David Cunningham uze alinangula chikuma vyakwitava, ambile ngwenyi: “Katwafwelela ngwetu Kalunga atwama nalijinako, kaha nge atwama nalyo, kaha katwalitachikizako.”

Kalunga ambile ngwenyi: “Ami yami Yehova. Eli likiko lijina lyami.” (Isaya 42:8) Lijina lyaYehova lyafuma kulizu lyachiHepeleu lize lyalumbununa ngwalyo “Eji Kulingisanga Vyuma Kupwako.”—Kuputuka 2:4, kwinyikila chamwishi.

Yehova asaka tuzachisenga lijina lyenyi. Mbimbiliya ngwayo: “Musanyikenu halijina lyenyi. Lwezenu vatu veka naveka milimo yenyi. Vilikenu ngwenu lijina lyenyi lyazezuka helu.”—Isaya 12:4.

Yesu azachishilenga lijina lyaKalunga. Omu alombele kuli Yehova, ambile ngwenyi: “Ami ngunalingisa lijina lyove valitachikize [tumbaji], kaha nangukalilingisa vakalitachikize nawa.” Mwomwo ika asakilile tumaji twenyi vatachikize lijina lyaKalunga? Atwalileho ngwenyi: “Mangana vazangenga vakwavo nganomu [yove Kalunga] unanguzange ami, kahami nawa ngulikate navakiko.”—Yowano 17:26.

Walter Lowrie uze alinangula vyakwitava ambile ngwenyi: “Mutu uze katachikiza lijina lyaKalungako, kamona Kalunga kupwa himutu nahenyiko. Ngocho keshi kuhasa kumuzangako, mwomwo ashinganyeka ngwenyi kakwatwama Kalungako.”

Lunga umwe walijina lyaVictor ayilenga kuchachi chalumingo hichalumingo, oloze katachikijile kanawa Kalungako. Ambile ngwenyi: “Omu ngwatachikijile ngwami Kalunga lijina lyenyi ikiye Yehova, ngwawahililile chikuma. Ngwevwile kwijiva nge ngunaliwane meso nameso namutu uze ngwevwilenga kaha puho. Ngwamwene jino ngwami kumana Kalunga kwatwama, ngocho ngwatungile usepa wakukola naikiye.”

Yehova eji kupandamanga kuvatu vaze veji kuzachisanga lijina lyenyi. Kalunga ashika vaze ‘veji kushinganyekanga halijina lyenyi’ ngwenyi: “Nangukavatetela nge muze lunga mwatetela mwanenyi uze eji kumwononokanga.” (Malaki 3:16, 17) Kaha nawa eji kufwetanga vosena vaze veji kusanyikanga halijina lyenyi. Mbimbiliya ngwayo: “Weshowo mwasanyika halijina lyaYehova navakamulwila.”—Wavaka-Loma 10:13.