Mulimo uze Yesu ahakile chikuma kulutwe mukuyoya chenyi chosena shina “kwambulula nakuvilika mujimbu wamwaza waWangana waKalunga.” (Luka 8:1) Azachilenga chikuma nangolo, nakutambuka jitunda jajisuku mulifuchi lyaIsalele mangana anangule vatu vyaWangana waKalunga. Mulimo azachilenga Yesu vausoneka muMikanda yaMujimbu Wamwaza yiwana, muze vavuluka Wangana mapapa akuzomboka 100. Lizu Wangana vasoneka muli eyi mikanda yiwana, lyasoloka chikumanyi mumazu aze ahanjikile Yesu. Chipwe ngocho, vyavivulu vize ahanjikile kutalisa kuWangana kavavisonekako.—Yowano 21:25.

Mwomwo ika Yesu amwenene Wangana kupwa waulemu chikuma omu apwile hano hamavu? Mwomwo atachikijile ngwenyi Kalunga amutongwele kupwa Mwangana waWangana kana. (Isaya 9:6; Luka 22:28-30) Chipwe ngocho, Yesu kapwile nakufwila ulemu chipwe ngoloko. (Mateu 11:29; Mako 10:17, 18) Ahakile chikuma Wangana kulutwe kuhambakana kala chuma. Shikaho, kufuma vene kunyima noholyapwa Yesu azanga chikuma Wangana waKalunga * mwomwo atachikiza vyuma vyamwaza vize Wangana kana naukalinga kuli Yehova nakuli vaka-kumukavangiza vakushishika vaze azanga.

Yesu azanga chikuma Ise Yehova. (Vishimo 8:30; Yowano 14:31) Azanga nawa vilinga vyamwaza atwama navyo Ise. Vilinga vimwe shina zangi, nakutetela nachiyulo. (Lushimbi lwamuchivali 32:4; Isaya 49:15; WaYowano 1, 4:8) Shikaho, Yesu eji kwivwanga kupihya chikuma hamakuli aze veji kuvangijikilanga Ise. Makuli kana shina akwamba ngwavo Kalunga kazakama vatuko kaha nawa asaka vayandenga. Echi chikiko chuma chachinene chalingishile Yesu azate chikuma mulimo ‘wakwambulula mujimbu wamwaza waWangana,’ mwomwo atachikijile ngwenyi Wangana ukiko kaha naukajilika lijina lyaIse. (Mateu 4:23; 6:9, 10) Mujila muka Wangana kana naukajilika lijina lyaIse?

Yehova mwakazachisa Wangana wenyi mangana akalingile vatu vyuma vyamwaza chikuma. “Mwakahunda masoji osena kumeso” avatu vakushishika vosena. Yehova mwakafumisako chuma chize cheji kunehanga masoji kuvatu. Mbimbiliya ngwayo: “Kufwa kacheshi kukapwako chekako, kaha nawa kakweshi kukapwa cheka kulishona, chipwe miteto, chipwe kukolako.” (Kusoloka 21:3, 4) Shikaho kuhichila muWangana kana, Kalunga mwakafumisako kuyanda chosena chize vali nakumona vatu. *

Shikaho, Yesu afwililile kwambulila vatu vyaWangana, mwomwo atachikijile ngwenyi Wangana kana naukasolola hatoma ngolo namuchima wakutetela atwama navyo Ise. (WaYakova 5:11) Yesu atachikijile nawa ngwenyi Wangana naukalingila vatu vakushishika vaze azanga vyuma vyamwaza.

Yesu atwaminenga mwilu naIse shimbu kanda ezanga hano hamavu. Yehova azachishile Yesu hakutenga vyuma vyosena vyakukomwesa. Atengele melu navatanganyika namilalaji yayivulu, nakutenga nawa mavu navyuma vyakuyoya vyatwamaho. (Wavaka-Kolose 1:15, 16) Oloze havyuma vyosena vyakutenga, Yesu azangile chikuma vatu.—Vishimo 8:31.

Yesu asolwele hatoma ngwenyi azangile vatu omu avambulililenga mujimbu wamwaza. Kufuma vene haze aputukile mulimo wenyi wakwambulula, ahanjikile hatoma ngwenyi ejile hano hamavu mangana avilike “mujimbu wamwaza” kuli vosena vaze vasakile kwivwa mujimbu kana. (Luka 4:18) Chipwe ngocho, Yesu akafwile vatu mujijila jajivulu. Yesu asolwelele vatu zangi hakuvalingila vyuma vyavivulu. Chakutalilaho, omu liyongomena lyavatu lyalikungulwile nakwivwilila kuvyuma vize apwile nakuhanjika, Yesu “avevwililile keke.” (Mateu 14:14) Zangi yalingishile nawa Yesu okenga lunga umwe uze apwile namusongo waupi chikuma. Lunga kana afwelelele ngwenyi Yesu mwamuka chikupu. Ngocho Yesu amwivwilile keke nakwamba ngwenyi: “Ngunasake vene. Toma.” (Luka 5:12, 13) Kahomu Yesu amwene sepa lyenyi Maliya ali nakulishona mwomwo yakufwisa ndumbwenyi Lazalu, “Yesu alishishimwine, nakulyonyinga chikuma” kaha ‘asotwele masoji.’ (Yowano 11:32-36) Kufumaho asangwile Lazalu numba tuhu mwahichile makumbi awana kufuma haze afwilile. Chuma kana chapwile chakukomwesa chikupu!—Yowano 11:38-44.

