Chihande 55

Kanyike Mwazachila Kalunga

UNWOU keshi kanyike wamwazako nyi? Ikiye Samwele. Lunga nakwate mumutwe waSamwele hikapilishitu wakulitulaho wavaIsalele, Eli. Ise yaSamwele, Elekana nanaye Hana vakivo vanakumuneha kuli Eli.

Samwele ali kaha namyaka yiwana chipwe yitanu. Oloze mwatwamanga kuno kutavanaku yaYehova hamwe naEli navapilishitu vakwavo. Mwomwo ika Elekana naHana vanasuula kanyike Samwele kuzachila Yehova hatavanaku? Tutalenu kanawa.

Hanahichi myaka yayindende kaha nahaze Hana apwile wakunyengetela. Apwile mwana pimbi, kaha asakilenga chikuma kupwa namwana. Shikaho likumbi limwe Hana hakuya kutavanaku yaYehova, alombele ngwenyi: ‘Ove Yehova, kanda munguvulyamako! Nge munguhana mwana walunga, ngunakulishika lushiko ngwami nangukakuhanayo makumbi osena mwakayoyanga.’

Yehova akumbulwile kulomba chaHana, kaha tukweji vakavangijileho asemene Samwele. Hana azangile mwanenyi, kaha aputukile kumunangula vyaYehova shimbu apwile wamundende. Alwezele lunga lyenyi ngwenyi: ‘Samwele nge nasumuka, nangukamutwala kutavanaku akamuzachilenga Yehova.’

Mukiko vaHana naElekana vali nakulinga hamuvwimbimbi tuli nakumona. Samwele hakumulongesa kanawa kuvisemi jenyi, nawahilila kumuzachila Yehova hambalaka yenyi. Hamwaka hamwaka vaHana naElekana kuvanga vayenga nakulemesa hambalaka yakulipwila, nakutala namwanavo wamundende. Mwaka himwaka Hana kuvanga anehe kochi yayihya namutungila Samwele.

Myaka chiyihita, Samwele hanga mwazachila hatavanaku yaYehova, kaha Yehova navatu vanamuzange. Oloze vana vakapilishitu wakulitulaho, Eli, vaHofwonyi naFwinehase kaveshi kanawako. Vanakulinga chikuma vyuma vyavipi, nakulingisa vakwavo valikange kuli Yehova. Eli atela avafumise haupilishitu, oloze nawa chiku.

Kanyike Samwele kate kwechelela vyuma vyakuhuka vinakusoloka hatavanaku vimuhonese kuzachila Yehova. Hanashimbula chikuma kufuma halwola Yehova napunga nakuhanjika kuvatu mwomwo yakukeha chavatu vakumuzanga Yehova. Omu nakolo Samwele, hinakusoloka chuma chino:

Samwele nasavala mutavanaku kaha lizu nalimuhindula. Mwetava ngwenyi: ‘Yami uno mwane.’ Mwahinduka nakulahila kuli Eli, ngwenyi: ‘Yami uno, mwomwo unangusanyika.’

Oloze Eli ngwenyi: ‘Kangwakusanyikileko; yako ukasavale.’ Samwele kuya cheka savale.

Jino nakupwa mutambi wamuchivali: ‘Ove Samwele!’ Samwele hindu nakulahila cheka kuli Eli. ‘Yami uno, mwomwo unangusanyika.’ Oloze Eli ngwenyi: ‘Ove mwanami, kangwakusanyikileko. Savala cheka.’ Kaha Samwele hikuya nakusavala.

Lizu lyasanyikile kamuchitatu: ‘Ove Samwele!’ Samwele hikulahila kuli Eli. Himwamba ngwenyi ‘Yami uno, mwomwo watela unangusanyika.’ Eli himwejiva jino ngwenyi anakumusanyika atela kupwa Yehova. Himwalweza Samwele ngwenyi: ‘Yako cheka usavale, kaha nge mwakusanyika cheka, umwambe ngwove, Ove Yehova, hanjika, mwomwo ngamba yove ali nakwivwilila.’

Mukiko mwahanjika Samwele hakumusanyika cheka kuli Yehova. Yehova mwalweza Samwele nge Eli navana venyi mwavazangamisa. Jino Hofwonyi naFwinehase hikufwila mujita navaFwilishite, kaha Eli hakwivwa vyuma vinasoloka, hikulindundula nakulihokola shingo yenyi nayikiye hikufwa. Ngocho vyahanjikile Yehova vinasoloka.

Samwele hakukula, himwapwa muka-kuyula wakukumishilako muIsalele. Omu nashinakajiwa, vatu hinavamwihula ngwavo: ‘Sakula mwangana atuyule.’ Samwele kate kusakula, mwomwo Yehova ikiye mwangana wavo. Oloze Yehova mwamulweza avevwilile vatu.

Samwele 1, 1:1-28; 2:11-36; 4:16-18; 8:4-9.