Uno Vatu Vosena Vaze Valivuluka Kupwa Vaka-Kulishitu Vapwa Vaka-Kulishitu Vamuchano Tahi?

UNO vaka-Kulishitu vapwa vangahi? Mukanda waAtlas of Global Christianity wambile ngwawo, mu 2010 kwapwile vaka-Kulishitu kafwe jimbiliyoni 2.3 mukaye kosena. Oloze mukanda kana wambile nawa ngwawo vaka-Kulishitu kana vafuma kujichachi jakuhambakana 41,000. Kaha chachi hichachi yatwama nakunangula chayo najishimbi jayo. Echi kuvula chajichachi javaze veji kulivulukanga ngwavo vaka-Kulishitu chinalingisa vatu vavavulu vahuhwasane nakuhona kusakula chachi yize vanahase kupandamako. Vanahase kulihulisa ngwavo, ‘Uno vatu vosena vaze valivuluka kupwa vaka-Kulishitu vapwa vaka-Kulishitu vamuchano tahi?’

Tutalenu hachihande kana hakuzachisa chakutalilaho chino: Mutu uze ali nakuya mulifuchi lyeka eji kusonekesanga lijina lyenyi hamuseto. Mutu kana kakumina kaha hakusonekesa lijina lyenyiko, oloze eji kuhananga nawa lipapilo lyakusolola kulifuchi nafumu. Lipapilo kana linahase kupwa lipapilo lyakumwitavisa kwingila mulifuchi lyeka. Chochimwe nawa vaka-Kulishitu vamuchano kavatela kukumina kaha hakuhanjika ngwavo twafwelela Kulishituko, oloze vatela kupwa navyuma vyakuvatachikijilaho. Vyuma muka vene ovyo?

Lizu “vaka-Kulishitu” vaputukile kulizachisa hanyima yamwaka wa 44 C.E. Luka uze asonekele mukunda umwe waMujimbu Wamwaza ambile ngwenyi: “KuAndeyoka kukiko vene vavangilile kuvuluka tumbaji ngwavo vaka-Kulishitu kweseka nomu atwaminyinyine Kalunga.” (Vilinga 11:26) Vaze vapwile nakuvulukanga ngwavo vaka-Kulishitu vapwile tumbaji twaKulishitu. Chuma muka cheji kulingisanga mutu atengamo kupwa kambaji kaKulishitu? Mukanda waThe New International Dictionary of New Testament Theology walumbununa ngwawo: “Kupwa kambaji kaKulishitu chalumbununa kulisuula kukavangiza Yesu mukuyoya chamutu chosena.” Shikaho muka-Kulishitu wamuchano eji kukavangizanga jishimbi navyuma vyosena anangwilenga Yesu uze aputukile kwitava chavaka-Kulishitu.

Kutala havatu vaze veji kulivulukanga kupwa vaka-Kulishitu makumbi ano, unahase kuwanaho navatu vaze veji kukavangizanga jishimbi navyuma anangwilenga Yesu tahi? Vyuma muka ahanjikile Yesu vize vatela kutachikijilaho vaka-kumukavangiza? Tunakulombo uwane omwo Mbimbiliya yakumbulula vihula kana. Muvihande vinakavangizaho natushimutwila vyuma 5 ahanjikile Yesu vize twatela kutachikijilaho vaka-kumukavangiza vamuchano. Natumona nawa omwo vaka-Kulishitu vakulivanga vasolwele vyuma kana. Kaha natumona nawa vatu vaze vali nakusolola vyuma kana makumbi ano havatu vaze valivuluka kupwa vaka-Kulishitu.