Chihanda 2

Kufuma haLivaji Swi naKukusokoka muEjipitu

Vatu vayovokele Livaji vapwile vatanu navatatu, oloze nakushimbula chiku vavulile chikuma. Omu hahichile myaka 352 hanyima yaLivaji, Apalahama asemukile. Natulinangula omu Kalunga alamine lushiko ashikile Apalahama lwakukamuhana mwana walijina lyaIsaka. Jino havana vaIsaka vavali, Kalunga asakwileho Yakova.

Yakova apwile natanga yayinene yavana vamalunga 12 naveka vamapwevo. Vana vaYakova 10 vahungile songo yavo Yosefwe nakumulanjisa muundungo kuEjipitu. Kufumaho, Yosefwe apwile muka-kuyula wamulemu muEjipitu. Omwo kwejile zala yakalombolombo, Yosefwe avesekele vandumbwenyi awane nge michima yavo yalumukile. Tanga yosena yaYakova, vaIsalele, vayile jino nakutunga kuEjipitu. Vyumevi vyasolokele hamyaka 290 kufuma hakusemuka chaApalahama.

Myaka 215 yakavangijileho, vaIsalele vatwamine muEjipitu. Omu afwile Yosefwe, vavakwachile undungo. Jino Mose asemukile, kaha Kalunga amuzachishile kuyovola vaIsalele muEjipitu. Chihanda CHAMUCHIVALI chili nakutala havyuma vyasolokele mumyaka yosena 857.