Ngwakolelele mungalila yatwamina kwakamwihi nanganda yaRome mulifuchi lyaItaly, ngalila yize yatwama navatu vakuhutwa. Ngocho chiyoyelo chapwilenga chachikalu. Kangwatachikijile mama wakungusemako, kaha nawa katwalivwasanyinenga natatako. Ngocho, ngwalinangwile chiyoyelo chamumikwakwa.

Ngwaputukile kwiva omu ngwapwile namyaka yakusemuka 10. Ngwafumine hembo lwola lwatete omu ngwapwile namyaka yakusemuka 12. Mapapa kakavulu tupokola vangukwachilenga, oloze tata ayilenga nakungusokola nakungukindulwisa cheka hembo. Ngwalikokojweselenga navatu lwola lwosena. Kahomu ngwapwile namyaka yakusemuka 14 ngwafumine hembo nakuhona kukinduluka cheka. Ngwaputukile kunwa maundu akupendesa, nakuyoyela mumikwakwa. Kangwapwile nakwakusavalako, ngocho ngwasavalilenga muminyau yambala chakuhona vavene kutachikiza, nakufumamo chimenemene. Kaha kufumaho, ngwayilenga nakutondatonda meya mangana ngusane.

Ngwatachikijile kanawa mwakwivila vyuma. Hakavanga ngwahukwilenga vyuma vyambala mujingonga javatu, kaha kutwala muze ngwapupilenga vyuma mujizuvo javatu halwola lwaufuku. Vatu vavavulu vatachikijile vilinga vyami vyavipi, ngocho lizavu lyavasamalyamba lyangusanyikile mangana tuputuke kuzachila hamwe. Echi changulingishile nguputuke jino nakupupa jinyambaulu. Hakuwana nge ngwapwile namuchima waupi chikuma, ngocho vakwetu vasamalyamba vanguhanyinga kalemesa. Lwola lwosena ngwatambukilenga nauta nakusavala nawo kumitwe. Ngwazanyinenga muulyanyi, nakunwa maundu akupendesa, nakwiva, nakuzachisa hanjikiso yakasautu, nakulinga ujila. Ngocho, tupokolo vapwilenga nakungutonda lwola lwosena. Vangukwachilenga mapapa kakavulu, kaha myaka yayivulu ngwapwilenga mukamenga.

Omu ngwafumine mukamenga, ngwayile nakumeneka mama wakanyike. Kuheta kuze ngwalikomokelele hakuwana nge, mama wakanyike navasongo jami vavali vapwa Vinjiho jaYehova. Vangulwezele nguyenga navo kukukunguluka. Hakusaka kutachikiza vyuma vyeji kusolokanga, ngocho ngwetavile kuya navo. Omu twahetele haZuvo yaWangana, ngwavalwezele ngwami nangutwamina kuchikolo mangana ngumone kanawa vatu vaze navalovoka navaze navengila. Kaha nawa ngwayile nauta wami.

Kukunguluka kana changukafwile ngwalumune kuyoya chami. Omu ngwahatele haZuvo yaWangana, vatu ngwakawanyineko vapwile navilinga vyakulihandununa navilinga vyami. Vatu kana vangutambwokesele nachisambo, kaha nawa vapwile vakuwahilila. Nguchili lika nakwanuka chisambo vangusolwelele namuchima wavo wamwaza vasolwele. Vilinga vyavatu ngwakawanyine vyalihandunwine chikuma navyavatu ngwalikachilenga navo.

Kutwala muze ngwaputukile kulinangula Mbimbiliya naVinjiho jaYehova. Omu ngwatwalileho kulinangula, ngwamwene jino ngwami ngwatela kwalumuna chiyoyelo chami. Ngwashinganyekelenga hamazu atwama hali Vishimo 13:20 akwamba ngwawo: “Ou mwatambuka navaka-mangana mwakapwa muka-mangana, oloze ou mwalikatanga naviheu mwakamona lupi.” Kaha ngwashinganyekele ngwami ngwatelele kufuma halizavu lyavasamalyamba. Kachapwile chachashi kulinga ngochoko, oloze Yehova angukafwile, kaha ngwafumine halizavu kana.

Kaha nawa ngwaputukile kulitomesa kumujimba. Ngwakilikichile nangolo mangana ngwechenga kunwa makanya namaundu akupendesa. Kaha nawa, ngwatewile jikambu, nakufumisa vimbilingwa vyakumatwitwi, nakulitwamina kuzachisanga hanjikiso yakasautu. Halwola kanelu, hakiko jino ngwaputukile kupwa namuchima wakulikanyisa kulinga vyuma vyavipi.

Kufuma vene kuwinyike wami, ami kangwazanga kutanga nakulinangulako, shikaho changukaluhwililenga kuhaka chikuma mangana kuvyuma ngwalinangwilenga muMbimbiliya. Chipwe ngocho, ngwalihakililileko mangana kulinangule kaha mukuhita chalwola ngwaputukile kuzanga Yehova, oloze chivezu chaputukile kunguyanjisa. Ngwapwile nakushinganyeka ngwami Yehova keshi kungukonekelako, mwomwo yavyuma vyavipi vize ngwalingilenga kunyima. Oloze ngwatangile mujimbu waMwangana Ndavichi, uze alingile shili yayinene nomu Yehova amukonekelele. Ngocho mujimbu kana wanguvendejekele chikuma.—Samwele 2, 11:1–12:13.

Ukalu ukwavo ngwapwile nawo shina, wakwambulila vatu kuzuvo hizuvo. (Mateu 28:19, 20) Ngwalizakaminyinenga ngwami pamo nangukaliwana namutu uze ngwevwishile kumuchima kupihya chipwe uze ngwalingile mwamupi. Oloze mukuhita chalwola, kulizakamina chami chakumine. Ngwaputukile kulivwisa kuwaha kukafwako vatu veka mangana navakiko vatachikize Setu wamwilu uze eji kukonekelanga mwamunene.

Kulinangula hali Yehova chinayovola mwono wami. Masepa jami vamwe vaze ngwapwile navo vafwa lyehi, kaha vakwavo vachili mukamenga, oloze ami nguli nakulivwisa kuwaha kuyoya nakutalilila vyuma vyamwaza vili nakwiza kulutwe. Ngunalinangula kupwa namuchima wakulinyisa nakupwa wakwononoka nakukehesako muchima wami wamatoto chikuma. Echi chinangukafwe ngutwame mukuunda navakwetu. Oholyapwa jino ngwapwa nguwakuwahilila hamwe kaha napuwami Carmen. Tweji kuzachilanga hamwe hakukafwa vatu valinangule Mbimbiliya, kahechi cheji kutulingisanga tuwahilile.

Ngweji kuzatanga jino milimo yamwenemwene, kaha shimbu jimwe ngweji kuzachilanga kujinyambaulu, keshi nakwivako oloze nakuwahisako kaha.