“Vakiko Kaveshi Vakukayeko”

“Kaye kanavahungu, mwomwo vakiko kaveshi vakukayeko.”—YOWANO 17:14.

Omwo Chalumbunukila: Hakuwana nge Yesu kapwile wamukayeko, ngocho kazanyinenga muvihande vyalifuchi nachiyuloko. Ambile ngwenyi: “Nge Wangana wami wapwanga wamukaye kano, kachi vaka-kungukafwa vanalu mangana vazeneke kungutwala kuli vaYuleya. Olozenyi Wangana wami kaweshi wamukaye kanoko.” (Yowano 18:36) Alwezele nawa vaka-kumukavangiza valihende kuvilinga nahanjikiso yayipi yize yalimbalaka naMazu aKalunga.—Mateu 20:25-27.

Omwo Vaka-Kulishitu Vakulivanga Vasolwele Ngwavo Kavapwile vamuKayeko: Jonathan Dymond uze apwile muka-kusoneka vyuma vyahanjika hakwitava ambile ngwenyi: Vaka-Kulishitu vakulivanga “kavazanyinenga mujitako chamokomoko nakuvatoleka chipwe kuvakasa mutumenga chipwe vene kuvajiha.” Valisuwilenga kuvayanjisa kuhambakana kwazana muvihande vyalifuchi nachiyulo. Vilinga vyavo vyamwaza nawa vyavasolwele nge kavapwile vakukayeko. Vaka-Kulishitu vavalwezele ngwavo: “Mwomwo enu kamweshi kulahila navo hamwe muvilinga vyakuhuka vyamajiloko, ngocho veji kumisaulanga.” (WaPetulu 1, 4:4) Will Durant uze alinangwile vyakushikulu asonekele ngwenyi: “Vaka-Kulishitu vapwilenga nakwivwisa kupihya vatu vamukaye vaze vazangile chikuma viseke navilika vyavo vyamukwitava.”

Vatu Muka Vaze Kavapwa Vamukayeko Makumbi Ano? Mukanda waNew Catholic Encyclopedia wahanjikile kutalisa kuli vaka-Kulishitu vaze kavazana muvihande vyalifuchi nachiyuloko ngwawo: “Chapwa chakuhenga vaka-Kulishitu kuhona kwazana mujita.” Muchihande chimwe chamumangazini yakwamba ngwavo Reformierte Presse vasonekelemo vyuma vyapwile mulipoti lyaliuka lyatala halisesa lyavatu vamuAfrica lize lyahanjikile ngwalyo, jachachi josena jazanyinenga mukulijiha chapwileko muRwanda mu 1994 mwomwo yakulitala hamiyachi, “kufumisaho kaha Vinjiho jaYehova.”

Mulongeshi wahashikola yimwe ahanjikile kutalisa kujita yavaka-Nazi ngwenyi: “Kakweshi lizavu lyavatu chipwe liuka lize lyahonene kuhanjika vyuma vyamakuli nakwazana muuhwanga mwomwo yavyuma vyavipi vyasolokelengako.” Oloze omu ahehwojwele mijimbu yahanjika hajijita yize awanyine muzuvo yakulamina vyuma vyakushikulu yamuUnited States, asonekele ngwenyi: “Ngwatachikijile jino muchano hachihande kana.” Chikupu vene ou mulongeshi atachikijile jino ngwenyi Vinjiho jaYehova vomikile mwomwo yalufwelelo lwavo chamokomoko nakuvayanjisa.

Uno katwamino kavo kauKulishitu kapwa ngachilihi? Mangazini ya U.S. Catholics yambile ngwayo: “Makumbi ano vakweze vavavulu vaze vanakolo lyehi vamuKatolika vanakukana kunangula chamuchachi chakutalisa kuvihande vyapwevo nalunga kulyalwisa nakulisavala shimbu kanda vatu valimbate.” Mumukanda umwe mwapwile mazu aze ahanjikile ndikoni wamuchachi yimwe ngwenyi: “Ngunamononga vatu vavavulu vaze vanalyalwisanga nakulisavala shimbu kanda valimbate.” Mukanda waThe New Encyclopædia Britannica wambile ngwawo: “Vinjiho jaYehova veji kufwilanga kupwa navilinga vyamwaza kala lwola.”