Mukanda waCatechism of the Catholic Church, wamba ngwavo: “Nge vatu vaze veji kulinganga shili vanafu myono yavo yeji kushikumukanga muhelo chipwe ngwetu ‘mukakahya kakuzeneka kukuma’ nakuvazangamisa.” Vatwamina vamwe vamukwitava veji kuhanjikanga ngwavo vatu vaze veji kuyanga muhelo vahanduka kuli Kalunga.

Mbimbiliya ngwayo: “Mwono uze nauvulumuna ukiko naufwa.” (Ezekele 18:4) Kaha nawa yamba ngwayo, “vafu kavatachikiza chuma numba chimweko.” (Muka-kwambulula 9:5) Kachi nge mwono weji kufwanga, kaha uze mwafwa katachikiza chuma numba chimweko, jino nahase kuyanda ngachili “mukakahya kakuzeneka kukuma” chipwe kuhanduka kuli Kalunga?

Lizu lyachiHepeleu nalyachiHelase lize valumuna ngwavo “helo,” lyalumbununa fuka yavatu vosena. Chakutalilaho, omu Yopa apwile nakuviza musongo waupi chikuma, alombele ngwenyi: “Nachiwaha nge mungusweka mufuka, chipwe [“muhelo,” kweseka naMbimbiliya yaDouay-Rheims Version].” (Yopa 14:13) Yopa asakile kusavala mufuka keshi nge kupwa muchihela chakuyekelesela chipwe chize nachimusosolola kuli Kalungako.

Kunangula chakwamba ngwavo Kalunga apwa waukenya cheji kutuhonesanga kupanda kuli ikiye. Rocío wakuMexico ambile ngwenyi: “Kufuma vene kuukemba vangunangwilenga vyakakahya kahelo. Ngocho ngwevwilenga woma chikuma, kaha ngwashinganyekelenga ngwami Kalunga katwama navilinga vyamwazako. Ngwamumwenenga kupwa wamatoto kaha nawa wakukakama muchima.”

Vyuma yahanjika Mbimbiliya hakusopesa chaKalunga nahavyuma vyeji kusolokanga kuli mutu nge nafu, vyakafwile Rocío echenga kumona Kalunga kupwa waukenya. Ambile ngwenyi: “Ngwevwile nakumuchima hwo, kwijiva nge vanangutulu chiteli. Ngwaputukile kufwelela ngwami Kalunga atuzanga, asaka tuyoyenga kanawa, kaha nawa nayami ngunahase kumuzanga. Apwa ngana mwachisemi uze eji kukwachililanga vana venyi kulivoko mangana avakinge.”—Isaya 41:13.

Vatu vavavulu veji kuzachilanga Kalunga mwomwo yakwivwa woma wakakahya kahelo, oloze Kalunga kasaka mutu amulemese mwomwo yakumwivwa womako. Yesu ahanjikile ngwenyi: “Zangenunga Yehova Kalunga kenu.” (Mako 12:29, 30) Kachi nge natutachikiza ngwetu Kalunga kapwa waukenyako, kaha katweshi kulizakamina vyakusopesa chenyi chakulutweko. Ngana muze chapwile kuli Elihu sepa lyaYopa, nayetu tunahase kuhanjika nakukunyuka ngwetu: “Nachipwa chakuhenga kuli Kalunga wamuchano kulinga vyuma vyavipi, chipwe ou Wangolo Josena kulinga vyuma vyakuhenga.”—Yopa 34:10.