Chachi yaKatolika nayavaka-Orthodoxy nayavaka-Polotesitati yamukwitava chaVaka-Kulishitu, jikiko “jichachi jajinene jitatu jize janangula ngwajo Kalunga apwa mutatu. Kulumbununa Kalunga Tata, Kalunga Mwana, naKalunga Shipilitu Wajila. Kweseka nakwitava chavaka-Kulishitu, echi kunangula kana kachalumbununa nge tulunga vapwa vatatuko, oloze chalumbununa nge Kalunga apwa muvihanda vitatu.”—The New Encyclopædia Britannica.

Yesu uze apwa Mwana Kalunga kahanjikile ngwenyi eseka hamwe naIseko. Oloze ahanjikile ngwenyi: “Nguli nakuya kuli Tata, mwomwo Tata anguhambakana ami.” (Yowano 14:28) Kaha nawa alwezele muka-kumukavangiza umwe ngwenyi: “Nguli nakuya mwilu kuli Tata uze apwa Senu nayenu, kuli Kalunga kami uze apwa Kalunga kenu nayenu.”—Yowano 20:17.

Shipilitu yajila kayapwa mutuko. Mbimbiliya ngwayo vaka-Kulishitu vakulivanga “vazalile nashipilitu yajila,” kaha nawa Yehova ahanjikile ngwenyi: “Nangukahingunwina shipilitu yami hali vatu vosena.” (Vilinga 2:1-4, 17) Shikaho, shipilitu yajila kayapwa Kalungako, oloze yapwa ngolo jaKalunga.

Karl Rahner naHerbert Vorgrimler vaze valinangula vyakwitava chaKatolika vambile ngwavo, kunangula chaTulunga vatatu “chachikalu kuchivwishisa chakuzeneka kutukafwa kuli Kalunga, kaha numba nge mwatukafwa, kacheshi kupwa chachashi kuchivwishisako.” Shikaho, kunangula kana chatulingisa tuhone kutachikiza Kalunga nakumuzanga, mwomwo katweshi kuhasa kuzanga mutu uze katwatachikizako.

Marco uze twashimutwilanga muchihande chakulivanga, ambile ngwenyi, “kunangula chaTulunga vatatu cheji kuhonesanga vatu kutachikiza Kalunga. Ngwamwenenga ngwami Kalunga apwile nakulisweka kuchina nangumutachikiza. Kahechi changulingishile ngumone ngwami katuzakamako, kapwa mutu nahenyiko, kaha nawa wamukalu muchima.” Oloze “Kalunga kapwa Kalunga waliuyako” (Wavaka-Kolinde 1, 14:33) Kalisweka kuli yetuko, oloze asaka tumutachikize. Yesu ambile ngwenyi: “Tweji kulemesanga vyuma twatachikiza.”—Yowano 4:22.

Marco ambile nawa ngwenyi: “Omu vangunangwile ngwavo kwatwama Kalunga umwe kaha, ngwaputukile jino kutunga usepa naikiye.” Nge natumonanga Yehova kupwa mutu nahenyi, kaha nachipwa chachashi kumuzanga. Mbimbiliya ngwayo, “Weshowo azeneka kuzanga vakwavo katachikiza Kalungako, mwomwo Kalunga ikiye zangi.”—WaYowano 1, 4:8.