Mwanangombe waUlu
Chihande 36
Mwanangombe waUlu
MAMA yami! Vatu vanakulinga ikaha? Vali nakulifukula kumwanangombe! Mwomwo ika?
Mose hakushimbula kupili, vatu ngwavo: ‘Katwatachikijile vinamuwane Moseko. Tutengenu kalunga waulu uze mwatulovola mulifuchi lino.’
Yaya yaMose, Alone, ngwenyi ‘Chamwaza. Zulenu tupata twenu twaulu, munguneheletwo.’ Vatu hikuzula, kaha Alone mwavazuzulula nakuvatenga mwanangombe waulu. Jino vatu ngwavo: ‘Ou ikiye Kalunga ketu, uze atulowele muEjipitu!’ VaIsalele hikulinga chiwanyino, nakulemesa mwanangombe waulu.
Yehova napihilila hakuchimona, ngocho mwalweza Mose ngwenyi: ‘Yako, suluka. Vatu vanakulinga vyuma vyakuhuka. Vanavulyama jishimbi jami nakulifukula kumwanangombe waulu.’
Mose mwasuluka washi hapili. Hakuheta kwakamwihi, himwalimwena nameso kapu. Vatu vanakwimba nakukina kumwanangombe waulu! Mose hikupihilila nakumbila malolwa avali apwile najishimbi, kaha nawapazuka mutuvihanda twatuvulu. Kumbata mwanangombe waulu nakumuzuzulula. Hikumutwa jino nge lukungu.
Vatu vanalingi chuma chachipi chikuma. Mose hikutuma malunga vamwe vambate jipoko jamikwale. Mose ngwenyi: ‘Vatu vavapi vaze valemesanga mwanangombe waulu vatela kufwa.’ Malunga kana hikujiha vatu 3,000! Kutalechi kacheshi nakusolola nge twatela kulemesa kaha Yehova, kuzomboka tulunga vamakuliko nyi?