Chihande 50

Mapwevo Vavali Vakuhamuka

OMU vaIsalele navengila muukalu, hikulila kuli Yehova. Yehova navevwililanga nakuvahana vatwamina vakuhamuka vavakafwe. Vatwaminava vavavuluka muMbimbiliya ngwavo vaka-kuyula. Yoshuwa ikiye apwile muka-kuyula watete, vakwavo vakavangijileho vapwile Otonyele, Ehute, naShamangale. Havatu vakafwile vaIsalele hapwile mapwevo vavali, vaNdevola naYayele.

Ndevola hikapolofweto wapwevo. Yehova himwamulweza vyuma vyakulutwe, kaha hikulweza vatu vyuma nahanjika Yehova. Ndevola himuka-kuyula nawa. Eji kutwamanga mwishi yamutondo umwe wamukoma kulifuchi lyajipili, kaha vatu hinavayako avakafwe haukalu wavo.

Halwola luno, Yavine, himwangana waKanane. Ali namatemba ajita 900. Maswalale jenyi vakutakama, ngocho vanalingisa vaIsalele vavavulu kupwa vandungo jaYavine. Kapitau kamaswalale jaMwangana Yavine ikiye, Shesela.

Likumbi limwe, Ndevola himwasanyika Muka-kuyula, Mbalake, nakumulweza ngwenyi: ‘Yehova nambe ngwenyi: “Mbata malunga 10,000 uvatwale kuPili Tavole. Kwakuze nangukaminehela Shesela. Kaha ikiye namaswalale jenyi nangukavahana mulivoko lyenu.”’

Mbalake mwalweza Ndevola ngwenyi: ‘Nge natuya nayove, kaha nanguya.’ Ndevola hikuya, oloze alwezele Mbalake ngwenyi: ‘Kaveshi kukutohweselaho ove hakufungulula kanako, mwomwo Yehova mwahana Shesela mulivoko lyapwevo.’ Kaha mukiko chapwile.

Mbalake hikusuluka haPili Tavole nakuhumangana maswalale jaShesela. Kukasumuka Yehova nanehe livaji, kaha maswalale vavavulu vavaka-kole vanavombo. Oloze Shesela hikutumbuka mulitemba lyenyi nakuchina.

Kajingili, kaha Shesela we-e kumbalaka yaYayele. Himwamwingisa, nakumuhana mavele. Mavele nawamukokela tulo, nakushimbula chiku hikusavala tulo twatuvulu. Jino Yayele kumbata lumbambo lwambalaka nakulupapalila mumutwe walunga kanou wamupi. Mbalake hakwiza, hikumulweza Shesela uze nafu! Wamono mazu ahanjikile Ndevola amuchano.

Kufumaho, hikujiha Mwangana Yavine nayikiye nawa, kaha vaIsalele vali jino mukuunda cheka hakatando kakandende.

Vaka-kuyula 2:14-22; 4:1-24; 5:1-31.