Chihande 39

Mukombo waAlone Naufukula Jitemo

ACHITALE jitemo namamonde akuhya aze anakwima kumukombo. Ou mukombo waAlone. Jitemo namihako yakuhya yemine kumukombo waAlone naufuku umwe kaha! Tutalenu chalingishile.

VaIsalele vanalumbwangilanga mupambo hashimbu yayisuku. Vatu vamwe kavasakile Mose apwe twamina, numba Alone kupwa kapilishitu wakulitulahoko. Muvashinganyekele vaKola, Ndatane, Avilame navatwamina javatu 250. Vosena ava hikwiza kuli Mose nakumwamba ngwavo: ‘Mwomwo ika muli nakulizundwila helu lyayetu tuvosena?’

Mose mwalweza Kola nalizavu lyenyi ngwenyi: ‘Hamene nachimene mukambate viloso nakuhakaho vize vyalivumba lyamwaza. Jino mukeze kutavanaku yaYehova. Natukamona owo Yehova mwakasakula.’

Lichako Kola nalizavu lyenyi lyavatu 250 we-e kutavanaku. Kuli navatu vakwavo vaneza nakuvakafwa. Yehova napihilila. Mose ngwenyi: ‘Achehukenu kujimbalaka jamalunga vakuhukava. Kanda namukwata kuchuma chavo chipwe chimweko.’ Vatu hinavevwilila nakwehuka kujimbalaka jaKola, Ndatane naAvilame.

Mose ngwenyi: ‘Hakiko namutachikijila owo vanasakula kuli Yehova. Mavu nawasokoloka nakumina malunga vakuhukava.’

Mose hakukumisa kuhanjika, mavu hisokoloko. Mbalaka yaKola navyuma vyenyi naNdatane naAvilame kaha navosena vapwile navo hindondolo, mavu nawalisoka cheka ndwa. Vatu hakwivwa miteto yavaze vanakwingila mumavu, hikutambakana ngwavo: ‘Chinenu! Pamo mavu nawatumina nayetu nawa!’

Kola navatu jenyi 250 vachili kwakamwihi natavanaku. Yehova hikutuma kakahya, kaha vosena pwililili. Jino Yehova hikulweza mwanaAlone, Eleyaza ambate viloso vyakulumbila vyamalunga vanafu nakuvitenga kupwa vyakufwika halijiko lyakulumbila. Evi vyakufwika lijiko lyakulumbila vyapwile vyakwanukilangaho kuli vana vaIsalele, nge kakweshi mutu weka atela kupwa kapilishitu kaYehova shina Alone navana venyi kunahu.

Jino Yehova mwasaka asolole hatoma ngwenyi Alone navana venyi vakivo nasakula kupwa vapilishitu. Kaha himwalweza Mose ngwenyi: ‘Lweza twamina hitwamina wamiyachi yavaIsalele anehe mukombo wenyi. Kumuyachi waLevi, lweza Alone anehe mukombo wenyi. Kayitulike mutavanaku kulutwe lwachikasha chalushiko. Mukombo walunga uze ngunasakula kupwa kapilishitu naufukula jitemo.’

Lichako nachimene, Mose ngwenyi atale, mukombo waAlone unafukula jitemo namamonde akuhya! Kutala unatachikiza jino chuma Yehova alingishilile mukombo waAlone ufukule jitemo nyi?

Kulava 16:1-49; 17:1-11; 26:10.