CHIHANDE CHACHINENE | MAKULI AZE ALINGISA VATU VAHONE KUZANGA KALUNGA
Chavakaluhwilile Kuzanga Kalunga
“‘Zangenunga Yehova Kalunga kenu namichima yenu yosena, namyono yenu yosena, navishinganyeka vyenu vyosena.’ Elu lukiko lushimbi lwalulemu kaha nawa lukiko lwatete.”—Yesu Kulishitu, 33 C.E. *
Vatu vamwe cheji kuvakaluhwilanga kuzanga Kalunga, mwomwo vashinganyeka ngwavo apwa wamukalu kumutachikiza, katuzakamako, kaha nawa waukenya. Ivwa vyuma vahanjikile vatu vamwe:
Marco wakuItaly ambile ngwenyi: “Numba tuhu ngwalombelenga Kalunga angukafwe, oloze ngwamwene ngwami kanguzakamako. Ngwashinganyekele ngwami Kalunga katwama nazangiko.”
Rosa wakuGuatemala ambile ngwenyi: “Numba tuhu ngwazangile kuzachila Kalunga, oloze chasolokele nge kanguzakamako. Ngwashinganyekele ngwami apwa wamukalu muchima, asaka kaha kutuzangamisa. Kangwafwelelele ngwami atwama nazangiko.”
Raymonde wakuCanada ambile ngwenyi: “Omu ngwapwile ngukanyike, ngwashinganyekelenga ngwami Kalunga apwile nakutondatonda tutenga twetu mangana atuzangamise nge tunalimbenje. Kutwala muze ngwamwene ngwami katuzakamako. Ngwamumwene nge mukulwane wamilimo uze eji kutwaminyinanga vaka-kuzata, oloze kavazangako.”
Nyi ove washinganyeka muka? Kutala Kalunga katuzangako tahi? Vaka-Kulishitu vanahulisanga chihula kana hamyaka yayivulu. Kushikulu, vaka-Kulishitendomu vavavulu kavalombelenga kuli Kalunga Wangolo Josenako. Mwomwo ika? Mwomwo vamwivwilenga chikuma woma. Will Durant uze alinangula vyakushikulu ambile ngwenyi: “Uno muka-shili mwahasa ngachilihi kulomba kuli Kalunga uze kazakama vatuko, kaha nawa atwama halitanda lyakwivwisa woma?”
Chuma muka chalingishile vatu vamone Kalunga kupwa ‘wakwivwisa woma uze nawa kazakama vatuko’? Uno Mbimbiliya yanangula vyuma muka hali Kalunga? Uno kulinangula vyuma vyamuchano hali Kalunga chinahase kukukafwa umuzange tahi?