Chihande 16

Isaka Mwambata Pwevo Wamwaza

UNAMWIJIVA ou pwevo ali hamuvwimbimbi tahi? Lijina lyenyi ikiye Laveka. Kaha lunga anakumusesa ikiye Isaka. Ou pwevo mwakapwa pwevo lyaIsaka. Chapwile ngachilihi?

Chamwaza, ise yaIsaka, Apalahama, asakile kumbachila mwanenyi pwevo wamwaza. Kasakile Isaka kukambata pwevo wamuKananeko, mwomwo valemeselenga tulunga vamakuli. Shikaho Apalahama atumine ndungo yenyi ngwenyi: ‘Ngunasake uyenga kuHalane kuli vausoko wami, ukamumbachile mwanami Isaka pwevo.’

Hoho vene ndungo yaApalahama ambachile vangamela likumi nakutambuka ungeji wausuku. Hakuheta kwakamwihi nakuze vatwaminenga vausoko waApalahama, atulile halishima. Chapwile chingoloshi, lwola vejilenga mapwevo vamunganda nakuswita meya kulishima. Jino ndungo yaApalahama alombele kuli Yehova ngwenyi: ‘Achitave chisoloke, uze mwanapwevo mwanguhana meya akunwa nakuli vangamela, apwenga ikiye unamusakwila ngamba yove Isaka.’

Nakushimbula chiku Laveka ejile nakuswita meya. Uze Ndungo hakumulomba meya, amuhanyine. Kaha aswichile meya amavulu akunwisa vangamela vosena vafwile lipwila. Wapwile mulimo waunene mwomwo vangamela veji kunwa meya amavulu.

Omu akumishile Laveka, ndungo yaApalahama ahulishile lijina lyaise. Alombele nawa nge nahase kusavala kwimbo lyavo. Akumbulwile ngwenyi: ‘Ami ngumwanaMbetwele, kaha zuvo yakusavala enu tuli nayo.’ Ndungo yaApalahama atachikijile nge Mbetwele apwile mwanandumbu yaApalahama, Nahole. Shikaho afukamine nakumusakwilila Yehova hakumutwala kuvausoko waApalahama.

Ufuku uze ndungo yaApalahama alwezele vaMbetwele nandumbu yaLaveka walunga, Lavane, chuma akavile. Vosena vetavile nge Laveka atela kuya vakalimbate naIsaka. Laveka ambile ngachilihi hakumuhulisa? Ambile ngwenyi, ‘Mwomwo vene,’ etavile kuya. Kaha lichako vakandamine havangamela nakuputuka ungeji wausuku wakukinduluka kuKanane.

Vakahetele nachingoloshi. Laveka amwene lunga ali nakutambuka muwande. Apwile Isaka. Isaka awahililile hakumona Laveka. Apwile lika naushona mwomwo hahichile kaha myaka yitatu kufuma hakufwa chanaye, Sala. Jino Isaka amuzangile chikuma Laveka, ngocho ushona wakumine.

Kuputuka 24:1-67.