‘Twamenunga muMazu Ami’

“Kachi nge namutwamanga mumazu ami, kaha chikupu vene munapu mutumbaji twami. Namutachikiza muchano, kaha muchano naumilingisa kupwa vakulihehwa.”—YOWANO 8:31, 32.

Omwo Chalumbunukila: ‘Mazu’ aYesu alumbununa vyuma anangwilenga vize vyafumine kuli Kalunga. Yesu ambile ngwenyi: “Tata uze angutumine ikiye nanguhane lushimbi lwavyuma ngwatela kwambulula navyuma ngwatela kuhanjika.” (Yowano 12:49) Yesu alombele kuli Ise wamwilu Yehova Kalunga ngwenyi: “Mazu ove apwa muchano.” Kakavulu Yesu azachishilenga mazu aKalunga hakunangula vatu. (Yowano 17:17; Mateu 4:4, 7, 10) Chikupu vene vaka-Kulishitu vamuchano veji ‘kutwamanga mumazu enyi,’ kulumbununa nge veji kwitavilanga Mazu aKalunga Mbimbiliya aze apwa “muchano” nakuwakavangizanga. Kaha nawa vamona ngwavo vyuma vafwelela vyapendamina haMazu aKalunga.

Omwo Vaka-Kulishitu Vakulivanga Vakavangijilenga Mazu aKalunga: Kaposetolo Paulu amwenenga Mazu aKalunga kupwa amalemu ngana muze awamwenenga Yesu. Ngocho asonekele ngwenyi: ‘Visoneka vyosena vavihwima kuli Kalunga, kaha vinawahila kunangula.’ (WaChimoteu 2, 3:16) Malunga vatongola vaze veji kunangulanga vakwavo vaka-Kulishitu vatela kupwa ‘vaka-kulinjilila kuMazu aKalunga amuchano.’ (WaChituse 1:7, 9, The Amplified Bible) Vaka-Kulishitu vakulinga vavakolezezele vakane “mangana autu, nakutangisa chamokomoko nge omu mwaya visemwa vyavatu, nge omu mwaya vyuma vyamaputukilo vyakaye, oloze keshi nge omu atwala Kulishituko.”—Wavaka-Kolose 2:8.

Veya Veji Kukavangizanga Mazu aKalunga Makumbi Ano?: Mukanda waCatechism of the Catholic Church wambile ngwawo: “Chachi yaKatolika yamona visemwa vyavo kupwa vyavilemu ngana mwaVisoneka Vyajila. Ngocho veji kunangulanga nakwitavila vyuma vyamuvisemwa navize vyatwama muVisoneka Vyajila.” Mumangazini yaMaclean mwapwile chihande chimwe chize chahanjikile hali chilolo umwe wapwevo wamuToronto muCanada, uze ahulishile ngwenyi: “Mwomwo ika natukavangijila vyuma vize vasonekele myaka kafwe 2000 kunyima?” Kaha nawa ambile ngwenyi: “Twatwama najishimbi jetu jize twatela kukavangiza, oloze tuli nakuhona kujikavangiza mwomwo yakunangula chaYesu navyuma vyahanjika Visoneka.”

Mukanda waNew Catholic Encyclopedia wahanjikile kutalisa hali Vinjiho jaYehova ngwawo: “Vyuma veji kunangulanga Vinjiho jaYehova navize vafwelela vyapendamina kaha haMbimbiliya.” Kalinwomu ngana, omu Chinjiho chaYehova umwe wapwevo apwile nakulijimbula kuli lunga umwe mulifuchi lyaCanada, ou lunga enyikile Mbimbiliya nakumwamba ngwenyi: “Ngwakutachikiza ngwami uChinjiho chaYehova, mwomwo Vinjiho jaYehova vakiko kaha vazanga kuzachisa Mbimbiliya.”