Omu ngwapwile ngukanyike tanga yetu yatwaminenga kwakamwihi nangalila yaLeipzig, kumututuko waGermany, kaha nawa ngalila kana yapwililile kwakamwihi nangiza yalifuchi lyaCzech naPolish. Kahomu ngwapwile namyaka yakusemuka 6, tata vamutumine kuya nakuzachila chatete kuBrazil kufumaho kuEcuador.

Omu ngwapwile namyaka 14, ngwayile nakutangila shikola kuGermany. Hakuwana nge visemi jami vapwile kuSouth America, ngocho ngwalizakaminenga ami ivene. Kahechi changulingishile ngupwenga nguwakulimanyina. Ngwalingilenga kala chuma ngwasakile chakuzeneka kushinganyeka omu navevwa vakwetu.

Omu ngwapwile namyaka 17, ami navisemi jami twakindulukile kuGermany. Hakavanga twatwaminenga hamwe. Oloze kutwala muze muchima wakulimanyina wangulingishile nguchiwane kupwa chachikalu kutwama hamwe navisemi jami. Kahomu ngwapwile namyaka 18, ngwafumine hembo.

Ngwafwililile chikuma kutachikiza vyuma vinahase kungulingisa ngupwenga wakuwahilila mukuyoya. Hanyima yakutala chiyoyelo chavatu vavavulu nakutambwojoka chikuma, ngwawanyine nge chuma chachilemu ngwatela kulinga mukuyoya shina kulinangula omu apwa mavu shimbu kanda vatu vawenyeke.

Ngwafumine kuGermany nakuya kuAfrica kuzachisa mutukutuku. Nakushimbula chiku, ngwakindulukile kulitungu lyaEurope nakuwahishisa mutukutuku wami. Kahomu ngwahetele kuchisekeseke chamuPortugal ngwasezele mutukutuku wami mangana nguzachise wato.

Ngocho ngwatondele wato, kaha ngwawanyine vanyike vaze vapwile nakuzauka Kalungalwiji waAtlantic. Havanyike kana hakiko ngwawanyine napuwami Laurie. Chatete twayile kumatungu aCaribbean, kaha hanyima yakutwama chindende muPuerto Rico twakindulukile kuEurope. Twapwile nakutonda kulanda mbopolo yayindende yize natuzachisanga hakuya nakuhema. Oloze hanyima yakutondatonda hatukweji vatatu, vyuma kana kavyateselemoko mwomwo vanguhakile halizavu lyamaswalale vamuGerman.

Ngwapwile muchilombo chamaswalale chamuGerman hatukweji 15. Halwola kanelu hakiko ngwambachile puwami Laurie, kaha twalivwasanyine tutwalilileho lika nachiyoyelo chakutambwojoka. Shimbu kanda nguputuke mulimo wauswalale, twalanjile mbopolo yayindende ngana yize ngwapwile nakutonda hakavanga. Twashinganyekele kutwama mumbopolo twalanjile nakuyizachisa nawa kuyanga nakutala vyuma vyamwaza vyamuno mukaye. Halwola kana ngwechele kuzata mulimo wauswalale, oloze shimbu kanda tukumise ungeji wetu wakutambwojoka, Vinjiho jaYehova vatutambukilile, kaha vaputukile kutunangula Mbimbiliya.

Hakavanga ngwamwene ngwami kakwapwile vyuma vyavivulu vize ngwatelele kwalumuna mukuyoya chamiko mwomwo ngwambachile pwevo wamwenemwene, kaha nawa ngwechele kunwa makanya. (Wavaka-Efwesu 5:5) Hakuwana nge twafwililile kuya nakutalanga vyuma vyamukaye, ngocho ngwashinganyekele ngwami, kutalanga vyuma vize atenga Kalunga chikiko chapwile chachilemu chikuma.

Oloze kuhanjika muchano, ngwatelelele kwalumunako vilinga vyami. Hakuwana nge ngwalivwimbilenga nakupwa namuchima wakulimanyina, ngocho ngwamwenenga uhashi wami navyuma ngwateselengamo kupwa vyavilemu chikuma. Ngwasakilenga kulisuulwisa kaha ami ivene.

