Ovyo Mujimbu waEtene Wapwila Waulemu Kuli Yove

VATU valinangula chikuma veji kukananga mujimbu waEtene, hakwamba ngwavo kakweshi heka vavuluka mujimbu kana muMbimbiliyako. Chakutalilaho, Paul Morris Mutu Alinangula Chikuma Vyakwitava asonekele ngwenyi: “Mbimbiliya kayahanjikaho cheka hamujimbu waEteneko.” Numba tuhu mazu kana vawetavila kuli vakwavo vakuluwa, oloze alimbalaka namuchano.

Mbimbiliya yahanjika mapapa kakavulu hamilemba yaEtene, naAlama, naEve nahali uze linoka. * Oloze kuli vatu veka vaze valinangula chikuma vaze valingisa vatu vahuhwasane ou mujimbu wamuMbimbiliya. Vatwamina vamukwitava navaka-kufwefulula Mbimbiliya vali nakulingisa vatu vahone kufwelela Mbimbiliya hakwamba ngwavo mujimbu wamumukanda waKuputuka uze wahanjika hamilemba yaEtene kawapwa wamuchanoko. Mujila muka?

Kwivwishisa vyuma vyasolokele muEtene chapwa chachilemu mwomwo nachitukafwa twivwishise Mbimbiliya yosena. Chakutalilaho, Mazu aKalunga vawasoneka mujila yize nayitukafwa tuwane muvakumbulwila vihula vyavilemu chikuma vize veji kulihulisanga vatu. Kaha jila Mbimbiliya yeji kukumbulwilangamo vihula kana yalikwatasana navyuma vyasolokele mumilemba yaEtene. Tala vyakutalilaho vimwe.

● Mwomwo ika tweji kushinakajiwilanga nakufwa? Alama naEve vatelelele kuyoya haya myaka, kachi nge vatwalileho lika kuliluula kuli Yehova. Kufwa chavo chafumine hakulikanga chavo. Kaha vaputukile kufwa halikumbi vene lize valikangile. (Kuputuka 2:16, 17; 3:19) Shikaho kavapwile cheka vakukupukako, kaha vaputukile kutambwisa vana vavo shili nakuhona kukupuka. Mbimbiliya yalumbununa ngwayo: “Shili yengilile mukaye kuhichila muli mutu umwe nakufwa nawa kuhichila mushili, ngocho kufwa chatanda kuli vatu vosena mwomwo vosena valingile shili.”—Wavaka-Loma 5:12.

● Mwomwo ika Kalunga etavishila vilinga vyavipi? Mumilemba yaEtene, Satana ambile ngwenyi Kalunga apwa muka-makuli uze eji kuswekelanga vatu vyuma vyamwaza. (Kuputuka 3:3-5) Echi chasolwele nge ambile ngwenyi chiyulo chaYehova kachapwa chakwolokako. Alama naEve vasakwile kukavangiza Satana. Valikangile kuwata waYehova, kulumbununa nge vamwene ngwavo mutu nahase kulisakwila ivene vyuma vyamwaza nevi vyavipi. Hakuwana nge Yehova atwama nachiyulo chakukupuka namangana akukupuka, atachikijile ngwenyi kwapwile jila yimwe kaha yakuvatwilamo chihande kana. Jila kana shina kwecha hahite lwola, kulumbununa kuhana vatu lisesa valiyule vavene, kweseka nakusaka chavo. Shikaho vilinga vyavipi vyeza mwomwo Satana achili nakuyula, kahechi chinatukafwe tutachikize muchano wakwamba ngwavo: Vatu kaveshi kuhasa kuliyula vavene chakuhona kuvatwaminyina kuli Kalungako.—Yelemiya 10:23.

● Vyuma muka ajinyine Kalunga hakutenga mavu? Mumilemba yaEtene, Yehova alongesele vyuma mangana hano hamavu hapwenga hamwaza. Ahanyine Alama naEve mulimo wakusema vana nakuzalisa hana hamavu “nakuwalamanga,” mangana hamavu hosena hapwenga hamwaza. (Kuputuka 1:28) Shikaho, Kalunga ajinyine ngwenyi ano mavu apwenga palachise muze namutwamanga vana vaAlama naEve vakukupuka. Mbimbiliya yahanjika chikuma hajila yize Kalunga mwakateselamo vyuma ajinyine hakavanga.

