Etene​—Uno Likiko Lyapwile Limbo lyaVatu Lyakulivanga Tahi?

ACHISHINGANYEKE uli mumilemba muze kamweshi liuya lyavatu chipwe vyuma vyakukulingisa wivwenga kupihyako. Milemba kana yayinene, kaha nawa muli kuunda. Kawalizakaminyine hachuma numba chimweko, mujimba wove nawa unalikangula kanawa. Vyuma uli nakumona nawa vili nakukwivwisa kuwaha chikuma.

Achishinganyeke nawa uli nakumona jitemo jamwaza, navana vatulwiji, namafwo atuta, namwila uli hamusana namumuvule. Kaha uli nakwivwa kapeho kamwaza hamujimba wove nakalivumba kamwaza kajitemo. Uli nakwivwa nawa chivumo chamafwo, nameya hamalwola, natujila vali nakwimba myaso, nachivumo chatututu vali nakuhalala. Kutala kaweshi kwivwa kuwaha kupwa kuchihela kanako tahi?

Vatu mukaye vafwelela ngwavo, echi chikiko chiyoyelo vapwile nakuyoya vatu vakulivanga. Hamyaka yayivulu, vatu vamukwitava chavaYuleya, namuKulishitendomu, namuIzilamu vanavanangulanga ngwavo, Kalunga ahakile Alama naEve mumilemba yaEtene. Kweseka naMbimbiliya, vatu kana vatwaminenga mukuunda nakuwahilila. Vatwaminenga nawa mukuunda natunyama naKalunga uze avahanyine limbo lyamwaza vayoyelengamo haya myaka yosena.—Kuputuka 2:15-24.

VaHindu navakiko vafwelela ngwavo kushikulu kwapwile palachise. Vaka-Buddha vafwelela ngwavo vatwamina javo vaze vavuluka nawa ngwavo vaBuddha, vaputukile kupwako halwola luze hano hamavu hapwile palachise. Kaha nawa mukwitava chachivulu muAfrica vanangula vyuma vize vyalifwana navize yahanjika Mbimbiliya hali Alama naEve.

Mukwitava chachivulu namuvisemwa vyavivulu vahanjika chikuma hapalachise yakushikulu. Muka-kusoneka umwe asonekele ngwenyi: “Kushikulu, muvisemwa vyavivulu vafwelelele ngwavo, vatu vakulivanga vatwaminenga mupalachise muze mwapwile vyuma vyakukupuka, muze kavevwilenga womako oloze vapwilenga kaha vakuwahilila. . . . Vishinganyeka kana vyalingishile vatu vevwile kuwaha palachise yize yajimbalile, nakufwila nawa kuyikindulwisa.”

Uno evi vyuma vafwelela vatu vyazama hachuma chochimwe tahi? Kutala vatu vakuvisemwa vyakulisezaseza vafwelela vyuma kana mwomwo milemba yaEtene kuyapwile kaha nawa Alama naEve kuvapwile tahi? Uno chikupu milemba yaEtene kuyapwile, kaha nawa Alama naEve kuvapwile tahi?

Vaka-kukakasana kavetavila vishinganyeka kanako. Vaka-sayasi valingisa vatu vavavulu vashinganyeke ngwavo, mijimbu kana yapwa yakutaka, kaha nawa yaseka lyehi. Oloze keshi vaka-kukakasana vosena vapwa vakukayeko. Vatwamina vamukwitava navakiko valingisa vatu vahone kufwelela ngwavo kwapwile milemba yaEtene. Veji kuhanjikanga ngwavo chihela kana kachapwileko. Vamba ngwavo mujimbu kana wapwa kaha hichishimo, himujimbu wakutaka chipwe wachifwanyisa.

MuMbimbiliya namukiko mwatwama vifwanyisa. Yesu ikiye ahanjikile vifwanyisa vize vyaya fuma chikuma. Oloze mujimbu wamuMbimbiliya uze wahanjika hamilemba yaEtene kawapwa kaha hichifwanyisako, mwomwo milemba yaEtene kuyapwile chikupu. Jino kachi nge Etene kayapwileko, kaha vatu navahasa ngachilihi kufwelela vyuma vikwavo yahanjika Mbimbiliya? Tukekese tuwane ovyo vatu vamwe veji kukakasanyinanga ngwavo, milemba yaEtene kayapwileko nakumona nawa numba nge vishinganyeka vyavo vyakwoloka nyi chiku? Kufumaho, natushimutwila ovyo mujimbu kana wapwila waulemu kuli etu?