufumaho ou mwana mwalihulika nakushinganyeka, kaha himwahulisa ise ngwenyi: “Tata, iya atengele Kalunga?”

Uze chisemi mwamukumbulula ngwenyi, “naumwe wauchi atengele Kalunga, napungako lika kufuma vene kushikulu.” Awa mazu nakumbulula ou chisemi, nawasuulwisa mwanenyi. Oloze omu mwatwalaho lika kukola, ou mwana mwapwanga lika nakushinganyeka hachihula kana. Chinahase kumukaluhwila kwivwishisa chihande chakwamba ngwavo, kwatwama mutu uze katwama namaputukiloko okunyi melu namavu atwama namaputukilo. Nahase kulihulisa ngwenyi: ‘Uno Kalunga afuma kulihi?’

Vyuma muka yakumbulula Mbimbiliya? Ngana muze akumbululanga uze chisemi tunavuluka, omu mukiko asonekele naMose ngwenyi: “Ove Yehova, . . shimbu kanda kupwenga jipili, shimbu kanda utenge mavu nakaye, Ove wapwa uKalunga kufuma kumyaka yosena nakuya kumyaka yosena.” (Samu 90:1, 2) Kaha nawa kapolofweto Isaya ambile ngwenyi: “Uno kamwatachikijileko numba? Kutala kamwevwileko tahi? Yehova, ou atengele mavu apwa hiKalunga haya myaka yosena.” (Isaya 40:28) Chochimwe nawa, mukanda waYuta wahanjika kutalisa kuli Kalunga ngwawo napungako “haya myaka yosena.”—WaYuta 25.

Evi visoneka vyasolola nge Kalunga apwa “Mwangana wahaya myaka namyaka,” ngana muze amuvuluka kaposetolo Paulu. (WaChimoteu 1, 1:17) Echi chalumbununa nge Kalunga napungako lika putu vene kushikulu. Kaha nawa mwapwangako lika haya myaka yosena. (Kusoloka 1:8) Shikaho, kupwako chenyi chasolola nge apwa Wangolo Josena.

Mwomwo ika cheji kutukaluhwilanga kwivwishisa chihande kana? Mwomwo tando tweji kuyoya yalihandununa chikuma nayize nayoyo Yehova. Hakuwana nge Kalunga napungako haya myaka yosena, ngocho amona myaka 1,000 kupwa likumbi limwe. (WaPetulu 2, 3:8) Chakutalilaho, uno mbimba uze eji kuyoyanga kaha makumbi 50, nahase kwivwishisa tando yamyaka 70 chipwe 80 eji kuyoyanga mutu tahi? Kwakusuku! Oloze Mbimbiliya yamba ngwayo, twapwa nge vambimba hakutwesekesa kuli Tengi yetu Wamunene. Kaha nawa uhashi wetu wakushinganyeka wapwa wakukuminamo hakuwesekesa kuuhashi atwama nawo Yehova. (Isaya 40:22; 55:8, 9) Shikaho, katwatela kulikomokela hakutachikiza ngwetu katweshi kuhasa kwivwishisa vyuma vyosena hali Yehovako.

Numba tuhu chapwa chachikalu kwivwishisa chihande chakwamba ngwavo, Kalunga mwapwangako lika, oloze chihande kana chapwa chachilemu. Kachi nge kwatwama mutu umwe uze atengele Kalunga, kaha mutu kana tunahase kumuvuluka ngwetu apwa Tengi. Oloze Mbimbiliya yamba ngwayo, Yehova ikiye ‘atangile vyuma vyosena.’ (Kusoloka 4:11) Kaha nawa twatachikiza ngwetu, lwola lumwe kakwapwile melu namavuko. (Kuputuka 1:1, 2) Uno vyuma kana vyafumine kulihi? Mwomwo ou avitengele ikiye alivangile kupwako. Kaha nawa apwileko shimbu kanda kupwenga vangelo naMwanenyi umwe kaha wakulipwila vaze vapwa vamangana. (Yopa 38:4, 7; Wavaka-Kolose 1:15) Chikupu vene, Kalunga alivangile kupwako shimbu kanda atenge kala chuma. Shikaho kavamutengeleko mwomwo kakwapwile chuma chipwe mutu uze atelele kumutengako.

Kupwako chetu, namelu namavu, vyasolola nge kwatwama Kalunga. Chikupu vene, ou atengele melu namavu nakutwaminyina vyuma kana napungako lika. Ikiye kaha ahwiminyinyine kuyoya muvyuma vyakutenga vyosena.—Yopa 33:4.