Eyo, mukaye kosena mwatwama jimiliyoni jaVinjiho jaYehova vamapwevo vaze veji kwazananga mumulimo wakunangula. Vakiko veji kwambululanga chikuma mujimbu wamwaza waWangana waKalunga. Mukanda waSamu 68:11 wahanjika kutalisa kuli ava vaka-kunangula vamapwevo ngwawo: “Yehova eji kuhananga lushimbi. Mapwevo vaze vali nakuvilika mujimbu wamwaza vanapu liyongomena lyalinene.”

Oloze kanda kushinganyeka ngwenu, ava mapwevo vaka-kunangula vaVinjiho jaYehova, vapwa ngana mwamapwevo vamumauka amukwitava eka vaze veji kunangulanga mujichachiko. Hatwama chihandwa chachinene chikuma hali ava mapwevo. Uno valihandununa ngachilihi?

Chihandwa chatwamaho shina, mapwevo vamumauka amukwitava veji kunangulanga mikoko vamujichachi javo nakupwa nawa navihela. Oloze vaka-kunangula vamapwevo vaze vapwa Vinjiho jaYehova kavanangwila vatu muvikungulwiloko. Veji kunangula vatu mumulimo wakwambulula omu veji kuyanga kuzuvo hizuvo nakuvihela vyeka vyakulisezaseza.

Chihandwa chikwavo chatwama hali Vinjiho jaYehova vamapwevo navaze vamumauka eka amukwitava shina, milimo yize veji kuzatanga muchikungulwilo. Vaka-kunangula vamapwevo vamuKulishitendomu namujichachi jeka veji kutwaminyinanga nakuhana mikoko javo jindongi muchachi. Oloze Vinjiho jaYehova vamapwevo kavanangula muchikungulwilo kachi nge muli malunga vakumbapachisako. Malunga vaze vatongola vakiko kaha veji kunangulanga.—WaChimoteu 1, 3:2; WaYakova 3:1.

Mbimbiliya yahanjika ngwayo malunga kaha vakiko vatela kutwaminyina muvikungulwilo. Achishinganyekenu hamazu asonekele kaposetolo Paulu kuli Chituse, amusonekelele ngwenyi: “Ngwakusezele kuKelete mangana . . . utongole vakulwane munganda hinganda.” Paulu ahanjikile cheka ngwenyi, lunga hilunga uze vatongola katela kupwa “nachuma chakumuhanyina mulongako, atela kupwa lunga ambata pwevo umwe kaha.” (WaChituse 1:5, 6) Paulu asonekelele Chimoteu jindongi jojimwe ngwenyi: “Kachi nge mutu ali nakusaka kupwa kalama, kaha ali nakufwila mulimo wamwenemwene. Shikaho kalama atela kupwa wakuzeneka chuma chakumuhanyina mulonga, lunga ambata pwevo umwe kaha . . . uze atamo kunangula vakwavo.”—WaChimoteu 1, 3:1, 2.

Mwomwo ika mulimo wakutwaminyina chikungulwilo vauhanyina kaha kumalunga? Paulu ahanjikile ngwenyi: “Kangweshi kwitavila pwevo ananguleko, chipwe kupwa nangolo jakuyula lungako, oloze aholenga kulu. Mwomwo Alama ikiye watete kutenga, numbanyi vatenge Eve.” (WaChimoteu 1, 2:12, 13) Shikaho jila Kalunga atengelelemo vyuma yasolola hatoma nge Kalunga ahana malunga milimo yakunangula nakutwaminyina.

Vangamba jaYehova vosena veji kulondezezanga Yesu Kulishitu uze apwa Twamina yavo. Kambaji Luka asonekele kutalisa kumulimo wakwambulula azachile Yesu ngwenyi: “Jino vakatukile nakuya mungalila yosena halimbo hilimbo nakuvilika mujimbu wamwaza.” Kufumaho, Yesu atumine vaka-kumukavangiza vazate mulimo woumwe, kaha vayilenga “munganda hinganda namulimbo hilimbo, nakwambulula nakuvilika mujimbu wamwaza.”—Luka 8:1; 9:2-6.

Namakumbi ano nawa, vangamba jaYehova vamalunga navamapwevo vosena veji kuzatanga mulimo uze avalwezele Yesu hakwamba ngwenyi: “Kahou mujimbu wamwaza waWangana navakawambulula hamavu hosena, nakupwa unjiho kuli vaka-mafuchi osena, numbanyi kukuma chikeze.”—Mateu 24:14.