● Mwomwo ika Yesu Kulishitu ejililile hano hamavu? Omu Alama naEve valikangile mumilemba yaEtene, vavatongwelelele kufwa hohamwe kaha navana vavo. Oloze Kalunga ahanyine vatu lutalililo. Atumine Mwanenyi hano hamavu mangana ahane chuma chize yavuluka Mbimbiliya ngwayo ndando yakusokola. (Mateu 20:28) Uno echi chalumbununa ika? Yesu ejile apwenga “Alama wakukuminyina,” ashishile Alama uze ahonene kushishika. Yesu alamine kuyoya chenyi chakukupuka, hakutwalaho lika kwononoka Yehova. Kufumaho alisuwile kuhana kuyoya chenyi kupwa chimuna wakuvatula chipwe ngwetu ndando yakusokola, mangana vatu vakushishika vakavakonekele jishili javo nakukawana kuyoya chize valivwishile kuwaha vaAlama naEve muEtene shimbu kanda valinge shili. (Wavaka-Kolinde 1, 15:22, 45; Yowano 3:16) Yesu ahanyine unjiho wakusolola nge kujina chaYehova nachikatesamo chakulingisa mavu kupwa palachise ngana yize yapwile muEtene. *

Vyuma ajina Kalunga kavyapwa vyavikalu kuvifwelelako, kaha nawa kavyapwa vyakutaka kahako. Oloze vyapwa vyamuchano. Hakuwana nge milemba yaEtene kuyapwile chikupu hano hamavu muze mwapwile tunyama navatu, shikaho navyuma atushika Kalunga navikatesamo chikupu. Kutala nayove naukapwako tahi? Ocho chili kuli yove ivene kusakula. Kalunga asaka vatu vavavulu vakalivwise kuwaha chiyoyelo kana, kuhakilako vene navaze vatwama navilinga vyavipi.—WaChimoteu 1, 2:3, 4.

Omu Yesu apwile nakufwa ahanjikile nalunga umwe uze apwile chihwanga. Ou lunga atachikijile ngwenyi chapwile chakutamo kumusukika. Oloze alombele Yesu amufwelelese vyuma vyamwaza. Yesu amukumbulwile ngwenyi, “naukapwa nayami muPalachise.” (Luka 23:43) Kachi nge Yesu ali nakusaka kukamona uze chihwanga nasanguka nakukamuhana lisesa lyakukayoyela mupalachise ngana yize yapwile muEtene, kutala keshi nakusaka nayove ukapwemoko tahi? Ali nakusaka vene. NaIse nawa mukiko ali nakusaka. Nge uli nakusaka kukalivwisa kuwaha vyuma kana, kaha watela kuzata nangolo mangana ulinangule hali Kalunga uze atangile milemba yaEtene.

[Kwinyikila chamwishi]

[Lipwata/​Mivwimbimbi]

UPOLOFWETO UZE WATUKAFWA TWIVWISHISE MBIMBILIYA

“Nanguhaka kole mukachi kove napwevo, namukachi kamuka-tanga yove namuka-tanga yenyi. Ikiye mwakachika mutwe wove, kahove naukatota kukakukunya kenyi.”—Kuputuka 3:15.

Ou ukiko upolofweto watete muMbimbiliya ahanjikile Kalunga muEtene. Muupolofweto kana mwatwama pwevo namuka-tanga yenyi, nalinoka namuka-tanga yenyi. Uno ava vemanyinako ika? Uno “kole” muka yatwama hakachi kavo?

LINOKA

Satana Liyavolo.—Kusoloka 12:9.

PWEVO

Vatu vakushipilitu vaze vatwama muchihanda chaliuka lyaYehova chamwilu. (Wavaka-Ngalesha 4:26, 27) Isaya ahanjikile hali “pwevo,” nakupolofweta ngwenyi mwakasema muyachi wakushipilitu.—Isaya 54:1; 66:8.

MUKA-TANGA YAUZE LINOKA

Vaze veji kusakulanga kulinga mwaya muchima waSatana.—Yowano 8:44.

MUKA-TANGA YAUZE PWEVO

Watete shina Yesu Kulishitu uze afumine muchihanda chaliuka lyaYehova chamwilu. Kaha muli ou “muka-tanga” mwatwama nawa vandumbu jaKulishitu vakushipilitu vaze navakayula hamwe naikiye mwilu. Vaka-Kulishitu vawavisa vapwa muyachi wakushipilitu uze vavuluka ngwavo “Isalele yaKalunga.”—Wavaka-Ngalesha 3:16, 29; 6:16; Kuputuka 22:18.

KUTOTA KUKAKUKUNYA

Satana alingishile Meshiya vamujihe hano hamavu, oloze kufwa chaYesu chapwile chakatando kakandende mwomwo vamusangwile.

KUCHIKA MUTWE

Kunongesa Satana. Yesu mwakanongesa Satana haya myaka yosena. Shimbu kanda alinge ngocho, mwakavangila kufumisako upi uze alingile Satana muEtene.—WaYowano 1, 3:8; Kusoloka 20:10.

Hakusaka utachikize chihande chachinene chamuMbimbiliya mukavatu, tala mbuloshuwa yakwamba ngwavo The Bible—What Is Its Message? yize vasoneka kuli Vinjiho jaYehova.

[Muvwimbimbi]

Alama naEve valikokelelele ukalu omu valingile shili