“Ami Ngunalingisa Lijina Lyove Valitachikize”

“Ami ngunajimbula lyehi lijina lyove kuvatu ava wanguhanyine kufuma mukaye. . . . Ami ngunalingisa lijina lyove valitachikize, kaha nangukalilingisa vakalitachikize nawa.”—YOWANO 17:6, 26.

Omwo Chalumbunukila: Yesu alingishile lijina lyaKalunga valitachikize kuvatu hakulizachisa mumulimo wenyi wakwambulula. Chasoloka nge Yesu avulukilenga lijina lyaKalunga mapapa kakavulu omu atangilenga Visoneka. (Luka 4:16-21) Anangwile vaka-kumukavangiza valombenga ngwavo: “Ove Setu, lijina lyove lipwenga lyajila.”—Luka 11:2.

Omwo Vaka-Kulishitu vaKulivanga Vazachishilenga Lijina lyaKalunga: Kaposetolo Petulu alwezele vakulwane jamalunga vamuYelusalema ngwenyi, Kalunga nasakula “vatu navavulukilanga lijina lyenyi” kufuma muli vaka-mafuchi. (Vilinga 15:14) Vaposetolo navakwavo vaka-Kulishitu vambulwilenga ngwavo, “weshowo mwasanyika halijina lyaYehova navakamulwila.” (Vilinga 2:21; Wavaka-Loma 10:13) Vazachishilenga nawa lijina lyaKalunga mumikanda yize vasonekelenga. Mukanda waTosefta, wajishimbi jahakanwa kaha, uze vakumishile kusoneka mu 300 C.E., wavulukile vyamikanda yavaka-Kulishitu yize vochele kuli vaka-kole javo ngwawo: “Mikanda yaVaka-kwambulula namikanda yavaminim [vaze vapwa vaka-Kulishitu vavaYuleya] kavayikingile kukakahyako. Oloze vali nakuyochela kuze yili, kaha vali nakuyochela kumwe namazu aze apwilemo, aze apwile naLijina lyaKalunga.”

Veya Veji Kuzachisanga Lijina lyaKalunga Makumbi Ano? Halipapilo lyakuputukilako lyaMbimbiliya yaRevised Standard Version yize vetavishile kuliuka lyaNational Council of the Churches of Christ lyamuUnited States vasonekeleho ngwavo: “Chapwa chakuhenga jichachi kuzachisa lijina lyaKalunga mwomwo nachisoloka kwijiva nge kwatwama tulunga veka vaze twatela kumuhandulako. Shikaho shimbu kanda vaka-Kulishitu, kwitava chavaYuleya chalitwaminyinyine kuzachisa lijina lyaKalunga.” Ngocho vaputukile kuzachisa vulukiso yakwamba ngwavo, “MWATA” muchishishisa chakuzachisa lijina lyaKalunga. Mumyaka yakalinwomu ngana, liuka lyaVatican lyalwezele vambishopu vamuliuka kana ngwalyo: “Kavatela kuzachisa chipwe kuvuluka lijina lyaKalunga lize vasoneka muvasona vavuluka ngwavo Tetalangalamatoni YHWH * mumyaso chipwe mukulombako.”

Veya veji kuzachisanga lijina lyaKalunga nakulitandakanyisa kuvatu makumbi ano? Omu Sergey apwile nakutwama mulifuchi lyaKyrgyzstan atalile vindiyo yize yasolwele nge lijina lyaKalunga ikiye Yehova. Halwola kana apwile namyaka yakusemuka kafwe 15. Atwamine myaka kafwe 10 chakuzeneka kwivwa lijina lyaKalunga. Kutwala muze, omu Sergey alukilile kuUnited States Vinjiho jaYehova vejile kuzuvo yenyi kaha vamulwekesele lijina lyaKalunga muMbimbiliya. Ou mukweze awahililile chikuma kuwana liuka lize lyazachisa lijina lyaYehova. Mukanda waWebster’s Third New International Dictionary walumbununa omwo alumbunukila mazu akwamba ngwavo “Yehova Kalunga.” Ou mukanda wahanjika ngwawo, mazu kana alumbununa “Kalunga wakulitulaho hatulunga vosena uze veji kulemesanga kuli Vinjiho jaYehova.”

[Kwinyikila chamwishi]