Likumbi limwe ngwatangile Chihande chaYesu ChahaPili. (Mateu kapetulu 5-7) Hakavanga kangwevwishishile vyuma ahanjikile Yesu vize vinahase kuneha kuwahililako. Chakutalilaho ahanjikile ngwenyi, vawahilila vaze veji kwivwanga zala nalipwila. (Mateu 5:6) Changukaluhwilile kwivwishisa omu kupwa vakuhutwa chinahase kulingisa mutu awahilile. Omu ngwatwalileho lika kulinangula ngwatachikijile jino ngwami tuvosena twasakiwa vyuma vyakushipilitu. Oloze mutu atela kuvangila kutachikiza chishina kana numba jino alinangule vyuma kana nganomu ahanjikile Yesu ngwenyi: “Vawahilila vaze vejiva ngwavo vasaka vyuma vyakushipilitu.”—Mateu 5:3.

Kufuma haze twaputukile kulinangula Mbimbiliya muGermany, ami napuwami Laurie twalukilile kuFrance kufumaho twayile kuItaly. Kwosena kuze twayilenga twawanyinenga Vinjiho jaYehova. Ngwevwilenga kuwaha hakumona zangi yavo nakulinunga chavo. Ngwamwene ngwami Vinjiho vapwa tanga yimwe mukaye kosena. (Yowano 13:34, 35) Kutwala muze ami naLaurie vatumbapachishile nakupwa Vinjiho jaYehova.

Hanyima yakungumbapachisa ngwatwalileho lika kwalumunako vilinga vyami. Ami naLaurie twayile kulitungu lyaAfrica, kufumaho twavatasanyine kalungalwiji waAtlantic nakuya kuUnited States. Omu twapwile nakuzauka kalungalwiji, twapwile kaha tuvavali muwato. Kahomu twahetele hakachi kakalungalwiji twamwene omu vatujingilikile kumeya. Echi changulingishile ngumone ngwami ngwapwa nguwakukuminamo hakungwesekesa kuli Tengi yetu wamunene. Hakuwana nge ngwapwile nalwola lwaluvulu (katwapwile navyuma vyakulingako omu twapwile hakalungalwiji) ngwazachishile lwola kana ngutange Mbimbiliya. Ngwevwile kuwaha kutanga mujimbu waYesu omu apwile hano hamavu. Apwile wakukupuka, kaha nawa alingilenga vyuma vyavilemu chikuma, oloze kalivwimbileko. Asakilenga kusuulwisa Yehova, keshi kulisuulwisa iveneko.

Omu ngwashinganyekele chikuma hachakutalilaho chaYesu, ngwamwene jino ngwami ngwatelele kuhaka Wangana waKalunga kulutwe mukuyoya chami, keshi kutwalaho kulinga vyuma ngwafwililileko. (Mateu 6:33) Kahomu twahete muUnited States twafwililile kutwama vene kuze mangana tuzachile kanawa Yehova.

Numba tuhu hakavanga ngwapwilenga namuchima wakusaka kulinga vyuma ngwasakilenga, oloze changukaluhwililenga kusakula vyakulinga. Oholyapwa ngunawane jino mutu wamulemu chikuma wakungutwaminyina. (Isaya 48:17, 18) Ngunatachikiza jino ngwami kulemesa Kalunga nakukafwa vakwetu valinangule vyaIkiye, vikiko navingulingisa ngupwenga nguwakuwahilila.

Kukavangiza jindongi jamuMbimbiliya chinazamisa chikuma ulo wetu. Kaha nawa Kalunga natukisula hakutuhana mwana wapwevo uze natachikiza Yehova nakumuzanga.

Echi kacheshi nakulumbununa nge vyuma vinapunga lika kanawa mukuyoya chetuko, oloze Yehova ikiye natukafwenga. Shikaho tuli nakufwila kutwalaho lika kuzachila Yehova nakumufwelela chikuma.—Vishimo 3:5, 6.