VAKA-KULISHITU vavavulu kavalinga chilika chaKulisimasiko. Kutala vapwa vakuwahilila hakuhona kulinga chilika kana tahi? Uno vamona ngwavo vyuma vimwe vili nakuvahita tahi? Kutala vana vavo vamona ngwavo kavavazangako tahi? Tala vyuma vanahanjikanga Vinjiho jaYehova mukaye kosena kutalisa kuchihande kana.

“Shimbu kanda ngupwenga nguChinjiho chaYehova, kangwavulilenga kuya kuchachiko. Ngwayilengako kaha halikumbi lyaKulisimasi naIshita. Chipwe ngocho, nge ngunayiko, kangwapwilenga nakushinganyeka vyakutalisa kuli Yesu Kulishituko. Makumbi ano, kangwaya kuchilika chaKulishimasiko, oloze ngweji kupwanga kukukunguluka chavaka-Kulishitu kavali muchalumingo. Kaha nawa ngweji kunangulanga vakwetu vyuma yahanjika Mbimbiliya kutalisa kuli Yesu.”—EVE, AUSTRALIA.

“Ngweji kuwahililanga chikuma nge vatu navanguhana wana halwola luze kangwashinganyekangako. Ngwazanga wana kana. Ngwazanga nawa kutunga jikati nakufunjejeka tumivwimbimbi nguhane vakwetu mangana vawahilile. Kahechi cheji kungwivwisanga kuwaha nayami.”—REUBEN, NORTHERN IRELAND.

“Tweji kulivwisanga kuwaha kuwahishila vyakulya vaze vanaviji. Shimbu jimwe tweji kuvatwalilanga jitemo, chipwe vindanda chipwe kala wana uze nauvevwisa kuwaha. Tweji kulivwisanga kuwaha kulinga vyuma kana mwomwo tweji kuvamenekelanga kala lwola.”—EMILY, AUSTRALIA.

“Nge tunaliwane hamwe navausoko wetu, kaha vana vetu navatachikiza vanatwavo, navaisepwevo, navakaka javo navasonyi javo mujila yakuunda. Hakuwana nge katwanoneka makumbi aze natuliwananga navausoko wetu mumwakako, ngocho vausoko wetu vatachikiza ngwavo tweji kuvatambukilanga mwomwo twavazanga.”—WENDY, CAYMAN ISLANDS.

“Chasoloka nge mulwola lwaKulisimasi vatu veji kupwanga navyuma vyavivulu vyakulinga, ngocho vatu vavandende kaha veji kushinganyekanga vyakutwama mukuunda. Ngunalinangula vyuma vize Mbimbiliya yashika vatu, kahechi chinangulingisa ngupwenga wakuunda. Ngwatachikiza ngwami vana vami navakalivwisa kuwaha vyuma vyamwaza kulutwe.”—SANDRA, SPAIN.