“Mujimbu Wamwaza Wawangana Navakawambulula”
“Mujimbu Wamwaza Wawangana Navakawambulula”
“Mujimbu wamwaza waWangana navakawambulula hamavu hosena, nakupwa unjiho kuli vaka-mafuchi osena, numbanyi kukuma chikeze.”—MATEU 24:14.
Omwo Chalumbunukila: Luka uze asonekele mukanda umwe waMujimbu Wamwaza ahanjikile hali Yesu ngwenyi: “Yesu ayile nakutambwojoka munganda hinganda namulimbo hilimbo, nakwambulula nakuvilika mujimbu wamwaza waWangana waKalunga.” (Luka 8:1) Yesu ambile ngwenyi: “Ngwatela kwambulula mujimbu wamwaza waWangana waKalunga nakujinganda jeka nawa, mwomwo vikiko vene vangutuminyine.” (Luka 4:43) Atumine tumbaji twenyi mangana vayenga nakwambulula mujimbu wamwaza mujinganda namumembo. Kufumaho avalwezele ngwenyi: “Namukapwanga muvinjiho jami, . . . kuvihela vyakwakusuku vyahamavu.”—Vilinga 1:8; Luka 10:1.
Mujila Vaka-Kulishitu Vakulivanga Vakavangijililemo Mazu Kana: Tumbaji twaYesu kavalangishile kulinga vyuma avalwezele Yesuko. “Kavalitwaminyine kunangula vatu hakumbi hakumbi mutembele nakuzuvo hizuvo nakwambulula mujimbu wamwaza wakuvuluka Kulishitu[ko].” (Vilinga 5:42) Mulimo wakwambulula vauzachilenga kuli vatu vosena muchikungulwilo, kuli vatu vavalemu navavavamokomoko. Neander uze alinangula vyakushikulu ambile ngwenyi: “Celsus uze apwile muka-kole wavaka-Kulishitu vakulivanga ambile ngwenyi, navaka-kuteula mikoko, navaka-kutonga jisapato, navaka-kukonga malambu, navatu vaze kavatangako navatu vosena muchivulu vapwile vaka-kwambulula mujimbu wamwaza vatwima.” Jean Bernardi asonekele mumukanda waThe Early Centuries of the Church ngwenyi: “[Vaka-Kulishitu] vayilenga kukala chihela nakwambulila vatu vosena. Vatambwojokelenga mumikwakwa, namujinganda, nakuvihela vyasanga namumembo. Vambulililenga vatu vaze vavatambwokeselenga navaze kavavatombwokeselengako. . . . Vambulwilile kwalenga mavu kwosena.”
Veya Vanakwambulula Mujimbu Wamwaza Makumbi Ano? David Watson uze apwa kapilishitu muchachi yaAnglican asonekele ngwenyi: “Vatu vanalitwamina kuzachila Kalunga mwomwo jichachi kajeshi nakwambulula nakunangula vatuko.” José Luis Pérez Guadalupe asonekele kutalisa kumilimo yamuchachi yaEvangelicals, nachachi yaAdventists najichachi jeka mumukanda wenyi waWhy Are the Catholics Leaving? ngwenyi: “Kavaya nakwambula kuzuvo hizuvoko.” Kaha ahanjikile hali Vinjiho jaYehova ngwenyi: “Veji kuyanga nakwambulula kuzuvo hizuvo lwola lwosena.”
Mumukanda waCato Supreme Court Review wamu 2001 na 2002 vasonekamo vyuma ahanjikile Jonathan Turley mutu uze alinangula chikuma. Ahanjikile hali Vinjiho jaYehova ngwenyi: “Kachi nge mutu mwavuluka Vinjiho jaYehova, vatu vosena navashinganyeka hali vatu vaze veji kwizanga nakwambulula kujizuvo jetu halwola luze katwashinganyekanga ngwetu navezako. Kwambulula kuzuvo hizuvo cheji kuvakafwanga vatandakanyise vyuma vafwelela, nakuvakafwa nawa vapwenga nalufwelelo lwakukola.”
[Lipwata]
Veya Unamono Ngwove Vatwama muKwitava chaVaka-Kulishitu Vamuchano?
Kweseka navyuma vyamuvisoneka tunashimutwila muchihande chino, veya unamono ngwove vatwama mukwitava chavaka-Kulishitu vamuchano makumbi ano? Numba tuhu kuli jichachi navatu vavavulu chikuma vaze vali nakulivuluka ngwavo vapwa vaka-Kulishitu, oloze watela kwanukanga mazu aYesu aze alwezele vaka-kumukavangiza ngwenyi: “Keshi nge vosena vaze vali nakwamba kuli ami ngwavo, ‘Ove Mwata, Ove Mwata,’ navakengila muWangana wameluko, shina vaze kaha vali nakulinga mwaya muchima waTata uze ali mwilu.” (Mateu 7:21) Kachi nge nautachikiza kwitava chavaka-Kulishitu vamuchano vaze vali nakulinga mwaya muchima waSetu Kalunga nakulikata navo, kaha naukalivwisa kuwaha vyuma vyamwaza vize naukalinga Wangana waKalunga. Tunakulombo uhulise Vinjiho jaYehova vyuma vyavivulu kutalisa kuWangana waKalunga navyuma vyamwaza naukalingila vatu.—Luka 4:43.