Chipwe ngocho, Yesu atachikijile ngwenyi vyuma vyamwaza alingilile vatu halwola kana vyapwile vyakashimbu kakandende kaha. Ejivile ngwenyi vatu vosena vaze okile navakaviza cheka, kaha vaze asangwile navakafwa cheka. Chipwe ngocho, Yesu atachikijile ngwenyi Wangana waKalunga ukiko naukafumisako ukalu wosena. Kutachikiza chuma kana chikiko chamulingishile alinge vyakukomwesa “nakwambulula mujimbu wamwaza waWangana.” (Mateu 9:35) Vyakukomwesa vyavindende vize alingile vyasolwele hatoma nge kulutwe Wangana waKalunga naukalingila vatu vyuma vyavinene mukaye kosena. Achitalenu havyuma yatushika Mbimbiliya kutalisa kuvyuma naukalinga Wangana waKalunga kulutwe.

• Vatu navakalikangula kumujimba.

  “Halwola kana, meso atupuputa nawakatona, kaha matwitwi atujika matwitwi nawakajikuka. Halwola kana, vaka-kumbilikita navakasambwojoka nge tupaji, malimi atumama nawakatwa jingunda.” Kaha nawa “mulifuchi lize kamweshi kukapwa mutu mwakamba ngwenyi: ‘Nguli nakukola.’”—Isaya 33:24; 35:5, 6.

• Kakweshi kukapwa kufwako.

  “Vaka-kwoloka navakaheta mavu, kaha navakatwamangaho haya myaka yosena.”—Samu 37:29.

  “Mwata Wakulitulaho Yehova mwakamina kufwa haya myaka yosena, mwakahunda masoji kumeso avatu vosena.”—Isaya 25:8.

• Vafu navakasanguka.

  “Vosena vaze vali muvimbumbe navakevwa lizu lyenyi nakulovokamo.”—Yowano 5:28, 29.

  “Nakukapwa kusanguka chavaka-kwoloka navaka-kuhenga.”—Vilinga 24:15.

• Vatu vosena navakapwa najizuvo namilimo yamwenemwene.

  “Navakatunga jizuvo javo, kaha navakatwamangamo, navakalimanga mande amivinyo, kaha navakalyanga mihako yayo. Kaveshi kukatunga jizuvo javo mangana veka vakatwamengamoko, kaveshi kukalima mangana veka vakalyenga vyuma vanalimiko. . . . Vaze ngwasakula navakalivwisanga kuwaha milimo yamavoko avo.”—Isaya 65:21, 22.

• Kakweshi kukapwa jijitako.

  “Mwakumisa jijita hamavu hosena.”—Samu 46:9.

  “Lifuchi limwe kalyeshi kukakajila lifuchi likwavo jipoko jamikwaleko, kaha kaveshi kukalinangula cheka jitako.”—Isaya 2:4.

• Kulya nachikalisala.

  “Mavu nawema jimbuto. Kalunga ketu mwatukisula.”—Samu 67:6.

  “Hamavu nahakapwanga mbuto jamanona jakulisala. Hajipili hosena nahakapwanga mbuto jamanona jajivulu.”—Samu 72:16.

• Kakweshi kukapwa uhutuko.

  “Vaka-kuhutwa kaveshi kukavavulyama haya myaka yosenako.”—Samu 9:18.

  “Mwakapululula vaka-kuhutwa vaze vali nakutwa kawelele, navaka-kukalikiza navaze vazeneka mutu wakuvakafwa. Mwakevwila keke vaka-kukalikiza navaka-kuhutwa, mwakalwila myono yavaka-kuhutwa.”—Samu 72:12, 13.

Kachi nge namushinganyeka havyuma kanevi vyamwaza ashika Kalunga kukatulingila muWangana wenyi, kaha namutachikiza ovyo vyalingisa Yesu azange chikuma Wangana kana. Omu apwile hano hamavu, afwililile kulweza vatu vyaWangana waKalunga, mwomwo atachikijile ngwenyi Wangana kana, ukiko kaha naukafumisako kuyanda chosena tuli nakumona.

Uno munawahilila hakwivwa jishiko jize vatushika muMbimbiliya kutalisa kuWangana waKalunga tahi? Nge mukiko, kaha vyuma muka mwatela kulinga mangana mutachikize vyavivulu kutalisa kuWangana waKalunga? Vyuma muka mwatela kulinga mangana mukalivwise kuwaha vyuma naukalinga Wangana kana?