Chihande 32

Vipupu 10

ACHITALE hamivwimbimbi. Yinakusolola vipupu anehele Yehova haEjipitu. Hamuvwimbimbi watete Alone anakuveta mukombo haKalwiji Nyile. Hakuvetaho, meya alumukile manyinga. Vaishi vafwile, kaha kalwiji aputukile kunuka livumba.

Chamuchivali, Yehova akandwishile vimbotwe kufuma muKalwiji Nyile. Vapwile kwosena—mwakutelekela, mujindeho, nahatuhela twavatu—kwosena. Omu vimbotwe vafwile, vaEjipitu vavakungwile mumilumba yayinene, kaha lifuchi lyanukile fwetete.

Alone avetele hamavu namukombo wenyi, kaha lukungu lwalumukile kupwa tumunyamunya. Otu hitututu tweji kutukanga nakusumana. Chipupu kana, chapwile chamuchitatu haEjipitu.

Vipupu vikwavo vyakwachilenga vaEjipitu kaha, vaIsalele chiku. Chamuchiwana chapwile chavajiji vavanene vengilile mujizuvo javaEjipitu. Chipupu chamuchitanu chapwile hatunyama. Vangombe namikoko navapembe javaEjipitu vavavulu vafwile.

Jino, Mose naAlone vatapwile uto nakuulakumuna. Wanehele musongo wajimbandu jajipi havatu natunyama. Echi chapwile chipupu chamuchitanu nachimwe.

Kufumaho Mose olwele livoko kwilu, kaha Yehova anokesele vula yamikalateta namalolwa. Yapwile vula yayipi yamalolwa ize kanda vamoneho lyehi muEjipitu.

Chipupu chamuchitanu navitatu chapwile chavambimba-makumbi. Kanda kupweho lyehi vambimba-makumbi vavavulu ngachizeko. Valile vyosena vize kavachikile kuvula yamalolwako.

Chipupu chamuchitanu naviwana chapwile chamilima. Mulifuchi lyosena mwapwile milima pwi makumbi atatu, oloze kuli vaIsalele kwapwile musana zwalala.

Kalunga jino alwezele vatu jenyi vasapwile manyinga amwanapembe chipwe mukoko havipamba vyavikolo vyavo. Kaha kangelo kaKalunga ahichile muEjipitu. Hazuvo haze kangelo amwene manyinga, kajihileho mutuko. Oloze jizuvo josena jahonene manyinga havipamba, kangelo kaKalunga ajihilemo vatwatwa javatu natunyama. Echi chapwile chipupu chakusokesa 10.

Hanyima yachipupu chamakumishilo, Fwalo avasuwile vaIsalele. Vatu jaKalunga vapwile vakulizanga, ngocho ufuku wauze vene vaputukile kufuma muEjipitu.

Kulovoka tupetulu 7 swi naku 12.